ဆော်ဒီအာရေးဗီးယားနိုင်ငံတွင် ဖိလစ်ပိုင်လုပ်သားများစွာ အလုပ်ပြုတ်ကာ လမ်းများပေါ်တွင် လှည့်လည်သွားလာရလျက် ရှိနေသောကြောင့် အဆောတလျင် ပြန်လည်ခေါ်ယူပါရန် ဖိလစ်ပိုင်အစိုးရကို အလုပ်သမားတို့က တောင်းဆိုထားသည်ဟု အရှေ့အလယ်ပိုင်းအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
ယခုကဲ့သို့ လုပ်သားများစွာ အလုပ်ဖြုတ်ခဲ့ရခြင်းမှာ ရေနံဈေးများ အလွန်အမင်းထိုးကျမှုကြောင့်ဖြစ်သည်ဟု ဆိုသည်။
အချို့မှာ လုပ်အားခမရသည်မှာ လနှင့်ချီ၍ ကြာမြင့်ခဲ့ပြီဖြစ်ပြီး အစားအစာငတ်မွတ်မှုနှင့် ကြုံတွေ့နေရလျက်ရှိကြောင်း ရွှေ့ပြောင်းလုပ်သားကူညီရေးအဖွဲ့တစ်ခုက ထုတ်ပြန်သည်ဟု ဆိုသည်။
ဖိလစ်ပိုင်အစိုးရက ထုတ်ပြန်သည်မှာ ဆော်ဒီအာရေးဗီးယားသို့ လူသားချင်းစာနာထောက်ထားမှုဆိုင်ရာ အကူအညီပေးရန်နှင့် ဥပဒေကြောင်းဆိုင်ရာ အကူအညီပေးရန်အတွက် အဖွဲ့တစ်ဖွဲ့ စေလွှတ်သွားမည်ဖြစ်ကြောင်း ထုတ်ပြန်ထားသည်။
ဆော်ဒီအာရေးဗီးယားတွင် ဖိလစ်ပိုင်အလုပ်သမားပေါင်း တစ်သန်းခန့် ရောက်ရှိနေသည်။
အဆိုပါအဖွဲ့သည် ဗုဒ္ဓဟူးနေ့ (သြဂုတ် ၁၀ ရက်) တွင် ရောက်ရှိမည်ဖြစ်ပြီး အစားအစာပြတ်တောက်နေသူများ၊ ဆေးဝါးကုသစောင့်ရှောက်ရန် လိုအပ်သူများကို အဓိကဦးစားပေးကြည့်ရှုသွားမည်ဖြစ်သည်ဟု ဖိလစ်ပိုင်နိုင်ငံခြားရေးဝန်ကြီးဌာနက ထုတ်ပြန်ထားသည်။
“ဒါကတော့ အစိုးရရဲ့ ကနဦးခြေလှမ်းပေါ့။ ဒါပေမယ့် ဖိလစ်ပိုင်လုပ်သားတွေကို ပြန်ခေါ်ဖို့ ဖိဖိစီးစီးလုပ်ပေးပါလို့ အစိုးရကို တောင်းဆိုပါတယ်”ဟု ဆော်ဒီအာရေးဗီးယားရှိ ဖိလစ်ပိုင်အလုပ်သမားအဖွဲ့ခေါင်းဆောင် မာရီယိုဘန်က ပြောကြားသည်။
“အလုပ်သမားတွေ ဖြစ်နိုင်သမျှ မြန်မြန် အိမ်ပြန်ရောက်တာ ကောင်းပါတယ်။ သူတို့ဟာ အိမ်ပြန်ချင်နေကြတယ်။ အိမ်ပြန်ရောက်ရင် တခြားတစ်နေရာရာမှာ အလုပ်ပြန်ရှာကြရမှာပါ” ဟု မာရီယိုဘန်က ဆက်လက်ပြောကြားသည်။
ဖိလစ်ပိုင်နှင့် ဆော်ဒီအာရေးဗီးယားအစိုးရတို့သည် ဖိလစ်ပိုင်လုပ်သားများအတွက် ရရန်ရှိသော လုပ်အားခများနှင့် စပ်လျဉ်း၍ ဆွေးနွေးညှိနှိုင်းနေစဉ်အတွင်း အဆိုပါအလုပ်သမားတို့ကို ဖိလစ်ပိုင်သို့ ပြန်လည်ခေါ်ဆောင်ခြင်းကို အဆောတလျင်ပြုလုပ်သင့်ကြောင်းလည်း ၎င်းက ပြောကြားသည်။
ဖိလစ်ပိုင်လုပ်သားတို့၏ ပျှမ်းမျှလစာမှာ တစ်လလျှင် ကန်ဒေါ်လာ ၄၀၀ မှ ၅၀၀ ကြား ဖြစ်သည်။
ယခုအခါတွင် ဆော်ဒီအာရေးဗီးယား၌ နိုင်ငံခြားအလုပ်သမားပေါင်း ၁၀ ဒသမ ၂ သန်းခန့် လုပ်ကိုင်လျက်ရှိကြောင်း ကုလသမဂ္ဂက ထုတ်ပြန်သော စာရင်းအင်းများတွင် ဖော်ပြသည်။
ခန့်မှန်းချက်များအရ ဆော်ဒီအာရေးဗီးယားတွင် ဖိလစ်ပိုင်ဆောက်လုပ်ရေးလုပ်သားပေါင်း ၁၁၀၀၀ ခန့် အလုပ်ပြုတ်ခဲ့ကြသည်ဟု ဆိုသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
