Johnson & Johnsonကုမ္ပဏီကိုတည်ထောင်ခဲ့သူ ရောဘတ်ဝုဒ်ဂျွန်ဆင် I ၏ သားဖြစ်သူရောဘတ်ဝုဒ်ဂျွန်ဆင် III တွင် ရောဘတ်ဝုဒ်ဂျွန်ဆင် IV ၊ ကိတ်ဂျွန်ဆင်၊ ဘီလီဂျွန်ဆင်၊ အဲလစ်ဇဘက်ဂျွန်ဆင်နှင့် ခရစ္စတိုဖာ ဂျွန်ဆင်ဟူသောသားသမီး ၅ ဦးထွန်းကားသည်။
အဆိုပါ ၅ ဦးအနက် စတုတ္ထမြောက်သမီးဖြစ်သူအဲလစ်ဇဘက်ဂျွန်ဆင်သည် ယခုအခါ နယူးယောက်မြို့၊ မေးလ်ဘရွတ်ခ်ကျေးရွာရှိ မြင်းခြံကြီးကိုကန်ဒေါ်လာ ၂၈ ဒသမ ၅ သန်းဖြင့် အရောင်းဈေးကွက်တင်လာခြင်း ဖြစ်သည်။
အကယ်၍ အဆိုပါခေါ်ဈေးဖြင့်သာရောင်းထွက်ခဲ့မည်ဆိုပါကမေးလ်ဘရွတ်ကျေးရွာတွင် တန်ဖိုးအကြီးဆုံးနေအိမ်အဖြစ် စံချိန်တင်မည် ဖြစ်သည်။
မေးလ်ဘရွတ်ခ်ကျေးရွာသည် နယူးယောက်မြို့မှ မိုင် ၉၀ ခန့် ကွာဝေးသောအရပ်တွင်တည်ရှိသည်။
“လျှပ်စီးသစ်ပင်ယာတော”ဟုလူသိများသောအဆိုပါမြင်းခြံကြီးတွင် အိပ်ခန်း ၉ ခန်းပါ နေအိမ်တစ်လုံးပါဝင်သည်။
ယင်းနေအိမ်ကိုဂရိရီဗိုက်ဗယ်လ်ဗိသုကာဟန်ဖြင့် ဆောက်လုပ်ထားခြင်းဖြစ်ပြီး ၁၈၅၀ ပြည့်နှစ်ဝန်းကျင်တွင် ဆောက်လုပ်ခဲ့ခြင်းဖြစ်သည်။
ဧည့်ဂေဟာဆောင် ၄ ခု ၊ မြင်းဇောင်း ၁၈ ခု၊ မြင်းစီးကွင်းနှင့် စားကျက်များ ပါဝင်သည်။
ခြံဝန်းအကျယ်အ၀န်းမှာ ဧက ၆၀၀ ကျော် ကျယ်ဝန်းပြီး ကိုယ်ပိုင် ရဟတ်ယာဉ်ကွင်းတစ်ခုပင် ပါဝင်သည်။
ပင်ပနေအိမ်၏ အကျယ်အ၀န်းမှာ စတုရန်းပေ ၁၈၀၀၀ ခန့်ကျယ်ဝန်းပြီး ဓာတ်လှေကားတစ်ခုပါဝင်သည်။
နေအိမ်အတွင်းတွင် ရုပ်ရှင်ရုံတစ်ခုပါဝင်ပြီး ခြံဝန်းအတွင်း၌ ရေကူးကန်နှင့် ကလေးကစားကွင်းတို့ ပါဝင်သည်။
မစ္စဂျွန်ဆင်သည် ယင်းနေအိမ်ကို ၁၉၈၀ ပြည့်နှစ်ဝန်းကျင်တွင် ၀ယ်ယူခဲ့ခြင်းဖြစ်ပြီးနောက်ပိုင်းတွင် အနီးတွင်ကပ်လျက်ရှိသော ခြံဝန်းများကို ဆက်လက်ဝယ်ယူခဲ့ရာမှ ယခုအကျယ်အ၀န်းသို့ ရောက်ရှိလာခဲ့ခြင်း ဖြစ်သည်။
ယခုမြင်းခြံကျယ်ကြီးကိုရောင်းချရခြင်း၏ အကြောင်းရင်းမှာမစ္စဂျွန်ဆင်၏ သားသမီးများမှာနေအိမ်အသီးသီးဖြင့် ကိုယ်စီနေထိုင်လျက် ရှိကြပြီဖြစ်ပြီးအဆိုပါခြံသို့ လာရောက်ကြခြင်းမရှိကြတော့သည့်အတွက် ရောင်းချခြင်းဖြစ်သည်ဟု ဂျွန်ဆင်မိသားစု၏ ပြောရေးဆိုခွင့်ရ ပုဂ္ဂိုလ်ကပြောကြားသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
