ဘာရိန်းအခြေစိုက် ဘဏ္ဍာရေးအတိုင်ပင်ခံကုမ္ပဏီ Investcorp က အမေရိကန်ပြည်ထောင်စုရှိ နယူးယောက်၊ ကယ်လီဖိုးနီးယားနှင့် နီဗားဒါးပြည်နယ်တို့တွင် ကန်ဒေါ်လာ သန်း ၄၀၀ ဖိုးအိမ်ခြံမြေဝယ်ယူရန် စာချုပ်ချုပ်ဆိုလိုက်ကြောင်း ယင်းကုမ္ပဏီက ထုတ်ပြန်ကြေညာ သည်ဟု အရှေ့အလယ်ပိုင်းအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
ဝယ်ယူလိုက်သည့် အဆောက်အအုံ ၃ ခုလုံးမှာ အားကောင်းသည့်ဈေးကွက်များတွင်ရှိသည်ဟု ကုမ္ပဏီ၏ ထုတ်ပြန်ချက်တွင် ဖော်ပြသည်။
ထို့အပြင် Investcorp အနေဖြင့် အမေရိကန်အိမ်ခြံမြေဈေးကွက်အပေါ် ယုံကြည်မှုရှိကြောင်းလည်း ဖော်ပြထားသည်။
Investcorp ၏ အမှုဆောင်ဥက္ကဌ မိုဟာမက် အလာဒီက ပြောကြားရာတွင် “အမေရိကန်စီးပွားရေးဟာ သိသာတဲ့တိုးတက်မှုတွေ ရှိနေတယ်လို့ ကျွန်တော်တို့ ယုံကြည်ပါတယ်။
အမေရိကမှာ ကာလကြာရှည် ရင်းနှီးမြှုပ်နှံခဲ့တဲ့ သမိုင်းကြောင်း ကျွန်တော်တို့မှာ ရှိပါတယ်။
လွန်ခဲ့တဲ့ ၁၈ လအတွင်း အမေရိကအိမ်ခြံမြေဈေးကွက်မှာ ကန်ဒေါ်လာ ၁ ဒသမ ၂ ဘီလီယံဖိုး ရင်းနှီးမြှုပ်နှံခဲ့ပြီး ဖြစ်ပါတယ်။
ဒါက အမေရိကအိမ်ခြံမြေဈေးကွက်အပေါ် ကျွန်တော်တို့ရဲ့ ယုံကြည်ချက်ကို ပြသနေတာလည်း ဖြစ်ပါတယ်” ဟု ဆိုသည်။
Investcorp မှ ဝယ်ယူခဲ့သည့် အဆောက်အအုံများမှာ နယူးယောက်ပြည်နယ်၊ ဘဲလ်ပေါ့ထ်ရှိ လူနေခန်း ၇၉၅ ခန်းပါ Atlantic Point၊ ကယ်လီဖိုးနီးယားပြည်နယ်၊ ဂရန်း တာရေ့စ်ရှိ လူနေခန်း ၅၅၆ ခန်းပါ The Highlands နှင့် နီဗားဒါးပြည်နယ်၊ ဟန်ဒါဆန်ရှိ လူနေခန်း ၆၀၉ ခန်းပါ Green Valley တို့ရှိ အခန်းများ ဖြစ်ကြသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
