အင်္ဂလန်နိုင်ငံ၊ လန်ဒန်မြို့တွင် နှစ်စဉ်ဝင်ငွေ ပေါင် ၇၀၀၀၀ (မြန်မာငွေ သန်း ၁၃၀၀ ကျော်) ရရှိနေသည့် ရေစင်ကြီးတစ်ခုကို ရောင်းချရန် အရောင်းဈေးကွက်တင်လာကြောင်း အင်္ဂလန်အခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
လန်ဒန်မြို့အရှေ့တောင်ပိုင်း Lewisham အရပ်တွင် တည်ရှိပြီး ပေ ၁၂၀ မြင့်မားသည်။
ရေစင်တွင် အထပ် ၇ ထပ်ပါဝင်ပြီး ရုံးခန်းတစ်ခုလည်း ပါဝင်ကာ အဆောက်အအုံထိပ်တွင် တယ်လီဖုန်းတိုင်တစ်ခု တပ်ဆင်ထားသည်။
ခေါ်ဈေးမှာ ပေါင် ၁ ဒသမ ၂၅ သန်းဖြစ်သည်။ အပေါ်ဆုံးရှိ အထပ် ၂ ထပ်ကို တယ်လီဖုန်းဆက်သွယ်ရေးကုမ္ပဏီ ၂ ခုထံ အငှားချထားပြီး ယင်းကုမ္ပဏီများက အဆောက်အအုံထိပ်တွင် ဖုန်းတာဝါတိုင်များ တပ်ဆင်ထားကြသည်။
ဝိတိုရိယတာဝါဟု အမည်ပေးထားသည့် အဆိုပါရေစင်တွင် မြေအောက်ခန်းလည်း ပါဝင်ပြီး လက်ရှိငှားရမ်းနေထိုင်သူက ဂီတအသံဖမ်းစတူဒီယိုအဖြစ် အသုံးပြုထားသည်။
မျှော်စင်ဘေးတွင် ကပ်လျက် ငါးထပ်အမြင့်ရှိ မျှော်စင်ငယ်တစ်ခု ထပ်မံဆောက်လုပ်ထားပြီး ပင်မမျှော်စင်နှင့် စင်္ကြန်တံတားဖြင့် ဆက်သွယ်ထားသည်။
ရေစင်၏ အထပ် ၄ ခုမှာ နှစ်စဉ်အငှားချထားပြီး အခြား ၃ ထပ်ကိုမူ ကာလတို ငှားရမ်းထားသည်။
အဆိုပါငှားရမ်းခစုစုပေါင်းမှာ တစ်နှစ်လျှင် ပေါင် ၇၁၀၀၀ ကျော်ရှိပြီး တယ်လီဖုန်းကုမ္ပဏီများကို အငှားချထားမှုမှ ရရှိငွေ ပေါင် ၃၁၅၀၀ လည်း အပါအဝင် ဖြစ်လေသည်။
“ ဒါက တော်တော်ရှားတဲ့ အရောင်းအဝယ်မျိုးပါ။ ကျွန်တော်အရင်က ဒါမျိုးတစ်ခုမျှ အရောင်းအဝယ်လုပ်မပေးခဲ့ဖူးဘူး။ ရေစင်ကို မွမ်းမံပြောင်းလဲထားတဲ့ အဆောက်အအုံမျိုးဆိုတာ ဈေးကွက်မှာ ခဏခဏတွေ့နိုင်တာမျိုးမဟုတ်ပါဘူး။ အထူးသဖြင့် ဆက်သွယ်ရေးကုမ္ပဏီတွေနဲ့ ဆက်နွှယ်နေတဲ့ အရောင်းအဝယ်မျိုးက ပိုပြီးရှားပါးပါတယ်”ဟု ဈေးကွက်တင်ပေးသည့်ကုမ္ပဏီ SHW မှ ဒါရိုက်တာ ရစ်ချတ် ပီလိုက ပြောကြားသည်။
အဆိုပါ ရေစင်ကို ၁၈၉၈ ခုနှစ်မှ ၁၉၀၀ ပြည့်နှစ်များအကြား Art Workers Guild တည်ထောင်သူ အားနက်စ် နယူးမန်းက ဆောက်လုပ်ခဲ့ခြင်း ဖြစ်သည်။
Art Workers Guild သည် ပန်းချီ၊ ပန်းပုနှင့် ဗိသုကာပညာရှင်များဆိုင်ရာ အဖွဲ့ဖြစ်ပြီး ယနေ့တိုင် တည်ရှိနေဆဲဖြစ်သည်ဟု ဆိုသည်။
အောက်ခံကျောက်တုံးကြီးပေါ်တွင် အနီရောင်အုတ်များဖြင့် ဆောက်လုပ်ထားကာ အစိမ်းရောင်သုတ်ထားသည့် သံရေစည်ကြီးလည်း ပါဝင်သည်။
မူလက အနီးဝန်းကျင်ရှိ နေအိမ်များကို ရေပေးဝေခဲ့သည်ဟု ဆိုသည်။
အဆောက်အအုံ၏ ဖြတ်သန်းခဲ့သောနှစ်ကာလများစွာအတွင်း ပိုင်ရှင်မျိုးစုံပြောင်းလဲခဲ့ရာ ပိုင်ရှင်တစ်ဦးက ပင်မရေစင်ဘေးတွင် ကပ်လျက် ၅ ထပ်အမြင့်ရှိ မျှော်စင်တစ်ခု ထပ်မံဆောက်လုပ်ခဲ့ခြင်း ဖြစ်သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
