တရုတ်ပြည်၏ အချမ်းသာဆုံးသူဌေးကြီးများတွင် အပါအဝင်ဖြစ်သော Dalian Wanda Group ၏ ပိုင်ရှင်ဖြစ်သူ ဝမ်ကျန်းလင်နှင့် ကျိလင်းပြည်နယ် အုပ်ချုပ်ရေးအဖွဲ့ကို တရားမဝင်ဂေါက်ကွင်းများ တည်ဆောက်လုပ်ကိုင်ခြင်း၊ အားပေးအားမြှောက်ပြုလုပ်ခြင်းတို့ အတွက် တရုတ်သဘာဝပတ်ဝန်းကျင် ဝန်ကြီးဌာနက အပြင်းအထန် ရှုတ်ချလိုက်ကြောင်း ရှန်ဟိုင်းအခြေစိုက် အိမ်ခြံမြေ သတင်းဝက်ဘ်ဆိုက်တစ်ခုတွင် ဖော်ပြသည်။
တရုတ်နိုင်ငံတွင် မကြာသေးမီနှစ်များအတွင်း သဘာဝပတ်ဝန်းကျင်ထိခိုက်စေသည့် ဂေါက်ကွင်းများ ဖောက်လုပ်ခြင်းကို ပိတ်ပင်ထားသည်။
ကျိလင်းပြည်နယ် အရှေ့မြောက်ပိုင်း၊ ချန်ပိုင်တောင်ပေါ်တွင် Dalian Wanda Group က ပိုင်ဆိုင်ထားသည့် ဇိမ်ခံဂေါက်ကွင်းနှစ်ခုမှာ ဒေသတွင်းအစိုးရအဖွဲ့၏ အကူအညီဖြင့် ဖောက်လုပ်ခဲ့ကာ အချိန်အတန်ကြာ လည်ပတ်လုပ်ကိုင်ခဲ့ကြောင်း တရုတ်သဘာဝပတ်ဝန်းကျင် ဝန်ကြီးဌာန၏ စုံစမ်းစစ်ဆေးမှုအစီရင်ခံစာတွင် ဖော်ပြသည်။
တရုတ်သဘာဝပတ်ဝန်းကျင်ဝန်ကြီးဌာနမှ စုံစမ်းစစ်ဆေးခဲ့ပြီးနောက်ပိုင်း ပြီးခဲ့သော အောက်တိုဘာလအတွင်း အဆိုပါ ဂေါက်ကွင်းနှစ်ခုကို ပိတ်သိမ်းစေခဲ့ခြင်း ဖြစ်သည်။
Dalian Wanda Group က ချန်ပိုင်တောင်တွင် နိုင်ငံတကာနှင်းလျှောစီးစခန်းစီမံကိန်း အကောင်အထည်ဖော် ဆောက်လုပ်စဉ်အတွင်း လုပ်ထုံးလုပ်နည်းများကို ချိုးဖောက်ကာ ဂေါက်ကွင်း ၂ ခုနှင့် လူနေအိမ် ၉၃ လုံးဆောက်လုပ်ခဲ့ကာ အချိန်အတန်ကြာ လည်ပတ် လုပ်ကိုင်ခဲ့ကြောင်း စုံစမ်းစစ်ဆေးတွေ့ရှိခဲ့သည်ဟု ဆိုသည်။
အဆိုပါဥပဒေချိုးဖောက်မှုကို မသိကျိုးကျွံပြုနေသည့် ပြည်နယ်အစိုးရအဖွဲ့ကိုလည်း သဘာဝပတ်ဝန်းကျင်ဝန်ကြီးဌာနက ဝေဖန်ရှုတ်ချခဲ့သည်။
တရုတ်သဘာဝပတ်ဝန်းကျင်ဝန်ကြီးဌာနသည် အဆိုပါစီမံကိန်း၏ ဥပဒေချိုးဖောက်မှုများကို ဖော်ထုတ်ရန် ၂၀၁၁ ခုနှစ်ကတည်းက များစွာကြိုးပမ်းခဲ့ကြသည်။
သို့ရာတွင် ပြည်နယ်အစိုးရက အဆိုပါကြိုးပမ်းမှုများကို ပိတ်ဆို့ဟန့်တားခဲ့သည့်အပြင် ဖုံးကွယ်ရန်ပင်ကြိုးစားခဲ့ကြသည်ဟု ဆိုသည်။
Dalian Wanda Group ၏ အပန်းဖြေစခန်းစီမံကိန်းတွင် ဇိမ်ခံဂေါက်ကွင်း ၂ ခုမှာ အရေးပါပြီး ၂၀၀၈ ခုနှစ်က စတင်ဖွင့်လှစ်ခဲ့ခြင်းဖြစ်ကာ ယွမ်ငွေ ၂၆ ဘီလီယံ (ကန်ဒေါ်လာ ၃ ဒသမ ၉ ဘီလီယံ) ရင်းနှီးမြှုပ်နှံခဲ့သည်ဟု ဆိုသည်။
အပန်းဖြေစခန်းအတွင်း ဂေါက်ကွင်းများ၊ နှင်းလျှောစီးစခန်း၊ စီးပွားရေးလုပ်ငန်းဆိုင်ရာ အဆောက်အအုံများ၊ ကျန်းမာရေးနှင့်အားကစားဆိုင်ရာ စင်တာများ ပါဝင်သည်။
သဘာဝပတ်ဝန်းကျင်ဝန်ကြီးဌာနက ၂၀၁၁ ခုနှစ်တွင် ယင်းစီမံကိန်းနှင့် ပတ်သက်သည်များကို ဖော်ထုတ်ရန် လမ်းညွှန်ခဲ့သော်လည်း ဒေသတွင်းအစိုးရအဖွဲ့က ယင်းဂေါက်ကွင်းများကို ပိတ်သိမ်းစေကာ ဖျက်သိမ်းခဲ့ပြီးဖြစ်ကြောင်း ကြိမ်ဖန်များစွာ အခိုင်အမာ ပြောဆိုခဲ့ကြသည်။
သို့ရာတွင် ၂၀၁၆ ခုနှစ်၊ ဇွန်လတွင် ဂေါက်ရိုက်ပြိုင်ပွဲတစ်ခုပင် လက်ခံကျင်းပခဲ့သေးကာ အောက်တိုဘာလကမှ ပိတ်သိမ်းသွားခဲ့ခြင်းလည်း ဖြစ်သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
