သြစတေးလျတွင် ဝေးလံခေါင်သီသော ဒေသရှိ မြို့လေးတစ်မြို့က ဆရာဝန်တစ်ဦး ခေါ်ယူနေ၊ လစာ ဒေါ်လာ ၄၀၀၀၀၀ ကျော် ပေးမည့်အပြင် အိမ်လခမပေးရဘဲ နေအိမ်တစ်လုံး အခမဲ့နေထိုင်ခွင့်ပြုမည် ဟုဆို

သြစတေးလျနိုင်ငံတွင် ဝေးလံခေါင်သီသောဒေသရှိ မြို့ကလေးတစ်မြို့၌ တာဝန်ထမ်းဆောင်မည့် ဆရာဝန်တစ်ဦး ရှာဖွေလျက်ရှိသည်။

လစာအနေဖြင့် သြစတေးလျဒေါ်လာ ၆၈၀၀၀၀ (ကန်ဒေါ်လာ ၄၂၈၀၀၀) ပေးမည့်အပြင် နေအိမ် တစ်လုံးတွင် အိမ်လခပေးစရာမလိုဘဲ နေထိုင်နိုင်မည့်အပြင် ကားတစ်စင်းလည်း ပေးထားမည်ဟု ဆိုသည်။

ဆရာဝန်ခေါ်ယူလျက်ရှိသော မြို့လေးမှာ သြစတေးလျနိုင်ငံ၊ ကွင်းစလန်ပြည်နယ်ရှိ ဝေးလံခေါင်သီ သော ဂျူလီယာ ခရိ (Julia Creek) အမည်ရှိ မြို့ကလေးဖြစ်ပြီး လူဦးရေ ၅၀၀ သာရှိသည်။

ယခုကမ်းလှမ်းသည့် လစာပမာဏမှာ ကွင်းစလန်ပြည်နယ်၏မြို့တော် ဘရစ္စဘိန်းတွင် မိသားစု ဆရာဝန်တစ်ဦး ဝင်ငွေ၏ ၂ ဆခန့်ရှိသည်။

ဂျူလီယာခရိနှင့် ဘရစ္စဘိန်းမှာ မော်တော်ကားဖြင့် ၁၇ နာရီအထိ ဝေးကွာသည်။

အနီးဆုံးမြို့ဖြစ်သော Townsville နှင့်ပင်လျှင် ကားဖြင့် ၇ နာရီခရီး အလှမ်းကွာသည်။

ဂျူလီယာ ခရိသို့ သွားရောက်လုပ်ကိုင်မည့် ဆရာဝန်အနေဖြင့် ပြင်းထန်လှသော အပူချိန်၊ မုတ်သုံရာသီတွင် ပေါက်ဖွားသော အင်းဆက်တို့နှင့် ရင်ဆိုင်ရမည် ဖြစ်သည်။

ဂျူလီယာခရိ မြို့လေးမှ ထွက်ခွာတော့မည့် ဆရာဝန်ဖြစ်သူ ဒေါက်တာ Adam Louws က ပြောသည် မှာ မိမိနေရာသို့ ရောက်ရှိတာဝန်ထမ်းဆောင်မည့် ဆရာဝန်အနေဖြင့် ဆိတ်ငြိမ်သော လူနေမှုဘဝနှင့် ထိတွေ့ရမည့်အပြင် ယခင်က မလုပ်ခဲ့ဖူးသော အလုပ်မျိုး လေ့လာလုပ်ဆောင် ရလိမ့်မည်ဖြစ်ကြောင်း ပြောသည်။

ဒေါက်တာ Adam သည် ဘရစ္စဘိန်းတွင် နေထိုင်သူဖြစ်ပြီး ဂျူလီယာခရိသို့ ၂၀၂၂ ခုနှစ်တွင် လာရောက်တာဝန်ထမ်းဆောင်ခဲ့ခြင်း ဖြစ်သည်။

ထိုအချိန်က ဂျူလီယာခရိသည် ဆရာဝန်တစ်ဦးခန့်ထားရေးအတွက် လစာအဖြစ် သြစတေးလျဒေါ်လာ ၅၀၀၀၀၀အထိ ပေးကာ ခေါ်ယူနေမှုမှာ သြစတေးလျတွင် ထိပ်တန်းသတင်းဖြစ်ခဲ့သည်။

“ယောက္ခမက ကျွန်တော့်ဆီကို သတင်းလင့်ခ်တစ်ခု ပို့ပေးခဲ့တယ်။ အဲဒီသတင်းမှာ ရေးထားတာက ဆရာဝန်တစ်ဦးကို ဒေါ်လာ သန်းဝက်လောက်အထိ လစာပေးခေါ်နေတဲ့အကြောင်းပါ။ ဒီသတင်းကို တွေ့တဲ့အချိန်မှာ ကျွန်တော် ပထမဆုံးတွေးမိတာက ဂျူလီယာခရိဆိုတာ ဘယ်နားမှာလဲ…လို့ ပါ။” ဟု ဒေါက်တာ Adam က ပြောပြသည်။

(▲ ဂျူလီယာခရိ၏ ပင်မလမ်းပေါ်မှ လမ်းညွှန်ဆိုင်းဘုတ်တစ်ခုကို ၂၀၂၄ ခုနှစ်၊ သြဂုတ်လ ၁ ရက်က ရိုက်ကူးထားသော ဓာတ်ပုံ။ ဓာတ်ပုံ-Jo Thieme/ McKinlay Shire Council via AP)

ဂျူလီယာခရိသည် ရေဝေးသော ကုန်းခေါင်ခေါင်ဒေသဖြစ်ပြီး လိမ္မော်ရောင်ဆည်းဆာတို့ဖြင့် သာယာလှပသော ဒေသဖြစ်သည်။

ကလေးတို့မှာ မြင်းစီးခြင်း၊ ကစားခုန်စား အားကစားလုပ်ခြင်းများ ပြုလုပ်ကြသည်။

သို့သော် အထက်တန်းကျောင်းနှင့် အလှမ်းဝေးသောကြောင့် မြို့သို့သွားကာ ကျောင်းအိပ်ကျောင်းစား ကျောင်းတက်ကြရသည်။

အနီးဆုံးဆေးရုံမှာ ကားဖြင့် ၃ နာရီခရီး ဝေးကွာသည်။

ဒေါက်တာ Louws ရောက်မလာမီ ၂၀၂၂ ခုနှစ်မတိုင်မီ ၁၅ နှစ်တာကာလအတွင်း ဂျူလီယာခရိတွင် အမြဲနေထိုင်သည့် ဆရာဝန် မရှိခဲ့။

ဆရာဝန်အချီု့ ခေတ္တရောက်လာကာ ရက်အနည်းငယ် နေထိုင်ခြင်းမျှသာ ရှိခဲ့သည်။

ဆရာဝန်မရှိသည့် အခက်အခဲမှာ သြစတေးလျ၏ ကျေးလက်ဒေသများတွင်သာမက ကမ္ဘာတဝန်းတွင်ပါ ရင်ဆိုင်နေရသည့် ပြဿနာ ဖြစ်သည်။

၂၀၂၄ ခုနှစ်၊ သြစတေးလျအစိုးရ၏ အချက်အလက်များအရ သြစတေးလျနိုင်ငံတဝန်း ဆရာဝန် ၂၅၀၀ ဦးသာ ရှိသည်ဟု ဆိုသည်။

အလွန်တရာ ဝေးလံခေါင်သီလှသော ဒေသများသို့ ဆရာဝန်များ ခေါ်ယူနိုင်ရေးမှာ အလွန်ခက်ခဲသည်။

သြစတေးလျသည် တိုက်ကြီးတစ်ခုလုံးကို ဖြန့်ကျက်တည်ရှိကာ အလွန်ကျယ်ဝန်းလှသည့် နိုင်ငံကြီးဖြစ်ပြီး ကမ္ဘာပေါ်တွင် လူနေအကျဲပါးဆုံး နိုင်ငံများတွင် တစ်ခုအပါအဝင် ဖြစ်သည်။

အမေရိကန်ပြည်တွင်ဆိုလျှင်လည်း ကျေးလက်ဒေသများတွင် ဆရာဝန်ရှားပါးမှုနှင့် ရင်ဆိုင်နေရကြောင်း ၂၀၂၃ ခုနှစ် တရားဝင်အချက်အလက်များအရ သိရသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: A remote Australian town seeks a doctor, offering a $400,000 salary and free rent Photo Credit- Jo Thieme/ McKinlay Shire Council via AP