တရုတ်ပြည်တွင် မိမိကို သင်ကြားခဲ့သည့် ပါမောက္ခအမျိုးသမီးကြီးနေထိုင်ရန် တပည့်မိန်းကလေးက တိုက်ခန်း တစ်ခန်း ဝယ်ပေးထားခဲ့ပြီး မိခင်သဖွယ် ပြုစုစောင့်ရှောက်ခဲ့၊ ပါမောက္ခကွယ်လွန်ချိန်တွင် သူ၏ ဆွေမျိုးများက တိုက်ခန်းလာတောင်းသောကြောင့် အမှုရင်ဆိုင်ရလျက်ရှိ

တရုတ်ပြည်တွင် ကျောင်းသူတစ်ဦးသည် သူ၏ ပါမောက္ခအမျိုးသမီးကြီး နေထိုင်ရန် တိုက်ခန်းတစ်ခန်း ဝယ်ပေးခဲ့ပြီး ပါမောက္ခကြီး၏ ဘဝနေဝင်ချိန်ကာလများတွင် မိခင်သဖွယ် ပြုစုစောင့်ရှောက်ပေးခဲ့သည်။

ယခုအခါ ပါမောက္ခကြီး ကွယ်လွန်သွားခဲ့ပြီးနောက် သူ၏ ဆွေမျိုးများ ရောက်လာကာ တိုက်ခန်းကို တောင်းခံနေသောကြောင့် အမှုရင်ဆိုင်ရလျက် ရှိသည်။

ကျန်းဝေ (Zhang Wei) သည် ၁၉၈၃ ခုနှစ်တွင် ပါမောက္ခ ချန်း၏ ကျောင်းသူတစ်ဦး ဖြစ်လာခဲ့သည်။

ပါမောက္ခချန်းသည် Shanghai Conservatory of Music တွင် လူအများလေးစားခံရသော အဆိုပိုင်းဆိုင်ရာ ဂီတဆရာမတစ်ဦးဖြစ်သည်။

ထိုအချိန်က ဆရာမ ချန်းသည် ၁၅ စတုရန်းမီတာသာ ကျယ်ဝန်းသော မဟာဌာန အဆောင်တွင် နေထိုင်ခဲ့သည်။

မီးဖိုဆောင်နှင့် ရေချိုးခန်းကို ဘေးအခန်း ၄ ခန်းနှင့် မျှဝေသုံးစွဲရ၏။

၁၉၈၄ ခုနှစ်တွင် ဆရာမ ချန်း၏ မောင်ဖြစ်သူမှာ ချန်းထံရောက်ရှိလာပြီး မောင်နှမနှစ်ဦး ဖေးမကူညီ နေထိုင်ခဲ့ကြသည်။

ချန်း၏ မောင်ဖြစ်သူမှာ Shanghai Jiao Tong တက္ကသိုလ်သို့ ရွှေ့ပြောင်းချထားခံရရာမှ ချန်းထံ ပြောင်းရွှေ့လာခြင်း ဖြစ်သည်။

ချန်းသည် နှစ်ပေါင်းများစွာ တာဝန်ထမ်းဆောင်ခဲ့သော်လည်း ၁၉၉၆ ခုနှစ်တွင် အလုပ်မှ အနားယူသောအခါ နေစရာမရခဲ့။

ထို့ကြောင့် တပည့်ဖြစ်သူ ကျန်းဝေက ပါမောက္ခချန်း နေထိုင်ရန်အတွက် ၁၂၅ စတုရန်းမီတာရှိသော တိုက်ခန်းတစ်ခန်းကို ၂၀၀၁ ခုနှစ်တွင် ဝယ်ယူပေးခဲ့ကာ ဆရာမနှင့် မောင်ဖြစ်သူတို့ နေထိုင်စေခဲ့သည်။

ဘေးကင်းလုံခြုံမှုရစေရန်အတွက် ကျန်းဝေက အိမ်ထောင်စုမှတ်ပုံတင်စာရင်း ပြောင်းရွှေ့ပေးခဲ့သည့်အပြင် တိုက်ခန်းပိုင်ဆိုင်မှုအတွက်လည်း ဆရာမတို့ မောင်နှမ၏ အမည်များ ထည့်သွင်းပေးခဲ့သည်။

(▲ ပါမောက္ခချန်းနှင့် မိမိအကြား စည်းနှောင်မှု နှောင်ကြိုးတစ်ခုရှိနေသည်ဟု ခံစားရပြီး မိခင်သဖွယ် သဘောထားကြောင်း ကျန်းဝေက ပြောသည်။ ဓာတ်ပုံ-Weixin)

အဆိုပါတိုက်ခန်း၏ ကာလပေါက်ဈေးကိုမူ မသိရချေ။

တရုတ်ပြည်၏ ပညာရေးတွင် ဆရာဟူသည်မှာ မကောင်းသောလမ်းကြောင်းကို တားမြစ်ခြင်း၊ ကောင်းရာကို ညွှန်ပြခြင်းအစရှိသည့် ကိုယ်ကျင့်စာရိတ္တဆိုင်ရာ ပဲ့ပြင်သူများအဖြစ် အများက အရိုးစွဲ လက်ခံထားကြသည်။

တရုတ်လူ့အဖွဲ့အစည်းတွင် ဆရာတို့မှာ များစွာလေးစားခံရသည်။

ပါမောက္ခ ချန်း၏ သြဇာတိက္ကမနှင့် ပညာရှင်ပီသမှုကို ကျန်းဝေအလွန်လေးစားသည်။

“ကျွန်မတို့ကြားမှာ နက်ရှိုင်းတဲ့ ဆက်နွှယ်မှုတစ်ခုရှိနေပါတယ်။ ကျွန်မရဲ့ နှလုံးသားထဲမှာ သူက မိခင်တစ်ယောက်လိုပါပဲ” ဟု ကျန်းဝေက ပြောသည်။

“သူ…အကြောက်ဆုံးက အိမ်ပိုင်ရာပိုင် မရှိမှာ အကြောက်ဆုံးပဲ။ အဲဒါကြောင့် ဆရာမအတွက် အဲဒီတိုက်ခန်း ဝယ်ပေးခဲ့တာပါ”

ကျန်းဝေသည် ပါမောက္ခချန်းနှင့် သူ၏ မောင်ဖြစ်သူတို့ကို မိသားစုရင်းချာသဖွယ် ဆက်ဆံခဲ့သည်။

၂၀၀၉ ခုနှစ်တွင် ပါမောက္ခချန်း၏ မောင်ဖြစ်သူ ကွယ်လွန်သောအခါ ဈာပနကိစ္စအဝဝကို ကျန်းဝေကပင် စီစဉ်ဆောင်ရွက်ပေးခဲ့သည်။

ယင်းနောက် ၂၀၂၃ ခုနှစ်တွင် ပါမောက္ခချန်း ကွယ်လွန်သွားခဲ့သည်။

ပါမောက္ခချန်းတို့ မောင်နှမနှစ်ဦးလုံး ကွယ်လွန်သွားချိန်တွင် ကျန်းဝေက အဆိုပါတိုက်ခန်း ပိုင်ဆိုင်မှုကို သူ၏အမည်သို့ ပြန်ပြောင်းရန် စီစဉ်ခဲ့သည်။

သို့သော် အခြားပြည်နယ်တစ်ခုတွင် နေထိုုင်သော ပါမောက္ခချန်း၏ တူ ၂ ဦးက လက်မခံခဲ့။

ကျန်းဝေက ထိုသူ ၂ ဦးကို ပြောခဲ့သည်မှာ အဆိုပါအခန်းမှာ မိမိငွေဖြင့် ဝယ်ယူပေးခဲ့ခြင်းဖြစ်ပြီး အိမ်ထောင်စုစာရင်း မှတ်ပုံတင်ရ လွယ်ကူစေရန် ပါမောက္ခချန်း၏ အမည်ဖြင့် ထားရှိခဲ့ခြင်းဖြစ်ကြောင်း ပြောပြသည်။

ထို့အပြင် ပါမောက္ခချန်းထံသို့ ထိုသူ ၂ ဦးမှာ မလာသလောက်နီးပါးရှိခဲ့သည်ကိုလည်း ထောက်ပြသည်။

(▲ ပါမောက္ခချန်း ကွယ်လွန်ချိန်တွင် ကျန်းဝေက တိုက်ခန်းကို သူ၏အမည်ပေါက် ပြန်ပြောင်းရန် စီစဉ်ခဲ့သည်။ သို့သော် ပါမောက္ခချန်း၏ တူတော်စပ်သူ ၂ ဦးက တိုက်ခန်းကို တောင်းခံနေခဲ့သည်။ ဓာတ်ပုံ-Weixin)

ထို့ကြောင့်ကျန်းဝေက ရှန်ဟိုင်းမြို့ရှိ Changning ခရိုင် ပြည်သူ့တရားရုံးတွင် မိမိသာ အဆိုပါတိုက်ခန်းကို ပိုင်ဆိုင်ခွင့်ရှိသူဖြစ်ကြောင်း တရားစွဲခဲ့သည်။

လက်ရှိအားဖြင့် အမှုစစ်ဆေးနေဆဲ ဖြစ်သည်။

“ဒီအိမ်ဟာ ဘိလပ်မြေတွေ၊ ကြွေပြားတွေနဲ့ ဖွဲ့စည်းထားတဲ့ ရုပ်ဝတ္ထုသက်သက်မကပါဘူး။ နှစ်ပေါင်း ၄၀ စာ အမှတ်ရစရာတွေ ရှိတဲ့နေရာပါ။ ကျွန်မအတွက် တရားမျှတတဲ့ တရားစီရင်မှု မရဘူးဆိုရင် ကျွန်မဟာ ငွေသာ ဆုံးရှုံးရမှာမဟုတ်ဘဲ လူ့ကျင့်ဝတ်နဲ့ စိတ်ချယုံကြည်အပ်နှံမှုတွေအပေါ် ယုံကြည်ချက်လည်း ဆုံးရှုံးရမှာ ဖြစ်ပါတယ်”

Shanghai Media Group က အဆိုပါအမှုအကြောင်းကို သတင်းဖော်ပြခဲ့ရာ လူမှုကွန်ရက် သုံးစွဲသူတို့အကြား များစွာအမျက်ဒေါသထွက်မှုများ ဖြစ်ခဲ့ကြသည်။

လူမှုကွန်ရက်သုံးစွဲသူတစ်ဦးက မှတ်ချက်ပေးသည်မှာ “တကယ့်ကြေကွဲစရာ။ အဲဒီ တူနှစ်ယောက်က ကျန်းရဲ့ နှစ်ပေါင်းများစွာ ပြုစုစောင့်ရှောက်ပေးခဲ့မှုအပေါ် ကျေးဇူးလည်း မတင်ကြဘူး။ သူတို့လိုချင်နေတဲ့ဟာက သူတို့ဟာမှ မဟုတ်တာ။ ရှက်ဖို့ကောင်းလိုက်တာ” ဟု ဆိုသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: ‘Shameful’: China woman buys flat for old professor she cares for, family claims property Photo Credit-Weixin