စင်္ကာပူတွင် အလုပ်မှ ခွင့်ရရန်အတွက် အဖိုးဖြစ်သူ သေဆုံးကြောင်း လက်မှတ်အတု ပြုလုပ်ခဲ့သည့် အမျိုးသား ဒဏ်ငွေ ဒေါ်လာ ၄၀၀၀ ချမှတ်ခံရ

စင်္ကာပူတွင် အမျိုးသားတစ်ဦးသည် အလုပ်မှ လစာဖြင့်ခွင့် ရရှိရန်အတွက် အဖိုးဖြစ်သူ သေဆုံးကြောင်း လက်မှတ်အတု ပြုလုပ်ခဲ့ရာ ဒေါ်လာ ထောင်နှင့်ချီ၍ ဒဏ်ရိုက်ခံခဲ့ရသည်။

ချစ်သူမိန်းကလေး၏ သစ္စာဖောက်ခံရသော အဆိုပါ အမျိုးသားသည် အသည်းကွဲကာ အလုပ်ထဲတွင် အာရုံမစိုက်နိုင် ဖြစ်နေသည်။

၎င်းသည် ဘဏ္ဍာရေးဝန်ဆောင်မှု ကုမ္ပဏီတစ်ခုတွင် Analyst တစ်ဦးအဖြစ် လုပ်ကိုင်နေသူ ဖြစ်ပြီး အသက် ၂၉ နှစ်အရွယ် ဖြစ်သည်။

ထို့ကြောင့် အလုပ်မသွားလိုသဖြင့် လစာဖြင့်ခွင့် ရနိုင်ရန် အဖိုးဖြစ်သူ သေဆုံးကြောင်း လက်မှတ်အတု ပြုလုပ်ခဲ့သည်။

၎င်း၏ အမည်မှာ ဘာရတ် ဂိုပါးဟုဖြစ်ပြီး မွေးစားရင်း၊ သေစာရင်းအက်ဥပဒေအရ လက်မှတ်အတု ပြုလုပ်ကြောင်း ပြစ်မှု ထင်ရှား စစ်ဆေးတွေ့ရှိသောကြောင့် စင်္ကာပူရှိ တရားရုံးက စင်္ကာပူဒေါ်လာ ၄၀၀၀ (ကန်ဒေါ်လာ ၃၀၀၀) ပေးဆောင်စေရန် ဖေဖော်ဝါရီ ၅ ရက်က အမိန့်ချမှတ်ခဲ့သည်။

ဂိုပါးသည် နှစ်စဉ် ခွင့် ၄ ရက် ရရှိပြီး လက်မှတ်အတု ပြုလုပ်သော ကာလက အဆိုပါ ခွင့်ရက်များကို အသုံးပြုနိုင်ကြောင်း တရားရုံးစစ်ဆေးချက်တွင် တွေ့ရှိခဲ့သည်။

၂၀၂၃ ခုနှစ်၊ နိုဝင်ဘာ ၈ ရက်တွင် ဂိုပါးက သူ၏ Team မှ ခေါင်းဆောင်ဖြစ်သူကို ပြောခဲ့သည်မှာ ထိုနေ့မနက်တွင် အဘိုးဖြစ်သူ အိပ်နေရင်း ကွယ်လွန်သွားကြောင်း ပြောခဲ့ပြီး ခွင့်ယူရန် တင်ပြခဲ့သည်။

ထို့ကြောင့် ဂိုပါးအား ဆွေမျိုးရင်းခြာနာရေးခွင့်အဖြစ် နိုဝင်ဘာ ၁၀ ရက်အထိ ခွင့် ၃ ရက် ပေးခဲ့သည်။

၎င်းတို့ ကုမ္ပဏီ၏ မူဝါဒအရ အများဆုံးပေးသည့် ခွင့်ရက် ပမာဏ ဖြစ်သည်။

ထိုလကုန်ပိုင်းတွင် ဂိုပါး၏ ကုမ္ပဏီက ၎င်းရယူထားသော ခွင့်ရက်အတွက် အဘိုး၏ သေဆုံးလက်မှတ် ပြသရန် တောင်းခံခဲ့ရသည်။

ထိုအခါ ဂိုပါးက ဖခင်ဖြစ်သူ အိန္ဒိယမှ နိုဝင်ဘာ ၂၇ တွင် ပြန်လာသောအခါမှ သေဆုံးလက်မှတ်ရရှိမည်ဖြစ်ကြောင်း လိမ်ညာထားခဲ့သည်။

၂၀၂၃ ခုနှစ်၊ ဒီဇင်ဘာ ၇ ရက်တွင် သူ၏ Team ခေါင်းဆောင်က ဂိုပါးအား နောက်နေ့တွင် သေဆုံးလက်မှတ် တင်ပြရန် ပြောကြားခဲ့သည်။

ထိုအချိန်တွင် ဂိုပါးက ၂၀၂၃ ခုနှစ်၊ ဇူလိုင်လအတွင်း သေဆုံးခဲ့သော သူငယ်ချင်းတစ်ဦး၏ မိထွေးထံ ဆက်သွယ်ခဲ့သည်။

သူငယ်ချင်း၏ မိထွေးကို ဂိုပါးက ပြောသည်မှာ သူငယ်ချင်း၏ သေဆုံးလက်မှတ် လိုအပ်နေကြောင်း၊ ၎င်း၏ နာရေး သွားနေရသောကြောင့် ရုံးတွင် ခွင့်ယူထားရသည့်အတွက် တင်ပြနိုင်ရန်ဖြစ်ကြောင်း လိမ်ညာ ပြောဆိုခဲ့သည်။

ဂိုပါးက အဆိုပါ သေဆုံးလက်မှတ်၏ Soft Copy တစ်ခု ရရှိခဲ့ပြီး PDF တည်းဖြတ်သည့် App တစ်ခုဖြင့် အချက်အလက်များ ပြောင်းလဲ ပြင်ဆင်ခဲ့သည်။

သူငယ်ချင်း၏ ကိုယ်ရေးအချက်အလက်များ နေရာတွင် အဘိုးဖြစ်သူ၏ အချက်အလက်များဖြင့် အစားထိုးခဲ့သည်။

သေဆုံးရမှု အကြောင်းရင်းဖြင့် နှလုံးရောဂါဟု ဖော်ပြခဲ့သည်။

ဒီဇင်ဘာ ၁၁ ရက်နေ့တွင် ဂိုပါးက ၎င်းအတု ပြုလုပ်ထားသော သေစာရင်းလက်မှတ်၏ ဓာတ်ပုံ တစိတ်တပိုင်းကို Team ခေါင်းဆောင်ထံ ပေးပို့ခဲ့ပြီး သေစာရင်းလက်မှတ်အောက်တွင် ပါဝင်သော QR Code ကိုမူ ချန်လှပ်ထားခဲ့သည်။

ဂိုပါး၏ Team ခေါင်းဆောင်က လက်မှတ် အပြည့်အစုံ ပေးပို့ရန် တောင်းဆိုခဲ့သည်။

QR Code ရရှိထားပါက လက်မှတ်အတုဖြစ်ကြောင်း အလိမ်ပေါ်တော့မည်ကို သိသောကြောင့် ဂိုပါးက အလုပ်မှ နှုတ်ထွက်စာ တင်ခဲ့သည်။

သေစာရင်း လက်မှတ်အစစ်ဟုတ်မဟုတ် ကုမ္ပဏီမှ စစ်ဆေးခြင်း မပြုနိုင်မီ အလုပ်မှ ထွက်ခွာခဲ့သည်။

စင်္ကာပူတွင် မွေးစာရင်း၊ သေစာရင်းလက်မှတ်များ အတုလုပ်ပါက ၁၀ နှစ်အထိ ထောင်ဒဏ်၊ ဒေါ်လာ ၁၀၀၀၀ အထိ ငွေဒဏ် (သို့မဟုတ်) ၂ မျိုးလုံး ချမှတ်ခံရနိုင်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Man Forges Grandparent’s Death Cetificate to Get Time Off from Work