ဖလော်ရီဒါပြည်နယ်တွင် အံ့ဖွယ်အလှများ ပိုင်ဆိုင်ထားသော ကိုယ်ပိုင်ကျွန်းတစ်ကျွန်း အရောင်းဈေးကွက်ဝင်လာ

သင့်အနေဖြင့် ကိုယ်ပိုင်ကျွန်းတစ်ကျွန်း ဝယ်ယူပိုင်ဆိုင်ရန် စိတ်ကူးခဲ့ဖူးပါသလား။

ယခုအခါ သင်၏ စိတ်ကူးအိပ်မက်များ အမှန်တကယ်ဖြစ်လာစေမည့် အခွင့်အလမ်းပေါ်ပေါက်လာပြီဖြစ်သည်။

အမေရိကန်ပြည်ထောင်စု၊ ဖလော်ရီဒါပြည်နယ်တွင် အံ့ဖွယ်အလှတရားများ ပိုင်ဆိုင်ထားသော ကိုယ်ပိုင်ကျွန်းတစ်ကျွန်း အရောင်းဈေးကွက်ဝင်လာကြောင်း အင်္ဂလန်အခြေစိုက် သတင်းဝက်ဘ်ဆိုက်တစ်ခုတွင် ဖော်ပြလာသည်။

မြေအကျယ်အဝန်း ၁ ဒသမ ၄ ဧကကျယ်ဝန်းသော နိဗ္ဗာန်ဘုံငယ်ကလေးသည် အရောင်းဈေးကွက်သို့ ပေါင် ၁၁ ဒသမ ၉ သန်းဖြင့် ဝင်ရောက်လာခြင်း ဖြစ်သည်။

ပင်မနေအိမ်ကို သဲသောင်ကမ်းခြေများ၊ အံ့ဖွယ်ပင်လယ်ရေပြင်များ ဝန်းပတ်နေသည်။

နေအိမ်အတွင်း ဇိမ်ခံအိပ်ခန်းများ၊ ခေတ်မီမီးဖိုဆောင်တစ်ခုပါဝင်ပြီး ကျယ်ဝန်းသော ဆိပ်ခံနေရာတစ်ခုအပြင် ကိုယ်ပိုင်ရေကူးကန်တစ်ခုလည်း ကျွန်းပေါ်တွင် ပါဝင်သေးသည်။

နေစာလှုံလိုသည့်အခါများတွင် နေအိမ်ရှေ့၌ လဲလျောင်းနားနေရန် နေရာတစ်ခုလည်း ပါဝင်သေးသည်။

ဝယ်လက်သည် လှေ ၄ စင်းဆိုက်ကပ်နိုင်သည့် ဆိပ်ခံရရှိမည့်အပြင် လှေတစ်စင်းလည်း ရရှိမည်ဖြစ်ကာ ရဟတ်ယာဉ်ကွင်းတစ်ခုလည်း ပိုင်ဆိုင်ဦးမည်ဟု ဆိုသည်။

ကျွန်းငယ်၏ အမည်မှာ East Sister Rock ဟု အမည်ရသည်။

အရောင်းဈေးကွက်တင်မှုတွင် ဖော်ပြထားချက်အရ “ သင်၏ သီးသန့်ကိုယ်ပိုင်ကျွန်းပေါ်သို့ ခိုလှုံနားနေလိုက်ပါ။ ပြိုင်ဖက်မရှိသည့် အလှတရားထံသို့ လှေဖြင့် ၅ မိနစ်ခရီးသာရှိပြီး ပြိုင်ဖက်ကင်း တစ်ကိုယ်ရည်လုံခြုံမှု၊ မိုင်ပေါင်းများစွာအထိ မျက်စေ့တဆုံးမြင်ကွင်းများ ပိုင်ဆိုင်ဦးမည်ဖြစ်သည် ”ဟု ဖော်ပြထားသည်။

နေအိမ်အတွင်း အိပ်ခန်း ၃ ခန်း၊ ရေချိုးခန်း ၂ ခန်း၊ နေအိမ်အကျယ်အဝန်း စတုရန်းပေ ၂၃၀၀ ရှိပြီး အခန်းတိုင်းမှ ပင်လယ်ရှုမျှော်ခင်း များကို တွေ့မြင်ရခြင်း၊ မြင့်မားသော မျက်နှာကြက်များ၊ ဆလိုက်မှန်တံခါးများ၊ သစ်ကြမ်းခင်းများကို နေအိမ်အတွင်း တွေ့ရသည်။

ကျွန်းငယ်ကို ကျုံးအသွင် မြေသားဖြင့် ဝန်းပတ်ပေးထားကာ ပင်မနေအိမ်အပြင် အိပ်ခန်း ၁ ခန်း၊ ရေချိုးခန်း ၁ ခန်းပါဝင်သည့် ဧည့်ဂေဟာ အိမ်တစ်လုံးလည်း ပါဝင်သေးသည်။

အစိုးရ၏ ရေ၊ မီးပေးဝေမှုစနစ်များ၏ ပြင်ပတွင်တည်ရှိပြီး ဆိုလာသုံးလျှပ်စစ်၊ မီးစက်တို့ဖြင့် ကိုယ်ပိုင်ရပ်တည်သည်။

ဝိုင်ဖိုင်ကွန်ရက်ရောက်ရှိပြီး ဝန်းကျင်ရှိ ကျောက်တန်းများသို့ လှည့်လည်ကြည့်ရှုခြင်း၊ ငါးဖမ်းခြင်း၊ ရေငုပ်ခြင်းများကို ကိုယ်ပိုင်ကျွန်းပေါ်မှ တဆင့်ပြုလုပ်နိုင်မည် ဖြစ်သည်။ ဈေးကွက်တင်ပေးလာသည်မှာ Private Islands Inc မှ ဖြစ်သည်။

Credit: iMyanmarHouse.com (iMyanmarHouse.com Team မှ ရေးသား ဖော်ပြသည်။)