ပြည်ပ အိမ်ခြံမြေ သတင်း | Posted by စည်သူအောင်
အမေရိကန်ပြည် လူဝီစီယားနားပြည်နယ်တွင် အမျိုးသမီးကြီးတစ်ဦးသည် မိသားစု ရာစုနှစ်ချီကာ ပိုင်ဆိုင်ခဲ့ သော မြေကွက်တစ်ခု အမည်ပေါက် ပြန်လည် ရရှိရန် အပြင်းအထန် ကြိုးစားနေရသည်။
လိမ်လည်ခံရသော အမျိုးသမီးကြီး၏ အမည်မှာ ဒါနီတာ ဘာတစ်စတီ (DaNita Batiste) ဖြစ်သည်။
လူလိမ်တို့က ဘာတစ်စတီ၏ မှတ်ပုံတင်အတုဖြင့် လိမ်လည် ရောင်းချခဲ့ရာတွင် ဝယ်လက်တို့က သံသယမရှိဘဲ ငွေသားဖြင့် ပေးချေကာ ဝယ်ယူသွားခဲ့ခြင်း ဖြစ်သည်။
ယခုဖြစ်ရပ်မှာ နိုင်ငံတကာ ရာဇဝတ်ဂိုဏ်းတစ်ခုနှင့် ဆက်စပ်မှုရှိနိုင်ကြောင်း ရဲတပ်ဖွဲ့က ယူဆနေသည်။
ဘာတစ်စတီသည် အသက် ၅၀ ကျော် အရွယ်ရှိပြီး တက္ကဆပ်ပြည်နယ်တွင် နေထိုင်သူ ဖြစ်သည်။
လော့စ်အိန်ဂျလိမြို့ Lake Charles အရပ်ရှိ လိမ်လည်ခံရသော ယခုမြေကွက်ကို မိခင်ကြီး မကွယ်လွန်မီ ၂၀၂၀ ပြည့်နှစ်အတွင်း အမွေရခဲ့ခြင်း ဖြစ်သည်။
“ဒီမြေကွက်ကို ကျွန်မတို့ မိသားစု ဆွေစဉ်မျိုးဆက် ပိုင်ဆိုင်ခဲ့တာ ဖြစ်ပါတယ်။ နှစ်ပေါင်း ၂၀၀ ဒါမှမဟုတ် ဒါ့ထက် ရှေးကျနိုင်ပါတယ်”ဟု ဘာတစ်စတီက Realtor အိမ်ခြံမြေ သတင်းဝက်ဘ်ဆိုက်သို့ ပြောသည်။ မြေကွက်ပေါ်ရှိ နေအိမ်မှာ လော်ရာ ဟာရီကိန်းမုန်တိုင်းကြောင့် ပျက်စီး သွားခဲ့သည်။
ဘာတစ်စတီက ဝင်ငွေရလမ်းရှိစေရန် ထိုမြေကွက်တွင် အငှားနေအိမ် ဆောက်လုပ်ရန် စီစဉ်ခဲ့သည်။
သို့သော် တစ်လလျှင် ၂ ကြိမ် လူငှားဖြင့် မြက်ရိတ်ခြင်းမှလွဲပြီး အိမ်မဆောက်ဖြစ်။
ထိုမြေကွက်အတွက် အိမ်ခြံမြေအခွန်ကို နှစ်စဉ်ပေးဆောင်ရသည်။ မြေနေရာ ဝယ်ယူရန် ကမ်းလှမ်းသူများ ရှိသော်လည်း ဘာတစ်စတီက မည်သည့်အခါမှ မရောင်းကြောင်း ပြောခဲ့သည်။
နောင်တချိန်တွင် သားသမီးများအား အမွေပေးရန် ရည်မှန်းထားခဲ့သည်။
(လူဝီစီယားနားပြည်နယ်နေ ဘာတစ်စတီအမည်ရှိ အမျိုးသမီးကြီး၏ မြေကွက် လိမ်လည် ရောင်းချခံခဲ့ရသည်။ ဓာတ်ပုံ-Timmy Tim Tim)
ပြီးခဲ့သော ဒီဇင်ဘာလက အိမ်ခြံမြေအခွန်ပေးဆောင်ရန် အွန်လိုင်းမှတဆင့် လုပ်ဆောင်ခဲ့ရာတွင် သူ၏ မြေကွက်မှာ ကန်ဒေါ်လာ ၄၅,၀၀၀ ဖြင့် အရောင်းအဝယ် ဖြစ်ထားသည်ကို တုန်လှုပ်စွာ တွေ့လိုက်ရသည်။
ငွေသားဖြင့် ပေးချေ ဝယ်ယူသွားသူမှာ လူဝီစီယားနား အခြေစိုက် Live Oak Insurance ကုမ္ပဏီမှ ဖြစ်သည်။
ထိုအခါ ဘာတစ်စတီက ထိုကုမ္ပဏီ၏ စီအီးအို Andrew David Hankins ထံ ဆက်သွယ် မေးမြန်းခဲ့သည်။
Andrew က ပြောသည်မှာ လိမ်လည်ရောင်းချသွားသူကို ဘာတစ်စတီဟု မှတ်ထင်ခဲ့ကြောင်း ပြောသည်။
ဘာတစ်စတီနှင့်အင်ဒရူးတို့က ယခုဖြစ်ရပ်ကို ရဲတပ်ဖွဲ့ထံ တိုင်တန်းခဲ့ကြသည်။
ကံကောင်းသည်မှာ အသိမြန်သောကြောင့် အရောင်းအဝယ် ငွေပေးချေထားသည့် ဒေါ်လာ ၄၅၀၀၀ ရှိနေသော ဘဏ်စာရင်းကို အာဏာပိုင်တို့က ထိန်းချုပ်နိုင်ခဲ့သည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Woman reveals how property was stolen in identity theft real estate scam with ties to international crime ring (realtor)