ကာတာအခြေစိုက် အိမ်ခြံမြေကုမ္ပဏီဖြစ်သော ဘာဝသည် ဆော်ဒီအာရေးဘီးယားနိုင်ငံ၊ ရီယာ့ဒ်ရှိ မြေကွက်တစ်ကွက်ကို ကန်ဒေါ်လာ ၁၇၅ ဒသမ ၈ သန်းသုံး၍ ၀ယ်ယူလိုက်ကြောင်း အရှေ့အလယ်ပိုင်းအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
အဆိုပါမြေကွက်၏ အကျယ်အ၀န်းမှာ စတုရန်းမီတာ ၂ ဒသမ ၂၂ သန်းခန့် ကျယ်ဝန်းပြီး ရောင်းချသူမည်သူဖြစ်သည်ဆိုခြင်းကိုမူ ၀ယ်ယူသည့်ကုမ္ပဏီက ထုတ်ဖော်ပြောကြားခြင်း မရှိချေ။
ယခုမြေကွက်ဝယ်ယူမှုမှာ ဆော်ဒီအာရေးဗီးယားတွင် အိမ်ခြံမြေကဏ္ဍရင်းနှီးမြှုပ်နှံမှု ပြုလုပ်နိုင်မည့် အလားအလာများကို ရှာဖွေရန် ကုမ္ပဏီက ရည်မှန်းထားမှုအရ ဖြစ်ကြောင်း ဘာဝအိမ်ခြံမြေကုမ္ပဏီက ထုတ်ပြန်သော ထုတ်ပြန်ချက်တစ်ရပ်တွင် ဖော်ပြသည်။
အဆိုပါမြေကွက်ပေါ်တွင် ဆောက်လုပ်မည့် စီမံကိန်း၌ လူနေနှင့် စီးပွားရေးလုပ်ငန်းဆိုင်ရာ အဆောက်အအုံများ ပါဝင်မည်ဖြစ်သည်ဟု ဆိုထားသည်။
ဘာဝကုမ္ပဏီသည် ပင်လယ်ကွေ့အာရပ်နိုင်ငံများရှိ အကြီးမားဆုံး developer များတွင် တစ်ခုအပါအ၀င်ဖြစ်ပြီး ယခုမြေကွက်လွတ်ဝယ်ယူမှုမှာ ရီယယ်ငွေ တန်ဖိုးအားဖြင့် ၆၅၉ ဒသမ ၂၈ သန်းခန့် ရှိသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
