ပြည်ပ အိမ်ခြံမြေ သတင်း | Posted by အေးမြတ်သူ
ထီပေါက်ခြင်းဟူသည်မှာ ကံတရားသာဖြစ်သည်ဟု အချို့ကဆိုသည်။
အချို့ကမူ တစိုက်မတ်မတ် ကံစမ်းပါက နောက်ဆုံးတွင် ထီကံထူးနိုင်ကြောင်း အခိုင်အမာ ယုံကြည်ထားကြသည်။
မလေးရှားမှ အမျိုးသားတစ်ဦးသည် ၁၃ နှစ်လုံး တစိုက်မတ်မတ် ထီကံစမ်းခဲ့ရာ နောက်ဆုံးတွင် 1+3D Jackpot ထီဆုကြီး ကံထူးခဲ့ပြီး ဆုငွေ ရင်းဂစ် ၁၇,၈၄၀,၆၉၁ ရရှိသွားသည်။
အဆိုပါ အမျိုးသားသည် အသက် ၂၅ နှစ်အရွယ်ကတည်းက 6333 နှင့် 0221 ဟူသော ဂဏန်း ၂ လုံးကို အမြဲမပြတ် ကံစမ်းနေခဲ့သည်။
ထိုနံပါတ်များမှာ သူ၏ ကားနံပါတ်နှင့် မွေးနေ့များ ဖြစ်သည်။
“ကျွန်တော့်ရဲ့ ကိုယ်ပိုင် သီးသန့်ဂဏန်းတွေအပေါ် အမြဲယုံကြည်မှုရှိပါတယ်” ဟု ထီပေါက်သော အမျိုးသားက ပြောသည်။
“ဒါက ကံတရားသက်သက် မဟုတ်ပါဘူး။ ဇွဲလုံ့လ ကိစ္စဖြစ်ပါတယ်”
ယခုကဲ့သို့ နေ့ချင်းညချင်း ချမ်းသာသွားသော်လည်း ၎င်းက အဆောတလျင် ဇိမ်ခံသုံးဖြုန်းရန် ရည်ရွယ်ချက် မရှိချေ။
ပုံနှိပ်လုပ်ငန်းကို နှစ်ပေါင်းများစွာ လုပ်ကိုင်ခဲ့သူဖြစ်ပြီး လုပ်ငန်း၏ နည်းပညာကို အဆင့်မြှင့်လိုကြောင်းနှင့် လုပ်ငန်းတိုးတက်ပြောင်းလဲအောင် လုပ်ဆောင်လိုကြောင်း ၎င်းက ပြောသည်။
“ကျွန်တော် ပုံနှိပ်လုပ်ငန်းလုပ်နေတာ နှစ်တွေကြာခဲ့ပါပြီ။ ဒစ်ဂျစ်တယ်ခေတ်ကို ရောက်လာတဲ့နောက်ပိုင်း ဆိုင်းဘုတ်တွေ၊ banner တွေ အသုံးပြုမှု ကျဆင်းလာတယ်။ အထူးသဖြင့် ကိုဗစ်ကပ်ဘေး နောက်ပိုင်းမှာပေါ့။ ပြီးခဲ့တဲ့နှစ်ကဆို ဝန်ထမ်းတချို့ လျှော့ချပစ်လိုက်ရတယ်”
“အခု ကံထူးလာတဲ့ငွေရှိလာတာကြောင့် ကျွန်တော့်မှာ မျှော်လင့်ချက်အသစ်တွေ ရှိလာပါတယ်။ ပုံနှိပ်နည်းပညာကို အဆင့်မြှင့်ပြီး လုပ်ငန်းတိုးတက်ပြောင်းလဲအောင်၊ ယှဉ်ပြိုင်နိုင်စွမ်း ဆက်ရှိနေအောင် လုပ်ဆောင်သွားမှာ ဖြစ်ပါတယ်။ ပုံနှိပ်လုပ်ငန်းကို နောက်တစ်ဆင့် တက်လှမ်းနိုင်ဖို့ မျှော်လင့်ထားပါတယ်”
အဆိုပါအမျိုးသားက သူ၏ ဇာတိမြို့ရှိ ဘုရားကျောင်းသို့လည်း လှူဒါန်းမှုများ ပြုလုပ်လိုသည်။
“ကျွန်တော့် ဇာတိမြို့လေးမှာ ဘုရားကျောင်းတစ်ခုရှိပါတယ်။ ကျွန်တော် မကြာခဏ သွားလေ့ရှိပါတယ်။ အဲဒီကျောင်းက ပြင်ဆင်ဆောက်လုပ်ဖို့ လိုအပ်နေတယ်။ ထီပေါက်တဲ့အထဲကနေ ကျောင်းကို အရင်ပုံစံအတိုင်း ပြန်ပြီး မွမ်းမံပြင်ဆင်နိုင်ဖို့ လှူဒါန်းသွားမယ်လို့ တွေးထားပါတယ်”
သူ၏ ဖြစ်ရပ်မှာ ထီဝါသနာပါသူတို့အကြား မျှော်လင့်ချက်များ ပြန်လည်မွေးဖွားလာစေခဲ့ပြီး စိတ်ရှည်ဇွဲကောင်းပါက ထီလက်မှတ်တစ်စောင်မှသည် ရွှေရောင်အခွင့်အလမ်းများ ဖြစ်လာနိုင်ကြောင်း ပြသနေသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Man wins over RM17.8 million 1+3D Jackpot prize money after consistent betting for 13 years