ကမ္ဘာပေါ်တွင် အနုပညာကြေးအမြင့်မားဆုံးသရုပ်ဆောင်တစ်ဦးဖြစ်သော ဂျနီဖာလောရင့်သည် အမေရိကန်ပြည်ထောင်စု၊ ကယ်လီဖိုးနီးယားပြည်နယ်၊ ဆန်တာမိုနီကာရှိ ကွန်ဒိုခန်းကို ကန်ဒေါ်လာ ၁ ဒသမ ၁၅ သန်းဖြင့် ရောင်းချလိုက်ရာ ဒေါ်လာ ၂၈၀၀၀၀ ခန့် မြတ်စွန်းခဲ့ကြောင်း နယူးယောက်အခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
ယင်းကွန်ဒိုခန်း၏ အကျယ်အ၀န်းမှာ စတုရန်းပေ ၁၄၁၃ ဖြစ်ပြီး ယခင်က ကန်ဒေါ်လာ ၁ ဒသမ ၁၆၉ သန်းဖြင့် ဈေးခေါ်ရောင်းချခဲ့ခြင်းဖြစ်သော်လည်း ရောင်းမထွက်ခဲ့ဘဲ ယခုဈေးနှုန်း ၁ ဒသမ ၁၅ သန်းဖြင့် ရောင်းထွက်သွားခြင်း ဖြစ်သည်။
ဖော့ဘ်မဂ္ဂဇင်းကြီး၏ ဖော်ပြချက်အရ ဂျနီဖာလောရင့်၏ ၀င်ငွေမှာ ၂၀၁၆ ခုနှစ်၊ ဇွန်လ ၁ ရက်တွင် ကန်ဒေါ်လာ ၄၆ သန်း (အခွန်မကောက်ရသေးသောအချိန်) ဖြစ်သည်ဟု ဆိုသည်။
အဆိုပါကွန်ဒိုခန်းတွင် အိပ်ခန်း ၂ ခန်း၊ ရေချိုးခန်း ၂ ခန်းပါဝင်ပြီး ကန်ဒေါ်လာ ၈၇၉၀၀၀ ဖြင့် ၂၀၀၆ ခုနှစ်အတွင်းက ၀ယ်ယူခဲ့ခြင်းဖြစ်သည်ဟု ဆိုသည်။
ဂျနီဖာလောရင့်သည် ၂၀၁၂ ခုနှစ်တွင် ရိုက်ကူးထုတ်လုပ်ခဲ့သော “Silver Linings Playbook” ရုပ်ရှင်ဖြင့် အော်စကာဆု ရရှိခဲ့သည်။
လက်ရှိနေထိုင်သောနေအိမ်မှာ စတုရန်းပေ ၅၅၅၀ ကျယ်ဝန်းပြီး အိပ်ခန်း ၅ ခန်းပါဝင်ကာ ဘီဗာလီဟေးလ်တွင် တည်ရှိသည်။
အဆိုပါနေအိမ်ကို ၂၀၁၄ ခုနှစ်အတွင်း ကန်ဒေါ်လာ ၇ သန်းဖြင့် ၀ယ်ယူခဲ့ခြင်း ဖြစ်သည်။
အခြားသတင်းတစ်ရပ်အရ ဂျနီဖာလောရင့်သည် မန်ဟက်တန်တွင် နေအိမ်တစ်လုံးထပ်မံရှာဖွေနေသည်ဟု ဆိုသည်။
မကြာသေးမီက သွားရောက်ကြည့်ရှုခဲ့သော နေအိမ်မှာ မန်ဟက်တန်၊ ထရိုင်ဘီကာရှိ နေအိမ်တစ်လုံးဖြစ်ပြီး ယင်းနေအိမ်၏ ခေါ်ဈေးမှာ ကန်ဒေါ်လာ ၁၇ ဒသမ ၄၉ သန်း ဖြစ်သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
