ပြည်ပ အိမ်ခြံမြေ သတင်း | Posted by နှင်းအိခင်
သြစတေးလျနိုင်ငံ၏မြို့တော် ကင်ဘာရာရှိ ပန်းဥယျာဉ်တစ်ခုတွင် အသားပုပ်ကဲ့သို့ ပုပ်အဲ့အဲ့အနံ့ဆိုးများ ထုတ်လွှတ်သော ရှားပါး ပန်းပွင့်ကြီးတစ်ပွင့် နှစ်ပေါင်းများစွာအတွင်း ပထမဆုံးအကြိမ် ပွင့်ဖူးလာရာ အများပြည်သူများအား ကြည့်ရှုခွင့်ပေးခဲ့သည်။
သိပ္ပံအမည် amorphophallus titanium ဟုခေါ်ပြီး လူသေကောင်ပန်းဟု လူသိများသော အဆိုပါပန်းသည် ကင်ဘာရာမြို့ရှိ သြစတေးလျ အမျိုးသားရုက္ခဗေဒဥယျာဉ်တွင် ၁၅ နှစ်တာအတွင်း ပထမဆုံးအကြိမ် ပန်းပွင့်လာခြင်း ဖြစ်သည်။
ပြီးခဲ့သော စနေနေ့တွင် ပန်းပွင့်ခဲ့ပြီး တနင်္လာနေ့တွင် ပြန်လည်ငုံသွားခဲ့ကြောင်း ပန်းဥယျာဉ်ဝန်ထမ်းတစ်ဦးက ပြောသည်။
ထို့အပြင် ဆစ်ဒနီမြို့ရှိ တော်ဝင်ရုက္ခဗေဒဥယျာဉ်တွင်လည်း ဇန်နဝါရီလကုန်ပိုင်းက လူသေကောင်ပန်းပွင့်ခဲ့ရာ လာရောက်ကြည့်ရှုသူ ၂၀,၀၀၀ ကျော် ရှိခဲ့သည်။
မဲလ်ဘုန်းမြို့ အနောက်တောင်ဘက်ရှိ Geelong ရုက္ခဗေဒဥယျာဉ်တွင်လည်း လွန်ခဲ့သော နိုဝင်ဘာလက လူသေကောင်ပန်းပွင့်ခဲ့ရာ လာရောက်ကြည့်ရှုသူ အလွန်များပြားခဲ့သည်။
(ကင်ဘာရာရှိ ရုက္ခဗေဒဥယျာဉ်တွင် အသားပုပ်နံ့ထုတ်လွှတ်သော ရှားပါး ပန်းပွင့်ကြီးပွင့်ဖူးလာရာ လာရောက်ကြည့်ရှုသူများဖြင့် စည်ကားခဲ့ပုံ။ ဓာတ်ပုံ-AP)
(ဆစ်ဒနီမြို့ရှိ တော်ဝင်ရုက္ခဗေဒဥယျာဉ်တွင် ပွင့်ဖူးလာသော လူသေကောင်ပန်းကြီးကို ဝိုင်းအုံကြည့်ရှု နေသူများ။ ဓာတ်ပုံ-AP Photo/ Rick Rycroft)
(ဆစ်ဒနီမြို့၊ တော်ဝင်ရုက္ခဗေဒဥယျာဉ်တွင် ရှားပါး လူသေကောင်ပန်းပွင့်ကြီးကို ၂၀၂၅ ခုနှစ်၊ ဇန်နဝါရီလ ၂၃ ရက်က တွေ့ရပုံ။ ဓာတ်ပုံ- AP Photo/ Rick Rycroft)
((လူသေကောင်ပန်း ဘာလဲ))
လူသေကောင်ပန်း (သို့မဟုတ်) လူသေ ပန်းပင်သည် အင်ဒိုနီးရှားမျိုးရင်းဖြစ်ပြီး အင်ဒိုနီးရှားတွင် Bunga Bangkai ဟုခေါ်ကြသည်။
အနောက်ဆူမတြားကျွန်းရှိ မိုးသစ်တောများတွင် တွေ့ရလေ့ရှိသည်။
မျိုးရင်းအဖြစ် ပေါက်ရောက်ရာဒေသများတွင် ၇ နှစ် (သို့မဟုတ်) ၁၀ နှစ်လျှင် တစ်ကြိမ်သာ ပွင့်လေ့ရှိပြီး အပွင့်သက်တမ်း ရက်အနည်းငယ်သာ ရှိသည်။
ပြင်းထန်သော ပုပ်အဲ့အဲ့ အနံ့ဆိုးထုတ်လွှတ်ကာ ယင်ကောင်ကဲ့သို့ ဝတ်မှုန်ကူးအင်းဆက်များကို ဆွဲဆောင်လေ့ရှိသည်။
တောနက်များအတွင်း အဆိုပါအပင် ၃၀၀ ဝန်းကျင်သာရှိသည်ဟု ခန့်မှန်းထားပြီး လူတို့စိုက်ပျိုးထားသော အပင်များအပါအဝင် ကမ္ဘာပေါ်တွင် အပင်ရေ ၁၀၀၀ အောက်သာ ရှိသည်။
((သြစတေးလျမှာ ဘာကြောင့် ၃ နေရာပွင့်ခဲ့တာလဲ))
သြစတေးလျတွင် လူသေကောင်ပန်းများ အဘယ်ကြောင့် ဆက်တိုက်ပွင့်နေသည်ဆိုခြင်းနှင့် စပ်လျဉ်းပြီး ရှင်းလင်းသော အဖြေမရှိကြောင်း ကင်ဘာရာမှ ပျိုးခြံမန်နေဂျာ Carol Dale က ပြောသည်။
“ခန့်မှန်းချက်တစ်ခုကတော့ ဒီအပင်တွေအများစုက သက်တမ်းတူနေတာပါ။ သူတို့ရဲ့ ဥထဲမှာ ကာဘိုဟိုက်ဒရိတ် အလုံအလောက် စုပြီးတဲ့အခါ အပွင့်ကို ထုတ်လုပ်တာ ဖြစ်ပါတယ်” ဟု Dale က ရှင်းပြသည်။
((ကင်ဘာရာက ပန်းဥယျာဉ်မှာ လူသေကောင်ပန်း ပွင့်မယ်လို့ ခန့်မှန်းထားခဲ့လား))
Dale က ပြောသည်မှာ လူသေကောင်အပင်သည် ပန်းမပွင့်ဘဲ ရှိနေသည်မှာ ၁၅ နှစ်ရှိခဲ့ပြီဖြစ်ကြောင်း၊ အခါအားလျော်စွာ နှင်းများကျလေ့ရှိသော ကင်ဘာရာမှာ လူသေကောင်ပင်များ ပွင့်ဖူးရန် ရာသီဥတု အခြေအနေမျိုး မဟုတ်ဟု သုံးသပ်ခဲ့ကြောင်း ပြောသည်။
“ဒီပန်းပင် ကျွန်မတို့ဆီမှာ ရှိနေတာ အတော်ကြာခဲ့ပါပြီ။ ပုံမှန် ပွင့်လေ့ပွင့်ထရှိတဲ့ ကာလထက်ကျော်ပြီး ပန်းမပွင့်ခဲ့ပါဘူး။ ဒါကြောင့် ကင်ဘာရာဟာ ဒီအပင်တွေ ပန်းပွင့်ဖို့ သင့်တော်တဲ့ ရာသီဥတုမရှိဘူးလို့ ကျွန်မတို့ သုံးသပ်ခဲ့ပါတယ်”
သို့သော် ဖေဖော်ဝါရီလဆန်းပိုင်းတွင် စတင်ပန်းပွင့်ခဲ့ပြီး ချက်ချင်းပင် အပုပ်နံ့များ ပျံ့နှံ့လာခဲ့သည်။
ပန်းပွင့်ကြီး၏ အမြင့်မှာ ၁၃၅ စင်တီမီတာ (၅၃ လက်မ) ရှိပြီး လာရောက်ကြည့်ရှုသူ အလွန်များပြားခဲ့သည်။
ပန်းပွင့်ထားရှိသည့် greenhouse မှာ နေရာမကျယ်လှသောကြောင့် လက်မှတ်အရေအတွက် ကန့်သတ်၍သာ ရောင်းချပေးခဲ့သည်။
ပန်းပွင့်၏ အနံ့မှာ တိရ စ္ဆာန်အသေကောင်၊ ကြက်ဥပုပ်၊ ရက်ရှည်ဝတ်ထားသည့် ခြေအိတ်၊ အမှိုက်ပုံး အစရှိသည်တို့၏ အနံ့မျိုးဖြစ်သည်ဟု ဆိုသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Australia holds its nose for its third rancid bloom of a rare corpse plant in 3 months Photo Credit- AP Photo/ Rick Rycroft, AP