မဟာရန်ကုန်နှင့် မန္တလေးရွှေမြို့တော်အတွင်းရှိ အိမ်ခြံမြေများနှင့်စပ်လျဉ်း၍ လျှောက်ထားဆောင်ရွက်ရန် နည်းလမ်းများ

စကားချီး။ ။ စာရေးသူသည် အိမ်ခြံမြေနှင့် စပ်လျဉ်း၍ ရောင်းဝယ်/ပေးကမ်း/လွှဲ ပြောင်းလိုသူများအတွက် စာချုပ်စာတမ်း မှတ်ပုံတင်လုပ်ငန်းအကြောင်း သိကောင်းစရာများနှင့် “ ယင်းအိမ်ခြံမြေများအား မိမိ၏ အမည်ပေါက်ပိုင်ဆိုင်ရေးအတွက် ဆက်လက်ဆောင်ရွက်သင့်သောလုပ်ငန်းများ ” အကြောင်းကို မြန်မာတိုင်းမ်နေ့စဉ်၌ ရေးသားတင်ပြပြီးဖြစ်ပါသည်။ ယခုတစ်ဖန် လုပ်သားပြည်သူများ လိမ်လည်ခံရခြင်းမှ ကာကွယ်နိုင်ရန်အတွက် သိသင့်သိထိုက်သော အချက်များအား ထပ်မံ၍ အသိပေး မျှဝေတင်ပြအပ်ပါသည်။

မြေနှင့်အိမ်ဝယ်ယူရန် စရန်ငွေပေးချေခြင်း

* ရှေးဦးစွာ ဂရန်မြေရောင်းချသူထံမှ “ဂရန်မှန်ကန်မှုရှိလျှင်ဝယ်ပါမည်” ဟု စကားခံပြီးမှ ဈေးဆစ်သင့်ပါသည်။

* ဈေးတည့်သည်နှင့်တစ်ပြိုင်နက် ဂရန်မိတ္တူတောင်း၍ မြို့တော်စည်ပင်သာ ယာရေးကော်မတီ၊ မြို့ပြစီမံကိန်းနှင့် မြေစီမံခန့်ခွဲရေးဌာန၌ မှန်/မမှန် တရားဝင် စစ်ဆေးသင့်ပါသည်

* စရန်ငွေမပေးချေမီ ဂရန်မူရင်းကို ကြည့်ရှုခွင့် တောင်းဆိုသင့်ပါသည်

* ထုံးစံအတိုင်း သတင်းစာတွင် ကြော်ငြာခွင့်ပြုပါဟုပြောဆိုပြီး စရန်ငွေကို ပေးချေသင့်ပါသည်

* စရန်ငွေပေးချေပြီးလျှင်ပြီးချင်း သတင်းစာ၌ ကြော်ငြာရန်မမေ့ပါနှင့်

မြေနှင့်အိမ်အတွက် ငွေအပြေအကျေပေးချေခြင်း

အောက်ဖော်ပြပါစာရွက်စာတမ်း၊ မြေပုံအထောက်အထားများရရှိမှသာ ငွေအပြေအကျေပေးချေရန် လိုအပ်ပါသည်။

* အရောင်းအဝယ်ပြုလုပ်ရန်အတွက် တစ်နှစ်အတွင်း ရေးကူးထားသော မြေပုံနှင့် မြေရာဇဝင်

* မှတ်ပုံတင်စာချုပ်ချုပ်ဆိုရန် အဆင်ပြေ ချောမွေ့စေမည့်သူ၏ နာမည်ဖြင့် လွှဲပြောင်းပေးထားသည့် အထူးကိုယ်စားလှယ်လွှဲစာ (Special Power)

* မူရင်းဂရန်နှင့် ရေ၊ မီးတို့အတွက် ပါမစ် (Permit) များ

* ကျူးကျော်မှု (ပစ္စည်း၊လူ) ကင်းရှင်းရမည့် မြေနှင့်အိမ်ဖြစ်ရမည်

(မှတ်ချက်)

ထိုလေးမျိုးကို စရန်ပေးစာချုပ်တွင် ထည့်သွင်းရေးသား၍ နှုတ်ဖြင့်လည်း သိသာအောင်ပြောဆိုထားရပါမည်။

စာချုပ်စာတမ်းမှတ်ပုံတင်ရုံးနှင့် ဆက်သွယ်ဆောင်ရွက်ခြင်း

မြေနှင့်အိမ်ကို တရားဝင်ဝယ်ယူလိုပါက ရန်ကုန်၊ မန္တလေး မြို့တော် စာချုပ်စာတမ်း မှတ်ပုံတင်ဌာနမှူးရုံး (လယ်ယာမြေ စီမံခန့်ခွဲရေးနှင့် စာရင်းအင်းဦးစီးဌာန) တွင် မုချစာချုပ်ချုပ်ဆို မှတ်ပုံတင်ရပါမည်။ ထိုရုံးသို့ သွားရောက်သည့်အခါ အောက်ပါ ပုဂ္ဂိုလ်နှင့် စာရွက်စာတမ်းများအား မဖြစ်မနေ ယူဆောင်သွားရမည်ဖြစ်ပါသည်။

* ရောင်းချသူ သို့မဟုတ် ၄င်း၏ အထူးကိုယ်စားလှယ်လွှဲစာ ရရှိထားသူ

* ဝယ်ယူသူ သို့မဟုတ် ၄င်း၏ အထူးကိုယ်စားလှယ်လွှဲစာ ရရှိထားသူ

* ပြည်တွင်းအခွန်ဦးစီးဌာန၊ ကာလတန်ဖိုး စိစစ်သတ်မှတ်ရေးအဖွဲ့၏ ရာပြတ်တန်ဖိုးအတိုင်း ငါးရာခိုင်နှုန်း အခွန်တော်တံဆိပ်ခေါင်း ကပ်နှိပ်ထားပြီးသော အရောင်း/အဝယ်စာချုပ်

* ယင်းစာချုပ်တွင် လက်မှတ်ရေးထိုးမည့် အသိသက်သေနှစ်ဦး

* ရောင်းချသူ၊ ဝယ်ယူသူနှင့် အသိသက်သေနှစ်ဦးတို့၏ မှတ်ပုံတင်မူရင်းနှင့်မိတ္တူများ

* တစ်နှစ်အတွင်းရေးကူးထားသည့် အရောင်းအဝယ်ပြုလုပ်မည့်မြေအတွက် မြေပုံ/မြေရာဇဝင်

(မှတ်ချက်)

အထက်ပါအချက်ခြောက်ချက် ပြည့်စုံလျှင် တစ်ကြိမ်တစ်ရက်တည်းဖြင့် ပြီးဆုံးအောင်မြင်ပါမည်။

မြို့နယ်အခွန်ဦးစီးဌာနနှင့် ဆက်သွယ်ဆောင်ရွက်ခြင်း

အိမ်ခြံမြေအရောင်းအဝယ်/လွှဲပြောင်းခြင်းများအား ဥပဒေနှင့် ညီညွတ်မှန်ကန် အောင်/ဘောင်ဝင်အောင် ပြုလုပ်လိုပါက ပြည်တွင်းအခွန်ဦးစီးဌာနနှင့် ဆက်သွယ်ရန် အထူးလိုအပ်ပါသည်။

* စာချုပ်စာတမ်းမှတ်ပုံတင်ရုံးတွင် စာချုပ်ချုပ်ဆို မှတ်ပုံတင်နိုင်ရန်အတွက် ကာလတန်ဖိုး စိစစ်သတ်မှတ်ရေးအဖွဲ့မှ ရာပြတ်တန်ဖိုး၏ ငါးရာခိုင်နှုန်းနှင့် ဝင်ငွေရလမ်း မဖော်ပြနိုင်သော ငွေအတွက် ၁၅ ရာခိုင်နှုန်း (သို့) ၂၀ ရာခိုင်နှုန်း (သို့) ၃၀ ရာခိုင်နှုန်းပေးဆောင်ရန် သက်ဆိုင်ရာမြို့နယ် အခွန်ဦးစီးဌာနသို့ သွားရောက်ရပါမည်။

* သက်ဆိုင်ရာမြန်မာ့စီးပွားရေးဘဏ်တွင် ချလန်ဖြင့် ငွေပေးသွင်းပြီးမှသာ ငါးရာခိုင်နှုန်း အခွန်တော်တံဆိပ်ခေါင်းများ ရရှိပါ မည်။

မြို့တော်စည်ပင်သာယာရေးကော်မတီသို့လျှောက်ထားဆောင်ရွက်ရမည့်အချက်များ

(က) မြေပုံ/မြေရာဇဝင် ရေးကူးပေးရန် လျှောက်ထားခြင်း

* အဆောက်အအုံသစ်ဆောက်လုပ်ခြင်း၊ ဘဏ်ငွေချေးခြင်း၊ အရောင်းအဝယ် စာချုပ်ချုပ်ဆိုခြင်း၊ အမွေဆက်ခံခွင့်ကြော်ငြာခြင်း၊ မြေကွက်ခွဲဝေခြင်း/စွန့်လွှတ် စာချုပ်/အပိုင်ပေးစာချုပ်စသည့် ချုပ်ဆိုခြင်း၊ခြံစည်းရိုးကာရံခြင်း

* မြေကွက်ခွဲစိတ်ခြင်း၊ အဝီစိတွင်းတူးခြင်း၊ လှူဒါန်းခြင်း စာချုပ်မှတ်တမ်းတင်ထားရှိရန် ကိစ္စရပ်များ

* ကျူးလွန်ခြင်းပြမြေပုံ၊ ဌာနဆိုင်ရာတင်ပြရန် အမှားပြင်ခြင်း/ငှားရမ်းခြင်း/ ပေါင်နှံခြင်း/မြေကွက်လဲလှယ်ခြင်း/မိသားစုခွဲဝေခြင်း စာချုပ်များချုပ်ဆိုရန်နှင့် အခွန်လွတ်သာသနာမြေလျှောက်ထားရန်ကိစ္စရပ်များ

(မှတ်ချက်)

အထက်ပါကိစ္စရပ်များအတွက် ပိုင်ဆိုင်ကြောင်းအထောက်အထား၊ မှတ်ပုံတင်မိတ္တူနှင့် ဝန်ဆောင်ခကို ပေးသွင်း၍ မြို့ပြစီမံကိန်းနှင့် မြေစီမံခန့်ခွဲမှုဌာနမှပုံစံတွင် ရေးသွင်းလျှောက်ထားရပါမည်။

(ခ) ဂရန်ပိုင်ရှင်အမည်ပြောင်းလျှောက်ထားခြင်း

အောက်ပါစာရွက်စာတမ်းအထောက်အထားများနှင့်အတူ ပူးတွဲလျှောက်ထားရပါမည်။

* လျှောက်ထားသူ၏ နိုင်ငံသားစိစစ်ရေးကတ်ပြား (သို့) အမျိုးသားမှတ်ပုံ တင် မူရင်း + မိတ္တူ

* မြေငှားဂရန်မူရင်း

* လျှောက်ထားသူပိုင်ဆိုင်ကြောင်း မှတ်ပုံတင်စာချုပ် (သို့) လေလံအမိန့် (သို့) တရားရုံးမှ ထုတ်ပေးသော ပစ္စည်းဝယ်လက်မှတ်နှင့် အခွန်ထမ်းဆောင်ပြီးကြောင်း အထောက်အထားများ

* မြေခွန်ကြွေးကျန်ကင်းရှင်းကြောင်း (နောက်ဆုံး) ပြေစာ

(မှတ်ချက်)

(၁) ဌာနမှ သတ်မှတ်ထားသော လျှောက်လွှာပုံစံဖြင့်သာ လျှောက်ထားရပါမည်။

(၂) တရားရုံး၊ဘဏ်၊ အခွန်ဦးစီးဌာနတို့မှ ကန့်ကွက်မှုရှိ/မရှိ စစ်ဆေးပါမည်။

(ဂ) ဂရန်ခွဲလျှောက်ထားခြင်း

အောက်ပါစာရွက်စာတမ်းအထောက် အထားများနှင့်အတူ ပူးတွဲလျှောက်ထားရပါမည်။

နိုင်ငံသားစိစစ်ရေးကတ်ပြား (သို့) အမျိုးသားမှတ်ပုံတင်မိတ္တူ

* မူရင်းမြေငှားဂရန်စာချုပ်

* ဂရန်ခွဲရန်အတွက်ပိုင်ဆိုင်ကြောင်း မှတ်ပုံတင်စာချုပ် (သို့) တရားရုံးအမိန့်ဒီကရီ (သို့) မြေလွှဲပြောင်းအမိန့်စာ

* မြေငှားကြွေးကျန်ကင်းရှင်းကြောင်း (နောက်ဆုံး) ပြေစာ

* မြေကွက်ခွဲစိတ်အတည်ပြုပုံစံ ခွင့်ပြုချက်တစ်စုံ

* မြေကွက်ခွဲစိတ်တိုင်းတာသည့် မြေပုံတစ်ပုံ

(မှတ်ချက်)

(၁) သက်တမ်းမကုန်ဆုံးသေးသော ဂရန်များကိုသာ လျှောက်ထားနိုင်သည်။

(၂) မူလဂရန်၏ သက်တမ်းအတိုင်းသာ “ဂရန်ခွဲ” ထုတ်ပေးပါသည်။

Credit: ဆွေမြင့်သူ (ကြေး/မြေ)