ရန်ကုန်တိုင်းဒေသကြီး ဒဂုံမြို့သစ် (တောင်ပိုင်း)မြို့နယ် မလစ်ကျေးရွာနှင့် လှည်းကူးမြို့နယ် ဇရပ်ကွင်းကျေးရွာတွင် စက်မှုဇုန်သစ် နှစ်ခုကို ယခုနှစ်အတွင်း တိုးချဲ့ တည်ဆောက်မည်ဖြစ်ကြောင်း စက်မှုဝန်ကြီးဌာနထံမှ သိရသည်။
အဆိုပါ စက်မှုဇုန်များကို ပြည်တွင်း ပုဂ္ဂလိက စီးပွားရေး အဖွဲ့အစည်းက ဦးဆောင်၍ တည်ထောင်မည်ဖြစ်ပြီး ရန်ကုန် တိုင်းဒေသကြီး အစိုးရ၏ ခွင့်ပြုမိန့်ကိုရယူကာ လက်ရှိတွင် လုပ်ငန်း လုပ်ကိုင်ခွင့်ရရန် မြန်မာနိုင်ငံ ရင်းနှီးမြှုပ်နှံမှု ကော်မရှင် (MIC) သို့ တင်ထားကြောင်း စက်မှုဝန်ကြီးဌာန လက်အောက်ရှိ ရန်ကုန်တိုင်း စက်မှုကြီးကြပ်ရေးဌာနမှ တိုင်းဦးစီးမှူး ဦးတင်ဦးက ပြောကြားသည်။
“ဒီပရောဂျက်က CB အုပ်စုက လုပ်မယ်လို့ သိရတယ်။ ပြည်တွင်းကနေ ကိုယ်ထူကိုယ်ထ စက်မှုဇုန် ဖော်ဆောင်တာ ရှားတယ်။ အရင်က စက်မှုဇုန် ဖော်ဆောင်ရာမှာ အခြေခံ အဆောက်အဦ လိုအပ်ချက်တွေ၊ စီမံခန့်ခွဲနိုင်မှုတွေ သေချာ မလုပ်နိုင်ခဲ့ဘူး။ အခု ပုဂ္ဂလိကပိုင်းက လုပ်မယ်ဆိုတော့ ဒါတွေကို သေချာလုပ်နိုင်မယ်လို့ မျှော်လင့်တယ်”ဟု ၎င်းက ဆိုသည်။
ယခုအစိုးရ လက်ထက်တွင် တစ်နိုင်ငံလုံး အတိုင်းအတာဖြင့် စက်မှုဇုန်အသစ်များ တိုးချဲ့သွားရန် အစီအစဉ်ရှိပြီး ယင်းကဲ့သို့ တိုးချဲ့ရာတွင်လည်း အစိုးရက ငွေကြေးစိုက်ထုတ်ရန်မလိုဘဲ ကိုယ်ထူကိုယ်ထ ထူထောင်နိုင်မည့် စီးပွားရေး လုပ်ငန်းရှင်များကို ဖိတ်ခေါ်သွားမည်ဖြစ်ကြောင်း မြန်မာနိုင်ငံ ရင်းနှီးမြှုပ်နှံမှု ကော်မရှင် အတွင်းရေးမှူး ဦးအောင်နိုင်ဦးက ပြောကြားထားသည်။
အဆိုပါ စက်မှုဇုန် ဖော်ဆောင်မည့် စီမံကိန်းမှာ CB (သမဝါယမဘဏ်) အနေနှင့် တိုက်ရိုက် ဆောင်ရွက်ခြင်း မဟုတ်ဘဲ CB အုပ်စုခွဲတစ်ခုဖြစ်သည့် KMA အုပ်စုက ဆောင်ရွက်ခြင်းဖြစ်ကြောင်း သမဝါယမဘဏ်၏ ဦးဆောင်ညွှန်ကြားရေးမှူး ဦးဖေမြင့်က ပြောဆိုသည်။
တစ်နိုင်ငံလုံးအနေနှင့် စက်မှုဇုန်ပေါင်း ၂၀ ခန့်ရှိပြီး မြန်မာနိုင်ငံ ရင်းနှီးမြှုပ်နှံမှု ကော်မရှင်က စက်မှုဇုန်အသစ်များ တိုးချဲ့နိုင်ရေးအတွက် စက်မှုဝန်ကြီးဌာနနှင့် ပူးပေါင်း ဆောင်ရွက်နေပြီး တိုင်းဒေသကြီးနှင့် ပြည်နယ် အသီးသီးရှိ မြေနေရာများကို စက်မှုဇုန်ဖော်နိုင်ရေးအတွက် အဆိုပြုလွှာများ လက်ခံနေကြောင်း စက်မှုဝန်ကြီးဌာနထံမှ သိရသည်။
Credit: The Voice
