အချို့သူတို့သည် ကျယ်ဝန်းသည့် နေအိမ်ကို သဘောကျ၏။
အချို့က ပရိဘောဂစုံလင်မှုကို နှစ်သက်၏။
အချို့ကမူ မြို့ပြမြင်ကွင်းများကို ရှုမြင်လို၏။
အချို့မူကား နေအိမ်အနီးဝန်းကျင်မြင်ကွင်းများကိုသာ တွေ့မြင်လို၏။
အင်ဂျလီနာဂျိုလီကမူ ရိုးရာယဉ်ကျေးမှုထဲတွင် ပျော်ဝင်နိုင်မည့် နေရာမျိုးကို နှစ်ခြိုက်လေသည်။
ထို့ကြောင့် ကမ္ဘောဒီးယားနိုင်ငံသို့ ရောက်လျှင် Zannier အပန်းဖြေစခန်းကို သူ၏ခေတ္တနေအိမ်အဖြစ် ရွေးချယ်ခြင်း ဖြစ်သည်။
Zannier အပန်းဖြေစခန်း တည်ထောင်သူ အာနော့ ဇာနီရာက အင်ဂျလီနာဂျိုလီတို့ ယခင်လာရောက်နေထိုင်ခဲ့ပုံ အဖြစ်အပျက်ကလေးတစ်ခုကို ပြန်ပြောင်းပြောပြသည်။
ဂျိုလီနှင့် သူ၏ကလေးငယ်များသည် ဟိုတယ်ဝန်းအတွင်းတည်းခိုရမည့် အဆောက်အအုံနှင့် ပတ်ဝန်းကျင်ကို တွေ့မြင်လိုက်သည်နှင့် အလွန်သဘောကျပျော်ရွှင်သွားသည်ဟု ဆိုသည်။
ဂျိုလီ၏ ကလေးများအနက်တစ်ဦးဖြစ်သော ရှီလိုသည် ပန်းဥယျာဉ်အတွင်း၌ တဲထိုးဆော့ကစားခဲ့သည်ဟု ဇာနီရာက ပြန်လည်ပြောပြသည်။
ဂျိုလီက Zannier သည် ကမ္ဘောဒီးယားတွင် အကောင်းဆုံးနေရာတစ်ခုဖြစ်ပြီး ငြိမ်းချမ်းမှု၊ တည်ငြိမ်မှု၊ စည်းလုံးမှုကို လိုလားသူများ နေထိုင်ရာဖြစ်ကြောင်း ပြောကြားသည်။
Zannier သည် သဘာဝကျေးရွာဆန်ဆန်ဆောက်လုပ်ထားခြင်းဖြစ်ပြီး ကြယ်ငါးပွင့်အဆင့် အပန်းဖြေစခန်း ဖြစ်သည်။
ဂျိုလီအနှစ်ခြိုက်ဆုံးမှာ ဟိုတယ်ဝန်းအတွင်း ပူးတွဲပါဝင်သော စပါးခင်းများ ဖြစ်သည်။
ယင်းစပါးကွင်းများတွင် လယ်သမားပေါင်းများစွာ အလုပ်လုပ်နေပုံကို အနီးကပ်တွေ့မြင်နိုင်သည်။
၈ ဧက ကျယ်ဝန်းသော အပန်းဖြေစခန်းတွင် သဘာဝအဆင်တန်ဆာများဖြစ်သော ကျောက်တုံးနှင့် သစ်ပင်အုပ်များ များပြားစွာ ပါဝင်လေသည်။
အပန်းဖြေစခန်းရှိ အဆောက်အအုံအားလုံးကို ကမ္ဘောဒီးယားဗိသုကာဖြင့် ဆောက်လုပ်ထားပြီး စုစုပေါင်း အဆောက်အအုံ ၄၅ လုံး ပါဝင်သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
