တရုတ်ပြည်တွင် မိန်းကလေးတစ်ဦးက အိမ်လခ သက်သာစေရန်အတွက် ၎င်းအလုပ်လုပ်သည့်စက်ရုံရှိ အိမ်သာခန်းအတွင်း နေထိုင်သည့်ဖြစ်ရပ် လူမှုကွန်ရက်သုံးစွဲသူတို့အကြား နာမည်ကြီးနေ

တရုတ်ပြည်တွင် မိန်းကလေးတစ်ဦး၏ သမားရိုးကျမဟုတ်သော နေထိုင်မှုပုံစံနှင့်စပ်လျဉ်းပြီး တရုတ်ပြည်ရှိ လူမှုကွန်ရက်သုံးစွဲသူတို့အကြား ဂယက်ရိုက်ကျော်ကြားပျံ့နှံ့နေသည်။

ထိုမိန်းကလေးသည် ၎င်းအလုပ်လုပ်ကိုင်သည့် စက်ရုံရှိ အိမ်သာခန်းကို လူနေခန်းသဖွယ် နေထိုင်အသုံးပြုခြင်း ဖြစ်ပြီး ငှားရမ်းခအဖြစ် တစ်လလျှင် ယွမ်ငွေ ၅၀ (၇ ဒေါ်လာ) သာ ပေးရသည်။

အိမ်ငှားနေထိုင်ကြသူတိုင်း အိမ်လခ သက်သာလိုကြသည်။

သို့သော် အိမ်သာထဲတွင် နေထိုင်လိုသူ မည်မျှ ရှိပါသနည်း။

တရုတ်ပြည် ဟူနန်ပြည်နယ်မှ မိန်းကလေးတစ်ဦးဖြစ်သူ ယန်၏ အိမ်သာထဲတွင် နေထိုင်နေပုံ ဓာတ်ပုံများ လူမှုကွန်ရက်တွင် ပျံ့နှံ့ခဲ့ရာ လူမှုကွန်ရက်သုံးစွဲသူတို့အကြား များစွာ ဂယက်ရိုက် ကျော်ကြားခဲ့သည်။

ထိုမိန်းကလေး နေထိုင်လျက်ရှိသည်မှာ အသုံးမပြုတော့သည့် သေးငယ်ကျဉ်းမြောင်းသော အိမ်သာခန်းကျဉ်းလေးတစ်ခုတွင် ဖြစ်ပြီး ၎င်းအလုပ်လုပ်ကိုင်သည့် ပရိဘောဂစက်ရုံဝန်းအတွင်း တည်ရှိသည်။

(▲ အိမ်သာခန်းအတွင်း နေထိုင်နေသော ယန်အမည်ရှိ မိန်းကလေး။ ဓာတ်ပုံ- Jam Press)

အသက် ၁၉ နှစ်အရွယ်သာရှိသေးသော ယန်က ပြောပြသည်မှာ မိမိသည် ဆင်းရဲသားမိသားစုမှ ဖြစ်ကြောင်း၊ ပုံမှန်နေအိမ်တစ်လုံးကို ယွမ် ၈၀၀ (ဒေါ်လာ ၁၁၀) ပေးကာ ငှားရမ်းနေထိုင်နိုင်စွမ်း မရှိကြောင်း၊ ထို့ကြောင့် အိမ်သာခန်းအတွင်းနေထိုင်၍ ရမည်လားဟု သူဌေးဖြစ်သူထံ မေးမြန်းတောင်းဆိုခဲ့သည်ဟု ဆိုသည်။

(▲ ယန်အိပ်စက်သော ခေါက်သိမ်းနိုင်သည့် ကုတင်ကို တွေ့ရပုံ။ ဓာတ်ပုံ- Jam Press)

(▲ ယန်က အဆိုပါ အိမ်သာခန်းဟောင်းကို ငှားရမ်းခအဖြစ် တစ်လလျှင် ၆ ဒေါ်လာကျော်ခန့်သာ ပေးရသည်။ ဓာတ်ပုံ- Jam Press)

ယန်၏ အိမ်သာခန်းထဲတွင် နေထိုင်နေပုံ ဓာတ်ပုံများမှာ လူမှုကွန်ရက်တွင် အလွန်ပျံ့နှံ့ကျော်ကြားခဲ့သည်။

သို့သော် လူမှုကွန်ရက်သုံးစွဲသူအချို့က မှတ်ချက်ပြုသည်မှာ ယန်သည် attention လိုချင်သောကြောင့် ယခုဓာတ်ပုံများ ဖြန့်ဝေခြင်းဖြစ်ကြောင်း၊ မည်သူမှ အိမ်သာခန်းထဲတွင် နေထိုင်မည်မဟုတ်ကြောင်း ဝေဖန်ကြသည်။

(▲ ယန်က ယခုအိမ်သာခန်းအတွင်းတွင်ပင် ချက်ပြုတ်စားသောက်ခြင်းများ ပြုလုပ်သည်။ ဓာတ်ပုံ- Jam Press)

(▲ နေထိုင်ရာ အိမ်သာခန်းကို သန့်ရှင်းရေး ပြုလုပ်နေပုံ။ ဓာတ်ပုံ- Jam Press)

(▲ ယန်က အဝတ်လျှော်ခြင်းကိုလည်း ယခုအခန်းထဲတွင်ပင် ပြုလုပ်သည်။ ဓာတ်ပုံ- Jam Press)

ယန်၏ သူဌေးကမူ ယန်သည် စက်ရုံရှိ အိမ်သာခန်းထဲတွင် အိပ်စက်သည်မှာ အမှန်တကယ်ဖြစ်ကြောင်း လူမှုကွန်ရက်မှတဆင့် အတည်ပြုပြောကြားသည်။

(ယန်က အိမ်သာတံခါးဝကို ကာရံသည့်အနေဖြင့် တန်းပေါ်တွင် ကြိးမားသော အဝတ်စကြီးတစ်ခု လွှားထားသည်။ ဓာတ်ပုံ- Jam Press)

(▲ ယန်၏ အဝတ်အစားများ ထားသိုသည့်နေရာ။ ဓာတ်ပုံ- Jam Press)

“သူက ရေနဲ့မီးအတွက် တစ်လကို ယွမ် ၅၀ ပေးမယ်လို့ ပြောပါတယ်။ ဒါပေမယ့် ကျွန်တော်က သူ့ဆီက ပိုက်ဆံမလိုချင်ပါဘူး” ဟု ယန်၏ သူဌေးက ပြောသည်။

ပရိဘောဂ စက်ရုံနေရာမှာ လူသူအလှမ်းကွာသော စက်မှုဇုံဝန်းတစ်ခုအတွင်း တည်ရှိသောကြောင့် ယန်အနေဖြင့် အိမ်လခသက်သာသော နေအိမ်ရှာဖွေတွေ့ရှိရန် မလွယ်ကူချေ။

(▲ စက်ရုံလည်ပတ်သည့် နေ့အခါမျိုးတွင် ယန်က သူ၏ ပစ္စည်းများကို ထုတ်ပိုးသိမ်းဆည်းထားသည်။ ဓာတ်ပုံ- Jam Press)

(▲ ခေါက်ကုတင်က တံခါးဝကို ကာထားသကဲ့သို့ဖြစ်သောကြောင့် မည်သူမှ အထဲသို့ ဝင်လာနိုင်မည် မဟုတ်ချေ။ ဓာတ်ပုံ- Jam Press)

သူဌေးဖြစ်သူက မိမိကို စက်ရုံနှင့်နီးသည့်နေအိမ်တစ်ခုခုတွင် ငှားရမ်းနေထိုင်နိုင်ရေး ကြိုးစားပေးခဲ့သေးကြောင်း၊ သို့သော် အိမ်လခမှာ ယွမ် ၈၀၀ မှ ၁၀၀၀ ကြား (ကန်ဒေါ်လာ ၁၁၀ မှ ၁၃၀ ကြား) ရှိကြောင်း ယန်က ပြောသည်။

လက်ရှိအားဖြင့် ယန်၏ လစာမှာ ယွမ် ၃၀၀၀ အောက် (ကန်ဒေါ်လာ ၄၁၅) ရှိသည်။

ယန်က နေအိမ်အရစ်ကျဝယ်ယူရေးအတွက် လက်ငင်းပေးသွင်းငွေရရန် ငွေစုနေသည်။

သူဌေးဖြစ်သူက စက်ရုံရှိ ရုံးခန်းထဲတွင် အိပ်စက်နိုင်ကြောင်း ပြောဆိုခဲ့သော်လည်း ယန်က အသုံးမပြုတော့သည့် အိမ်သာခန်းထဲတွင် နေထိုင်ရခြင်းမှာ privacy ပိုရှိနိုင်သည်ဟု ယူဆခဲ့သည်။

“ကျွန်မအတွက်ကတော့ ကျောချဖို့ တစ်နေရာရှိတာနဲ့တင် လုံလောက်နေပါပြီ။ အိမ်ငှားနေဖို့အတွက် ငွေတွေ အများကြီး မသုံးချင်ပါဘူး။ ပြီးတော့ အိမ်လခအတွက် တစ်လကို ယွမ် ၈၀၀ လောက်လည်း မသုံးနိုင်ပါဘူး။” ဟု ယန်က ပြောသည်။

ယန်က ပြောသည်မှာ အသက် ၁၆ နှစ်အရွယ်တွင် မိသားစုကို တဖက်တလမ်းမှ ငွေရှာပေးရန်အတွက် ကျောင်းထွက်ခဲ့ရကြောင်း၊ ထို့ကြောင့် လက်ရှိအလုပ်မှာ မိမိအတွက် အရေးကြီးကြောင်း ပြောသည်။

ယန်သည် အိမ်သာခန်းကျဉ်းလေးအတွင်း နေထိုင်နေသည်မှာ တစ်လခန့်ရှိခဲ့ပြီ ဖြစ်သည်။

သို့သော် ယခုအခါ ၎င်း၏ သူဌေးဖြစ်သူက ရုံးခန်းတွင် ယန်နေထိုင်နိုင်ရန်အတွက် ပြုပြင်မွမ်းမံပြင်ဆင်ခြင်းများ ပြုလုပ်နေရာ မကြာမီတွင် ရုံးခန်းသို့ ပြောင်းရွှေ့နေထိုင်နိုင်မည်ဟု မျှော်လင့်ရသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: I live in a bathroom and pay $6 in rent — it’s where I cook, eat and sleep Photo Credit-Jam Press