ဘဏ်အချင်းချင်းအကြား အရောင်းအဝယ် ပြုလုပ်သည့် Interbank Market အတွင်း အမေရိကန်ဒေါ်လာ ကြိုရောင်းကြိုဝယ် စနစ်ဖြင့် အရောင်းအဝယ်လုပ်ခြင်းကို ဗဟိုဘဏ်က ခွင့်ပြုထားသော်လည်း နည်းပညာ လိုအပ်ချက်ကြောင့် မလုပ်ကိုင်နိုင်သေးကြောင်း ပုဂ္ဂလိကဘဏ်များမှ တာဝန်ရှိသူများက ပြောကြားသည်။
ငွေကြေးများ အလဲအလှယ် လုပ်ရာတွင် ဒေါ်လာဈေး အတက်အကျ ကြမ်းသည့်အခါ ဘဏ်များအနေနှင့် ဆုံးရှုံးနစ်နာမှုကို ကာကွယ်နိုင်စေရန် ကြိုရောင်းကြိုဝယ် စနစ်ကို ခွင့်ပြုသော်လည်း ဘဏ်ကြီးအချို့သာ လုပ်ကိုင်နိုင်သေးကြောင်း မြန်မာအရှေ့တိုင်းဘဏ်၏ ဥက္ကဋ္ဌဟောင်း ဦးမြသန်းက ပြောဆိုသည်။
“ကြိုရောင်းကြိုဝယ်တယ် ဆိုတာ စာချုပ်တစ်ခုလိုပဲ။ တစ်ဘဏ်နဲ့တစ်ဘဏ် သုံးလအတွင်း ဒေါ်လာရောင်းပြီး ကျပ်ငွေဝယ်တဲ့အခါ သူ့သတ်မှတ်ချိန်ရောက်ရင် ဒေါ်လာဈေး ဘယ်လောက်တက်တက် ကျကျ စာချုပ်ပါ နှုန်းထားအတိုင်းပဲ ရောင်းဝယ်တာ။ လက်ရှိမှာ ဘဏ်အချင်းချင်း ရောင်းတဲ့ နိုင်ငံခြားငွေဈေးကွက်က မဖွံ့ဖြိုးသေးတော့ စနစ်စဖို့ မဖြစ်နိုင်တာ” ဟု ၎င်းက ရှင်းပြသည်။
ယခင်က ဘဏ်အချင်းချင်း ရောင်းဝယ်သည့် ဈေးကွက်တွင် ပေါက်ဈေးအတိုင်း ရောင်းဝယ်နေသောကြောင့် ငွေကြေးလည်ပတ်ရာတွင် အခက်အခဲ ဖြစ်လာ၍ ပြီးခဲ့သည့်လမှ စတင်ကာ ကြိုရောင်းကြိုဝယ် စနစ်ကို ဗဟိုဘဏ်က ခွင့်ပြုခဲ့ကြောင်း ကမ္ဘောဇဘဏ်မှ တာဝန်ရှိသူတစ်ဦးက ပြောကြားသည်။
“ဒီစနစ်ကို လုပ်မယ်ဆိုရင် ဘဏ်တွေအားလုံး လုပ်မှဖြစ်မယ်။ တစ်ဘဏ်က လုပ်ပြီး တစ်ဘဏ်က မလုပ်ရင် စနစ်ကို သုံးလို့မရဘူး။ ဘဏ်ကြီးတွေက နည်းပညာ ကောင်းကောင်းနဲ့ စနိုင်ပေမယ့် ဘဏ်ငယ်တွေက မလိုက်နိုင်တော့ အခုချိန်အထိ ကြိုရောင်းကြိုဝယ် စနစ်ကို မသုံးကြဘူး” ဟု ၎င်းက ဆိုသည်။
လက်ရှိ ဒေါ်လာအတက်အကျ ကြမ်းနေစဉ်တွင် ကြိုရောင်းကြိုဝယ်စနစ်ကို ခွင့်ပြုပေးသည့်အပြင် ပုဂ္ဂလိကဘဏ် အချင်းချင်း နိုင်ငံခြားငွေ ရောင်းဝယ်သည့် ဈေးကွက် (Interbank Market) အတွင်းရှိ ရည်ညွှန်း နိုင်ငံခြားငွေ လဲလှယ်နှုန်း ဘောင်ပြင်ဆင်ရေးကို ဗဟိုဘဏ်က စဉ်းစားပေးသင့်ကြောင်း ဘဏ်လုပ်ငန်းရှင်များက ပြောဆိုသည်။
Credit: The Voice
