ပြည်ပ အိမ်ခြံမြေ သတင်း | Posted by နှင်းအိခင်
အင်္ဂလန်တွင် စုံတွဲတစ်တွဲသည် ပင်လယ်ကမ်းခြေရှိ အများသုံးအိမ်သာတစ်ခုကို လူနေအိမ်အဖြစ် ပြောင်းလဲမွမ်းမံလိုက်ပြီးနောက် ယခုအခါ ဝယ်လက်ရှာဖွေလျက်ရှိနေသည်။ လူနေအိမ်အဖြစ် ပြောင်းလဲရာတွင် အခက်အခဲများစွာ ရင်ဆိုင်ခဲ့ရသောကြောင့် ၎င်းတို့စုံတွဲက သောကဆယ်စုနှစ်ဟု ရည်ညွှန်းပြောဆိုခဲ့သည်။
အိမ်သာမှ လူနေအိမ်အဖြစ် ပြောင်းလဲပြီးနောက် ယခုအခါ ဒေါ်လာ ၃၇၂၀၀၀ ဈေးခေါ်ကာ ရောင်းချရန် စီစဉ်နေသည်။
(နေအိမ်အဖြစ် ပြောင်းလဲရသည်မှာ ကုန်ကျစရိတ်များပြီး စိတ်ပင်ပန်းခဲ့သော်လည်း ရင်းနှီးမြှုပ်နှံခဲ့ရသည်မှာ ထိုက်တန်ကြောင်း ၎င်းတို့ ဇနီးမောင်နှံက ပြောသည်။ ဓာတ်ပုံ-Fine & Country)
Elaine နှင့် Alan Taylor တို့စုံတွဲက ဝေလပြည်နယ်၊ Barmouth ရှိ အများသုံးအိမ်သာကို ၂၀၁၅ ခုနှစ်အတွင်း လေလံဆွဲကာ ဝယ်ယူခဲ့ခြင်းဖြစ်ကြောင်း WalesOnline သတင်းဌာနက ဖော်ပြသည်။
Elaine တို့စုံတွဲက ဒေါ်လာ ၃၈၀၀၀ ပေးကာ လေလံဆွဲခဲ့ခြင်းဖြစ်ပြီး ပင်လယ်ကမ်းခြေအိမ်အဖြစ် ပြောင်းလဲရန်အတွက် ဒေါ်လာ ၃၂၈၀၀၀ ခန့် ထပ်မံကုန်ကျခဲ့သည်။
(နေအိမ်မှာ ကျယ်ကျယ်ဝန်းဝန်းရှိကာ ဆိတ်ငြိမ်အေးချမ်းသည်။ ယခင်က အများသုံးအိမ်သာဖြစ်ခဲ့ဖူးသော မြင်ကွင်းနှင့် ခြားနားသွားပြီ ဖြစ်သည်။ ဓာတ်ပုံ-Fine & Country)
Elaine တို့စုံတွဲသည် Barmouth တွင် အပန်းဖြေခရီးရောက်ရှိနေစဉ် အသုံးမပြုတော့သောအဆိုပါ အိမ်သာကို ရောင်းချမည်ဟူသည့် ဆိုင်းဘုတ်ကပ်ထားသည်ကို တွေ့ခဲ့ခြင်း ဖြစ်သည်။
“ဒါက အံ့ဖွယ်ကောင်းတဲ့နေရာတစ်ခုဖြစ်လာမယ်လို့ ကျွန်မတို့ ယူဆခဲ့ပါတယ်။ ဘာကြောင့်လဲဆိုတော့ ဒီနေရာက သဲသောင်ခုံ၊ ပင်လယ်နဲ့လည်း နီးတယ်။ ပြုပြင်လိုက်မယ်ဆိုရင် ဒီနေရာဝန်းကျင်အတွက် အသုံးမပြုတော့တဲ့၊ တန်ဖိုးထားခြင်းမခံရတော့တဲ့အရာတစ်ခုကို တကယ်ကောင်းမွန်တဲ့အရာအဖြစ် ပြောင်းလဲပေးနိုင်မယ်လို့ ယူဆခဲ့ပါတယ်” ဟု Elaine က WalesOnline သတင်းဌာနသို့ ပြောသည်။
(Elaine နှင့် Alan တို့စုံတွဲက စွန့်ပစ်ခံ အများသုံးအိမ်သာကို ၂၀၁၅ ခုနှစ်အတွင်း လေလံဆွဲ ဝယ်ယူခဲ့ခြင်း ဖြစ်သည်။ ဓာတ်ပုံ-Google Maps)
အဆိုပါ အိမ်သာမှာ Elaine တို့ မဝယ်မီ နှစ်ပေါင်းများစွာကတည်းက အသုံးမပြုတော့ဘဲ ပိတ်သိမ်းထားခဲ့ခြင်း ဖြစ်သည်။
အတွင်းပိုင်းမှာ အနံ့အသက်ဆိုးရွားပြီး ဖုန်ထုများ တက်နေသည်ကို တွေ့ခဲ့သည်။ နေအိမ်အဖြစ် ပြောင်းလဲရန် စီမံကိန်းခွင့်ပြုချက် ရရှိပြီးနောက် ၂၀၁၆ ခုနှစ်တွင် စီမံကိန်းစတင်ခဲ့သည်။
သို့သော် စာသင်ကျောင်းတစ်ခုနှင့် နီးကပ်မှုကြောင့် ပြီးခဲ့သော နွေရာသီရောက်ချိန်အထိ ဆောက်လုပ်ရေးလုပ်ငန်းများ ရပ်ဆိုင်းထားခဲ့ရသည်။
(ပင်လယ်ကမ်းခြေကို တွေ့မြင်ရသော မီးဖိုဆောင်။ ဓာတ်ပုံ-Fine & Country)
(နားနေခန်း။ ဓာတ်ပုံ-Fine & Country)
(အများသုံးအိမ်သာအဖြစ်မှ အိပ်ခန်းတစ်ခန်းပါ နေအိမ်အဖြစ်သို့ ပြောင်းလဲသွားသည်။ ဓာတ်ပုံ-Fine & Country)
(ရုံးပိတ်ရက်များတွင် အနားယူနိုင်မည့် နွေးထွေးသောအိပ်ခန်း။ ဓာတ်ပုံ-Fine & Country)
လက်ရှိအချိန်တွင် Elaine တို့စုံတွဲမှာ ဘဝအခြေအနေ အပြောင်းအလဲများရှိလာသောကြောင့် နေအိမ်ကို ပြန်လည်ရောင်းထုတ်ရန် ဆုံးဖြတ်လိုက်ရသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: We turned a stinky public bathroom into our dream beach house — now we’re selling it for nearly $400K
Photo Credit- Fine & Country