အမေရိကန်ပြည်ထောင်စု၊ လော့စ်အိန်ဂျလိမြို့၊ နာမည်ကျော်
ဘဲလ်အဲအရပ်ရှိ စတုရန်းပေ ၃၈၀၀၀ ခန့်အကျယ်အဝန်းရှိ
နေအိမ်ကြီး သန်း ၂၅၀ ဖြင့် ဈေးကွက်ဝင်လာရာ တစ်နိုင်ငံလုံးတွင် ဈေးအကြီးဆုံးစံချိန်တင်ခဲ့ကြောင်း နယူးယောက်အခြေစိုက် အိမ်ခြံမြေ သတင်းဝက်ဘ်ဆိုက်တစ်ခုတွင် ဖော်ပြသည်။
ဈေးကွက်တင်သူမှာ ဇိမ်ခံနေအိမ်များ ဆောက်လုပ်သည့် developer
ဘရုစ် မာကော့ဗ်စကီးဖြစ်ပြီး ဘဲလ်အဲလမ်း၊ အမှတ် ၉၂၄ တွင်
တည်ရှိသည့် နေအိမ်ဖြစ်သည်။
လူပေါင်း ၂၅၀ ဖြင့် ၄ နှစ်ကြာအချိန်ယူဆောက်လုပ်ခဲ့ရပြီး ဝန်းကျင်တစ်ခွင်ရှိ နှင်းဖုံးတောင်များမှသည် ပစိဖိတ်သမုဒ္ဒရာ တစ်ခွင်တစ်ပြင်လုံးကို ၂၇၀ ဒီဂရီရှုမြင်ရသည့် မြင်ကွင်းရှိသည်။
လော့စ်အိန်ဂျလိတွင် ယခင်က ဈေးကွက်တင်ခဲ့ဖူးသည့် အာရွန်စပဲလင်း၏ ကန်ဒေါ်လာ သန်း ၂၀၀ တန်နေအိမ်၏ စံချိန်ကို ဖြတ်ကျော်သွားခြင်းလည်း ဖြစ်သည်။
သို့ရာတွင် ဘဲလ်အဲတွင် လက်ရှိ တည်ဆောက်နေဆဲဖြစ်သော ကြမ်းခင်းဧရိယာ ၇၄၀၀၀ စတုရန်းပေ ကျယ်ဝန်းသည့် နေအိမ်ကြီး အပြီးသတ်ပါက ကန်ဒေါ်လာ သန်း ၅၀၀ ခန့်အထိ ဈေးခေါ်ဖွယ်ရှိနေပြီး အမေရိက၏ တန်ဖိုးအကြီးဆုံးနေအိမ်ဖြစ်လာမည် ဖြစ်သည်။
ယခုဈေးကွက်တင်သည့် နေအိမ်တွင် အလွန်ကျယ်ဝန်းလှသည့် အရေးကြီးပုဂ္ဂိုလ် ဧည့်ဂေဟာဆောင် ၁၀ ခုပါဝင်ပြီး ဇိမ်ခံရေချိုးခန်းပေါင်း ၂၁ ခန်းပါဝင်သည်ဟု ဆိုသည်။
နေအိမ်ကို ဖျော်ဖြေရေးအတွက် အဓိကရည်ရွယ်ဆောက်လုပ်ထားခြင်းဖြစ်ပြီး ဖျော်ဖြေရေးအတွက် ရည်ရွယ်ထားသည့် ကြမ်းခင်းဧရိယာ ၁၇၀၀၀ စတုရန်းပေပါဝင်ရာ မီးဖိုဆောင် ၃ ခု၊ အရက်ဘား ၅ ခု၊ ၈၅ ပေ အလျားရှိ ရေကန်တစ်ကန်၊ ထိုင်ခုံ ၄၀ ပါ ကဇာတ်ရုံတစ်ခုနှင့် လမ်းကြောင်း ၄ ခုပါ ဘိုးလင်းကစားကွင်းတို့ ပါဝင်သည်။
ထို့အပြင် ကန်ဒေါ်လာ သန်း ၃၀ ကျော်တန်ကြေးရှိ ကားပြခန်းတစ်ခုလည်း ပါဝင်ကာ ကောင်းစွာလေ့ကျင့်ပေးထားသည့် အချိန်ပြည့်ဝန်ထမ်း ၇ ဦး ၊ အနုပညာလက်ရာ ၁၀၀ ကျော်၊ အလှပြင်ခန်းမနှင့် အားကစားလေ့ကျင့်ရေးခန်းမတို့လည်း ပါဝင်သည်။
“ဒီစံအိမ်က လောကမှာရှိသမျှ အကောင်းဆုံးတွေကို လိုချင်တဲ့ တကယ့်ဘီလျံနာကြီးတွေအတွက် ရည်ရွယ်ပြီး အသေးစိတ်မွမ်းမံထားတာဖြစ်ပါတယ်။ ”ဟု ဈေးကွက်တင်သူ မစ္စတာ မာကော့စကီးက ပြောကြားသည်။
“နှစ်စဉ်နှစ်တိုင်း ဘီလျံနာသစ်တွေ ရာနဲ့ချီပြီး ထွက်ပေါ်လာနေပါတယ်။ သူတို့တွေဟာ ကယ်လီဖိုးနီးယားက ဘယ်လိုအရာတွေ ရနိုင်မလဲဆိုတာ အမြဲအာရုံစိုက်နေတာ ဖြစ်ပါတယ်”ဟုလည်း မာကော့စကီးက ဆက်လက်ပြောကြားသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
