ကမ္ဘောဒီးယားနိုင်ငံ၊ ဖနွမ်းပင်မြို့တွင်း ဝန်ကြီးချုပ် ဟွန်ဆန်၏နေအိမ်ရှေ့တွင် ၂၀၁၃ ခုနှစ်အတွင်း ဆန္ဒပြခဲ့ရာ၌ ရည်ရွယ်ချက်ရှိရှိ အကြမ်းဖက်မှုများပြုလုပ်ခဲ့သည်ဟူသော စွဲချက်ဖြင့် ကမ္ဘောဒီးယားနာမည်ကျော် မြေယာအရေးလှုပ်ရှားသူ အမျိုးသမီး တက်ပ် ဘန်နီကို ဖေဖော်ဝါရီ ၂၃ ရက်နံနက်ပိုင်းက ထောင်ဒဏ် ၂ နှစ်နှင့် ၆ လ ချမှတ်လိုက်ရာ ဘန်နီကို ထောက်ခံဝန်းရံသည့် တက်ကြွလှုပ်ရှားသူ များနှင့် ရဲတပ်ဖွဲ့ဝင်များ ထိပ်တိုက်တွေ့ဆုံမှုများ ဖြစ်ပေါ်ခဲ့ကြောင်း ဖနွမ်းပင်အခြေစိုက် အိမ်ခြံမြေသတင်းဝက်ဘ်ဆိုက် တစ်ခုတွင် ဖော်ပြသည်။
ပရမ်ပီ မာကာရာခရိုင်ရဲတပ်ဖွဲ့ဝင်များသည် ဖနွမ်းပင်မြူနီစပယ်တရားရုံးအပြင်ဘက်တွင် စုရုံးရောက်ရှိနေသော မြေယာအရေးလှုပ်ရှားသူ များနှင့် တက်ပ်ဘန်နီကို ထောက်ခံသူများအား တွန်းထိုးခြင်း၊ တရွတ်တိုက်ဆွဲခြင်းများ ပြုလုပ်ကာ လမ်း၏အခြားတစ်ဘက်သို့ တွန်းပို့ခဲ့ ကြသည်။
ဘိုအန်ကက်အရပ်မှ တက်ကြွလှုပ်ရှားသူ ၂ ဦးနှင့် ဘိုရိုင် ကိုင်လာဒေသမှ ကိုယ်ဝန်ဆောင်အမျိုးသမီးတစ်ဦးမှာ ထိခိုက်ဒဏ်ရာ အနည်းငယ် ရရှိသွားကြသည်။
မော်ဆိုချိအမည်ရှိ အငှားယာဉ်မောင်းတစ်ဦးကိုမူ ဆန္ဒပြသူများကို အကာအကွယ်ပေးရန် ကြိုးပမ်းသောကြောင့်ဟုဆိုကာ ရဲတပ်ဖွဲ့ဝင် ၆ ဦးခန့်က ပြေးလိုက်ခဲ့ကြပြီး အနီးရှိ ဈေးဝယ်စင်တာအတွင်းတွင် ဝိုင်းဝန်းရိုက်နှက်ခဲ့ကြသည်ဟု ဆိုသည်။
“တက်ပ်ဘန်နီကို ထောင်ကိုပို့မယ်ဆိုတာကြားလိုက်တော့ ကျွန်တော်တို့ရဲ့ ထောက်ခံအားပေးမှုကို ပြချင်ခဲ့တာဖြစ်ပါတယ်။ အာဏာပိုင်တွေက ဒါကိုမလိုလားတာကြောင့် ရိုက်နှက်ပြီး တရားရုံးနဲ့ဝေးရာကို နှင်ထုတ်ခဲ့တာပဲဖြစ်ပါတယ်” ဟု တက်ကြွလှုပ်ရှားသူ တစ်ဦးဖြစ်သူ ဆောင် စရိုင်လိက ပြောကြားသည်။
တရားသူကြီး လောင်ကီဆော် ပီရမ်က တက်ပ်ဘန်နီအား ပရေးဆာအကျဉ်းထောင်တွင် ထောင်ဒဏ် လပေါင်း ၃၀ ကျခံရန် အမိန့်ကြေညာလိုက်ချိန်တွင် တရားရုံးခန်းမ အမှတ် ၃ အတွင်း တက်ပ်ဘန်နီထောက်ခံသူများက ကြွေးကြော်သံများ သံပြိုင်ဟစ်အော် ခဲ့ကြသည်ဟု ဆိုသည်။
ထောင်ဒဏ်အပြင် တက်ပ်ဘန်နီကို ဒဏ်ငွေအဖြစ် ကမ္ဘောဒီးယားငွေ ၅ သန်း (ကန်ဒေါ်လာ ၁၂၄၀) နှင့် တရားလိုရဲတပ်ဖွဲ့ဝင် ၂ ဦးဖြစ်သော ဟောင်ဟိုအန်နှင့် အွတ်ရာတနာတို့နှစ်ဦးကို လျော်ကြေးအဖြစ် ကမ္ဘောဒီးယားငွေ ၉ သန်း (ကန်ဒေါ်လာ ၂၂၄၀) ပေးအပ်ရန်လည်း အမိန့်ချမှတ်ခဲ့သည်။
လုံခြုံရေးတပ်ဖွဲ့ဝင်တစ်ဦးကထွက်ဆိုရာတွင် ၂၀၁၃ ခုနှစ်၊ မတ်လ ၁၃ ရက်က ဆန္ဒပြမှုအတွင်း လူပေါင်း ၁၀၀ ခန့်ပါဝင်ခဲ့ကြကြောင်းနှင့် အာဏာပိုင်တို့အပေါ် အကြမ်းဖက်ကြရန် တက်ပ်ဘန်နီက အမိန့်ပေးသည်ကို ကြားလိုက်ရကြောင်း ထွက်ဆိုသွားကြသည်။
တရားခံ၏ရှေ့နေ ဆမ် ဆိုခွန်သီယာက လျှောက်လဲခဲ့ရာတွင် လုံခြုံရေးတို့၏ ထွက်ဆိုချက်တွင် အမှန်တရားမရှိကြောင်း၊ တရားလိုပြသက်သေတို့၏ထွက်ဆိုချက်များမှာ ယုံကြည်စိတ်ချဖွယ်မရှိကြောင်း၊ တရားစွဲဆိုသည့်အဖွဲ့နှင့် တရားလိုပြသက်သေတို့ အတူတူဖြစ်နေသည်မှာ ပူးပေါင်းကြံစည်မှုဖြစ်ဟန်ရှိကြောင်း ပြောကြားသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
