ပုဂ္ဂလိက ငွေလဲကောင်တာ (Money Changer) များသည် မြန်မာနိုင်ငံတော် ဗဟိုဘဏ်က သတ်မှတ်ထားသည့် စည်းကမ်းများ ဖောက်ဖျက်ပါက ကောက်ခံမည့် ဒဏ်ကြေး သတ်မှတ်ချက်များကို ဖေဖော်ဝါရီလအတွင်း ထုတ်ပြန်မည်ဖြစ်ကြောင်း ဗဟိုဘဏ်ထံမှ သိရသည်။
၂၀၁၂ ခုနှစ်က ထွက်ရှိခဲ့သည့် နိုင်ငံခြားသုံးငွေ စီမံခန့်ခွဲမှု ဥပဒေ အခန်း ၁၀ တွင် ဗဟိုဘဏ်သည် နိုင်ငံခြားသုံးငွေ လုပ်ငန်း လုပ်ကိုင်ခွင့် ရရှိသူက ယင်းဥပဒေ အခန်း ၆ ပါ ပြဋ္ဌာန်းချက်ကို ဒဏ်ကြေး ပေးဆောင်ရမည်ဟု ပါသော်လည်း ဒဏ်ကြေးငွေနှုန်းထားများ သတ်မှတ်ထားခြင်း မရှိသည့်အတွက် ဒဏ်ကြေးများ သတ်မှတ်ကောက်ခံရန် စီစဉ်ခြင်းဖြစ်ကြောင်း ဗဟိုဘဏ်၊ နိုင်ငံခြားသုံးငွေ စီမံခန့်ခွဲမှုဌာနမှ ညွှန်ကြားရေးမှူးချုပ် ဦးဝင်းသော်က ပြောကြားသည်။
“ပြစ်ဒဏ်အလိုက် ဒဏ်ကြေးတွေက ကွာသွားလိမ့်မယ်။ ဒဏ်ကြေးက သတ်မှတ်ပြီးသား။ ဒါကို အထက်ကဌာနကို တင်ထားတယ်။ ဒီလအတွင်း သိရမယ်” ဟု ၎င်းက ဆိုသည်။
ဘဏ်များက ဖွင့်ထားသော ငွေလဲကောင်တာများနှင့် လိုင်စင်ရထားသော ပုဂ္ဂလိက ငွေလဲကောင်တာများသည် လိုင်စင်တွင် သတ်မှတ်ခွင့်ပြုထားခြင်း မရှိသော နိုင်ငံခြားသုံးငွေများ ရောင်းဝယ်လုပ်ကိုင်ခြင်း၊ ဗဟိုဘဏ်က သတ်မှတ်သည့် နိုင်ငံခြားငွေ ရည်ညွှန်းဘောင် အပေါင်းအနုတ် သုည ဒသမ ၈ ရာခိုင်နှုန်းကို ကျော်လွန်ရောင်းချပါက ဥပဒေအရ အရေးယူခံရမည် ဖြစ်သော်လည်း လက်ရှိအချိန်အထိ အရေးယူခြင်းနှင့် ဒဏ်ကြေး ကောက်ခံခြင်းများ မရှိသေးကြောင်း မြန်မာနိုင်ငံတော် ဗဟိုဘဏ်ထံမှ သိရသည်။
အချို့သော ငွေလဲကောင်တာများမှာ ဟောင်းနွမ်းငွေစက္ကူများ လက်မခံခြင်း၊ ဒေါ်လာကို သတ်မှတ်ထားသည့် ပမာဏထက် ပိုမိုကိုင်ဆောင်ခြင်း စသည့် စည်းကမ်းဖောက်ဖျက်မှုများ ရှိသောကြောင့် ယင်းကဲ့သို့ ဒဏ်ကြေးများ ပေးဆောင်ရန် သတ်မှတ်ခြင်း ဖြစ်ကြောင်း၊ ဒဏ်ကြေးငွေအဖြစ် အနည်းဆုံး ကျပ် ၁၀ သိန်းမှ သိန်း ၅၀ အထိ ဖြစ်နိုင်သည်ဟု ကြားသိရကြောင်း ငွေလဲကောင်တာ လုပ်ငန်းရှင် ဦးသန်းမြင့်က ပြောကြားသည်။
မြန်မာတစ်နိုင်ငံလုံး အတိုင်းအတာဖြင့် ငွေလဲကောင်တာ လိုင်စင်ချပေးထားသည့် ကုမ္ပဏီပေါင်း ၃၄၆ ခုရှိပြီး ငွေလဲကောင်တာ လိုင်စင်ချထားပေးမှုမှာ ရန်ကုန်တွင် အများဆုံးဖြစ်ကာ ကုမ္ပဏီ ၂၈၆ ခုရှိကြောင်း မြန်မာနိုင်ငံတော် ဗဟိုဘဏ်ထံမှ သိရသည်။
Credit: The Voice
