ဆန်ဖရန်စစ္စကိုတွင် နည်းပညာကုမ္ပဏီများက ဝန်ထမ်းလျှော့ချမှု အလွန်များပြားလာနေသောကြောင့် အိမ်ခြံမြေဈေးနှုန်းများ ထိုးကျ

ရွှေမြို့တော်ဟု လူသိများခဲ့သော ဆန်ဖရန်စစ္စကို၏ ကိုယ်ရောင်ကိုယ်ဝါတို့ မှေးမှိန်လာနေသည်။

အမေရိကန်ပြည်တွင် တချိန်က ကယ်လီဖိုးနီးယားတခွင်၌ ရွှေတူးသည့်လုပ်ငန်း ခေတ်စားခဲ့ဖူး သောကြောင့် ရွှေမြို့တော်ဟု နာမည်တွင်ခဲ့ခြင်း ဖြစ်၏။

ယခုအခါတွင်မူ နည်းပညာလုပ်ငန်းနယ်ပယ်တွင် ဝန်ထမ်းလျှော့ချမှုများ ကျယ်ပြန့်စွာ ပေါ်ပေါက်နေမှုကြောင့် ဆန်ဖရန်စစ္စကို၏ အိမ်ခြံမြေဈေးနှုန်းမှာ ကိုဗစ်ကပ်ဘေးမတိုင်မီ အခြေအနေသို့ ထိုးကျသွားခဲ့ကြောင်း SFGATE သတင်းဌာနက ဖော်ပြသည်။

ဆန်ဖရန်စစ္စကိုသည် အမေရိကန်ပြည်ထောင်စုရှိ အိမ်ခြံမြေဈေးအကြီးဆုံး မြို့ပြဒေသများတွင် တစ်ခုအပါအဝင် ဖြစ်နေဆဲဖြစ်သည်။

သို့သော် ကွန်ဒိုခန်းများနှင့် စုပေါင်းပိုင် အဆောက်အအုံများ၏ ဈေးနှုန်းမှာ ၁၄ ဒသမ ၇ ရာခိုင်နှုန်း ကျဆင်း သွားပြီး လက်ရှိအားဖြင့် ပျမ်းမျှပေါက်ဈေး ကန်ဒေါ်လာ ၉၈၆၀၀၀ သာရှိတော့သည်။

ဈေးပေါက်ဈေးမှာ ၂၀၁၅ ခုနှစ်နောက်ပိုင်း မတွေ့ဖူးသည့် ဈေးနှုန်းဖြစ်ကြောင်း Zillow အိမ်ခြံမြေဝက်ဘ်ဆိုက်မှ အချက်အလက်များကို Wolf Street ၏ လေ့လာချက်အရ သိရသည်။

(ဆန်ဖရန်စစ္စကိုတွင် ကွန်ဒိုခန်းများနှင့် စုပေါင်းပိုင် အဆောက်အအုံတို့၏ ဈေးနှုန်းမှာ ကိုဗစ်ကပ်ဘေးမတိုင်မီ ကာလပေါက်ဈေးသို့ ထိုးကျသွားသည်။ ဓာတ်ပုံ-gdvcom-stock.adobe.com)

(ဆန်ဖရန်စစ္စကိုတွင် လုံးချင်းအိမ်တို့၏ ဈေးနှုန်းမှာ ၂၀၁၉ ခုနှစ်က ဈေးနှုန်းသို့ ကျဆင်းသွားကြောင်း SFGATE နှင့် Wolf Street တို့က ဖော်ပြသည်။ ဓာတ်ပုံ-Aaron- stock.adobe.com)

လုံးချင်းအိမ် (SFH) တို့မှာ ၂၀၂၂ ခုနှစ်တွင် ဈေးနှုန်း အထွတ်အထိပ်သို့ ရောက်ခဲ့ပြီး ယခုအခါ ဈေးနှုန်း ၁၅ ဒသမ ၄ ရာခိုင်နှုန်း ထိုးကျသွားကာ ပျမ်းမျှပေါက်ဈေး ကန်ဒေါ်လာ ၁ ဒသမ ၃၉ သန်းသာရှိကြောင်း SFGATE က ဖော်ပြသည်။

ကွန်ဒိုခန်း ဈေးနှုန်းမှာ ၂၀၁၂ မှ ၂၀၂၂ ခုနှစ်အကြား ၂ ဆခန့် ဈေးတက်ခဲ့သော်လည်း ပြီးခဲ့သော ၂ နှစ်တာ အတွင်း ၃၀ ရာခိုင်နှုန်းခန့်အထိ ဈေးနှုန်း ပြုတ်ကျခဲ့ကြောင်း SFGATE က ဖော်ပြသည်။

ဆန်ဖရန်စစ္စကို၏ စောင်းနေသော တာဝါဟု နာမည်ကြီးသည့် Millennium Tower တွင် အခန်းဈေးများမှာ ၄၄ ရာခိုင်နှုန်းအထိ ထိုးကျနေသည်။

SFGATE က ဖော်ပြချက်အရ ၂၀၂၄ ခုနှစ်၊ စက်တင်ဘာလအတွင်း ဆန်ဖရန်စစ္စကိုတွင် ကွန်ဒိုခန်းတစ်ခန်းမှာ ကန်ဒေါ်လာ ၆၁၅၀၀၀ ဖြင့် အရောင်းအဝယ်ဖြစ်ခဲ့ကြောင်း၊ ယခင် ၁၀ နှစ်ခန့်က အဆိုပါအခန်းမှာ ကန်ဒေါ်လာ ၁ ဒသမ ၁ သန်းဖြင့် အရောင်းအဝယ်ဖြစ်ခဲ့သည့်အခန်းဖြစ်ကြောင်း ဖော်ပြသည်။

(ယခုကဲ့သို့ အိမ်ခြံမြေဈေးများ ထိုးကျနေမှုမှာ ဆန်ဖရန်စစ္စကိုတွင် ဝန်ထမ်းလျှော့ချမှုများ ပေါ်ပေါက်နေသည့် ကာလနှင့် တချိန်တည်းဖြစ်ပွားနေခြင်းဖြစ်ကြောင်း SFGATE သတင်းဌာနက ဖော်ပြသည်။ ဓာတ်ပုံ-Sundry Photography-stock.adobe.com)

ဆန်ဖရန်စစ္စကိုတွင် နည်းပညာကဏ္ဍ ဝန်ထမ်းအင်အားမှာ ယခင်ကအောက် ၂၀ ရာခိုင်နှုန်း ကျဆင်းသွားသည်။

၂၀၂၃ ခုနှစ်အတွင်း ဆန်ဖရန်စစ္စကို၌ နည်းပညာနယ်ပယ် ဝန်ထမ်းလျှော့ချမှု ၁၀၂၀၀ ဦးရှိခဲ့ကြောင်း SFGATE က ဖော်ပြသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: San Francisco house prices plunge amid widespread tech layoffs Photo Credit- Sundry Photography-stock.adobe.com, Aaron- stock.adobe.com, gdvcom-stock.adobe.com