စကော့တလန်နိုင်ငံ၏မြို့တော် အီဒင်ဘာ့မှ ၁၅၈ မိုင်ကွာဝေးသည့်အရပ်တွင်တည်ရှိသည့် အင်ဗာနက်စ်ဟူသော မြို့ကလေးတွင် တည်ရှိသော ဧက၂၁၀၀၀ ကျယ်ဝန်းသောခြံမြေနှင့်နေအိမ်ကြီး ပေါင် ၂၅ သန်းဖြင့် အရောင်းဈေးကွက် ၀င်လာရာ စကော့တလန်၌ ဈေးအကြီးဆုံးနေအိမ်ဖြစ်လာကြောင်း အင်္ဂလန်အခြေစိုက်အိမ်ခြံမြေသတင်းဝက်ဘ်ဆိုက် တစ်ခုတွင် ဖော်ပြသည်။
အဆိုပါမြို့ကလေးသည် ဗြိတိန်နိုင်ငံ၏ မြောက်ဘက်အစွန်ဆုံးတွင်တည်ရှိသော မြို့ငယ်ကလေးဖြစ်ပြီး လူဦးရေ ငါးသောင်းပင်မရှိသော လူနေကျဲပါးသည့် မြို့ကလေးတစ်မြို့ဖြစ်သည်။
ရောင်းချမည့်ခြံဝန်းကြီးတည်ရှိသောနေရာမှာ အင်ဗာနက်စ်မြို့ကလေး၏ တောင်ဘက် မိုင် ၄၀ ခန့်အကွာ၊ Cairngorm အမျိုးသားပန်းခြံဘေးတွင် တည်ရှိသည်။
အဆိုပါနေရာသည် ဥရောပ၌ ဆယ်လ်မွန်ငါးဖမ်းရန် အကောင်းဆုံးနေရာများတွင် တစ်ခုအပါအ၀င်ဖြစ်ပြီး တောကြက်ဖမ်းရန် စားကျက်နှစ်ခုပါဝင်ပြီး ငှက်ပစ်ရန်လည်း အလွန်ကောင်းမွန်သည်ဟု ဆိုသည်။
အဆိုပါနေအိမ်ကြီးသို့ နာမည်ကျော်ပုဂ္ဂိုလ်များ လာရောက်လည်ပတ်ဖူးရာ အက်ဒ်ဝပ်ဘုရင် VII ၊ ဂျော့ဘုရင် V ၊ ဂျော့ဘုရင် VI ၊ အမေရိကန်သမ္မတ သီအိုဒို ရုစဗဲ့နှင့် ဘယ်လ်ဂျီယမ်ဘုရင် လီယိုပိုတို့ အပါအ၀င်ဖြစ်သည်။
စကော့တလန်တွင် နေအိမ်တစ်လုံး၏ အများဆုံးပျှမ်းမျှပေါက်ဈေးမှာ ပေါင် ၅ သန်းခန့်ဖြစ်ရာ ယခုဈေးနှုန်းမှာ စကော့တလန်တွင် အမြင့်မားဆုံးဈေးနှုန်းဖြစ်လာသည်။
ယင်းခြံဝန်းကြီးကို ရောင်းချရန်အတွက် နာမည်ကျော် ဗြိတိန်အိမ်ခြံမြေ၀န်ဆောင်မှုကုမ္ပဏီ Savills သို့ အပ်နှံထားခြင်း ဖြစ်ပြီး အမဲလိုက်၊ ငှက်ပစ်ဝါသနာပါသော သန်းကြွယ်သူဌေးများအတွက် အလွန်သင့်လျော်သော နေရာတစ်ခု ဖြစ်သည်။
အဆိုပါနေအိမ်ခြံဝန်းကြီးကို ပိုင်ဆိုင်သည်မှာ လစ်ခ်ျဖီးလ်မိသားစုဖြစ်ပြီး လွန်ခဲ့သော ၂၃ နှစ်တာလုံး ယင်းနေအိမ်ကြီး၏ ယာတောအိမ်များ၊ အမဲလိုက်ကွင်းများကို ပြုပြင်မွမ်းမံခဲ့ကြသည်။
အလွန်ကျယ်ဝန်းလှသော ခြံဝန်းကျယ်ကြီးအတွင်း သစ်သီးဝလံပင်များစုံလင်စွာ စိုက်ပျိုးပါရှိသည့်အပြင် မီးဖိုဆောင်သုံး ဟင်းသီးဟင်းရွက်စိုက်ခင်းများလည်း ပါဝင်သည်။
ခေါ်ဈေးမှာ ပေါင် ၂၅ သန်း (ကန်ဒေါ်လာ ၃၂ သန်း) ဖြစ်သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
