လူတိုင်းဘဝမှာ အရင်းအနှီးတိုးပွားပြီးကြီးပွားချမ်းသာဖို့အတွက်ဆိုရင် မိမိပတ်ဝန်းကျင်အနီးအနားမှာဖြစ်ဖြစ် အလှမ်းဝေးသောအရပ်မှာပဲဖြစ်ဖြစ် သွားရောက်ပြီး ရင်းနှီးမြှုပ်နှံချင်ကြတယ်။ အထူးသဖြင့် အိမ်ခြံမြေအရာင်းအဝယ်လုပ်ငန်းမှာ ရင်းနှီးမြှုပ်နှံသူတွေဟာ မိမိဘဝကြီးပွားတိုးတက်ဖို့အတွက် ရန်ကုန်၊ မန္တလေး၊ ပြင်ဦးလွင် စသဖြင့် မည်သည့်အရပ်ဒေသမှာဖြစ်ဖြစ် ရင်းနှီးမြှုပ်နှံလိုကြတယ်။
ရွှေအကြောင်းဖယောင်းကသိ၊ မြေအကြောင်းရာဇဝင်မှာကြည့်
ကြီးပွားတိုးတက်ဖို့အတွက် မြေမှာရင်းနှီးမြှုပ်နှံတာတော့ မှန်ပါပြီ။ ဒါပေမဲ့ မြေဆိုတာမျိုးကလည်း မြေအမျိုးအစားတွေက ''ရန်ကုန်'' ၊ ''မန္တလေး'' မတူသလို ''နေပြည်တော်၊ ပြင်ဦးလွင်'' စတဲ့မြေတွေကလည်း အနေအထားအခေါ်အဝေါ် မတူကြပြန်ပါဘူး။ အခေါ်အဝေါ်မတူသလို တန်ဖိုးကလည်းမတူပါဘူး။ တန်ဖိုးကွာခြားချက်သိချင်ရင်တော့ ရွှေအကြောင်းဖယောင်းမှာသိဆိုသလို မြေအကြောင်းသိချင်ရင်ရာဇဝင်လေ့လာကြည့်မှသာ ပြည့်ပြည့်စုံစုံမှန်မှန်ကန်ကန် သိရှိနိုင်မှာဖြစ်ပါတယ်။
စေ့စေ့စပ်စပ်လေ့လာပါ၊ အမှားနည်းသွားမှာ
ရန်ကုန်သူတစ်ဦးက ကိုယ်နေတဲ့အရပ်နဲ့ဝေးတဲ့ ပြင်ဦးလွင်(မေမြို့)လို နေရာမျိုးမှာ မြေဝယ်ပြီး မြှုပ်နှံထားချင်တယ်ဆိုရင်တော့ ဝယ်ယူမဲ့မြေရာဇဝင် မြေသမိုင်းရှေ့ပြေးလေ့လာထားသင့်တာကတော့အမှန်ပဲ။ ဒီတော့ ကိုယ်မကျွမ်းကျင်တဲ့ နယ်မြေမှာ မြေကွက်ဝယ်တော့မယ်ဆိုရင်တော့ ရောင်းသူထံမှာရှိတဲ့ တရားဝင်ပိုင်ဆိုင်မှုအထောက်အထားတွေကို တောင်းယူကြည့်ရမှာပဲ။ ရောင်းသူပြသတဲ့ စာရွက်စာတမ်းတွေဟာ မှန်ရဲ့လား။ စာချုပ်အဆက်အစပ်တွေကတော့ ကွင်းဆက်မပြတ်ရှိရဲ့လား စစ်ဆေးကြည့်ရပါမယ်။
ခိုင်မာကြောင်းသက်သေပြသဖို့ရောင်းသူတာဝန်
ဥပမာ - ပြင်ဦးလွင်မြို့နယ်ကမြေကွက်ကို ရန်ကုန်မှာပဲ အရောင်းအဝယ်လုပ်ကြတယ်ဆိုရင် ဝယ်မဲ့သူက မြေရာဇဝင်စစ်ဆေးတတ်ဖို့ လိုပြီလေ။ ရောင်းသူကလည်း မြေကွက်နဲ့ပက်သက်ပြီး အရှုတ်အရှင်းဖြစ်လာရင်တာဝန်ယူတဲ့အပြင်၊ မိမိရောင်းမဲ့မြေကွက်ဟာ ဘယ်လိုမြေအမျိုးအစားဖြစ်တယ်၊ ဘယ်သူအမည်ပေါက်တယ်၊ ပုံစံ (၇) ရပြီးလို့၊ ပုံစံ (၁၀၅) ထွက်နေတဲ့ မြေကွက်ကြီးအထဲမှ ခွဲစိတ်ဝယ်ယူထားတဲ့ မြေကွက်ဖြစ်တယ် စသဖြင့် အာမခံချက်ပေးဖို့လိုတာပေါ့။
မြေအရောင်းအဝယ်လုပ်ရာမှာအုပ်ချုပ်ရေးမှူးဆိုတာသက်သေပါ
အဲဒီလိုမဟုတ်ပဲ ရောင်းသူဘက်ကပြောတတ်တဲ့ ဓလေ့တစ်ခုရှိတယ်။ ကျွန်မတို့ဝယ်ထားစဉ်က ရပ်ကွက်အုပ်ချုပ်ရေးမှူး/ကျေးရွာအုပ်ချုပ်ရေးမှူး အသိသက်သေထား စာချုပ်ပြီးဝယ်ထားတာ မြေအမည်ပေါက်လည်းမှန်တယ်၊ ပိုင်ရှင်ကိုယ်တိုင်လက်မှတ်ထိုးပြီးရောင်းထားတာဖြစ်တယ်ဆိုပြီး အာမခံကြလေ့ရှိတယ်။ တကယ့်လက်တွေ့မှာ ရောင်းသူကပြောသလို အုပ်ချုပ်ရေးမှူးရှေ့မှာချုပ်ထားတဲ့ အရောင်းအဝယ်စာချုပ်တစ်ခုက ခိုင်မာပြီလို့ မဆိုနိုင်ပါဘူး။
မြေနဲ့ပက်သက်လာရင်မြေစာရင်းမှူးကအသိဆုံး
ဘာကြောင့်လဲဆိုတော့ ရပ်/ကျေးအုပ်ချုပ်ရေးမှူးများဟာ မြို့နယ်မြေစာရင်းမှူးမဟုတ်လို့ပါဘဲ၊ အုပ်ချုပ်ရေးမှူးဆိုတာ ရပ်ကွက်/ကျေးရွာ အေးချမ်းသာယာရေးအတွက် ဆောင်ရွက်နိုင်ကြပေမဲ့ မြို့ရွာနှင့်အိုးအိမ်များအကြောင်းကိုတော့ မြို့နယ်မြေစာရင်းဦးစီးမှူးလောက်သိနိုင်ကြမှာ မဟုတ်ပါဘူး။ ဒါကြောင့် မြို့မှာနေသူပဲဖြစ်ဖြစ် တောမှာနေသူပဲဖြစ်ဖြစ် မြေဝယ်တော့မယ်ဆိုရင် မိမိတို့နေထိုင်ရာ မြို့နယ် မြေစာရင်းဦးစီးဌာနရုံးမှာ အရင်ဆုံးသွားရောက်ဆုံစမ်းပြီးမှ ဝယ်တာအကောင်းဆုံးပါဘဲ။ စာရေးသူက ယခုလို မြေအကြောင်းစဉ်းစားနေစဉ်မှာပဲ ရန်ကုန်သူ ''ခင်ခင်ဦး'' တစ်ယောက် စာရေးသူရုံးခန်းကို ရောက်လာပါတယ်။ ရောက်ရောက်ချင်းပဲ ''သူမ'' ဝယ်လိုတဲ့ မန္တလေးတိုင်း ပြင်ဦးလွင်မြို့နယ်၊ ညောင်နီကျေးရွာအုပ်စု ကွင်းအမှတ် ( )၊ ရပ်ကွက်ကြီး(၁၄)က (အလျား ၅၀ပေxအနံ ၁၀၀ပေ)ရှိတဲ့ မြေကွက်ကိုဝယ်လိုသဖြင့် မြေကွက်နဲ့ပက်သက်တဲ့ စာရွက်စာတမ်းတွေကို နေရာအနေအထား မှတ်တမ်းတွေနဲ့တကွ ထုတ်ပြပါတယ်။
ပြင်ဦးလွင်မြို့နယ်ကညောင်နီကျေးရွာမှာမြေဝယ်ချင်သူပါ
ခင်ခင်ဦး ပြသောစာရွက်စာတမ်းများမှာ ကွင်းအမှတ်၊ မြေကွက်အမှတ်ပါရှိပြီး မြေတိုင်းမြေပုံအကြမ်းစာရွက် (ကရကဝင်ပုံစံ-၁၀၅)မဟုတ်သေးသည့်စာရွက်နဲ့ မူလအမည်ပေါက်သူထံမှ အရပ်ကတိအရောင်းအဝယ်စာချုပ်တွေ ဖြစ်ပါတယ်။ ညောင်နီကျေးရွာ ရပ်ကွက်ဖော်ထုတ်ထားပုံ လမ်းအနေအထား မီးတိုင်စိုက်ထားသည့်အနေအထားတို့ကို ဓာတ်ပုံမှတ်တမ်းတွင် တွေ့ရပါတယ်။
ကျေးရွာအုပ်ချုပ်ရေးမှူးလက်မှတ်မြင်တွေ့ရ ပြည့်စုံပြီလို့ထင်ပြီဗျ
သာမန်အနေထားဖြင့်ကြည့်လျှင် နေရာအနေအထားနဲ့ဈေးနှုန်းသက်သာမှုတို့ကြောင့် ''ခင်ခင်ဦး'' က ဝယ်ယူဖို့ဆန္ဒပြင်းပြနေတာကို တွေ့ရပါတယ်။ ပြီးတော့ အရောင်းအဝယ်စာချုပ်ကြည့်လိုက်တဲ့အခါမှာလည်း ကျေးရွာအုပ်ချုပ်ရေးမှူးက စည်းတံဆိပ်တွေနဲ့ အသိသက်သေ လက်မှတ်ရေးထိုးထားတယ်ဆိုတော့ ခိုင်မာတယ်လို့ ထင်ရတာပေါ့။
ဥယျာဉ်မြေများအခြားနည်းအသုံးပြုခွင့်ကျပြီလား
ဒါပေမဲ့ အဲ့ဒီမြေကွက်က (ပုံစံ-၇) ရပြီးဖြစ်တဲ့ ''ဥယျာဉ်ခြံမြေ'' လား ပုံစံရထားတာမှန်ရင် အခုလိုမြေကွက်တွေ ရိုက်ခွင့်ပြုထားတဲ့ (မြေစာရင်းပုံစံ-၁၀၅) ရပြီလား။ ဗဟိုလယ်ယာ မြေစီမံခန့်ခွဲမှုကော်မတီကနေ ဥယျာဉ်ခြံမြေတွေကို အခြားနည်းသုံးခွင့်ပြုမိန့်ပြုထားတဲ့ မြေဖြစ်ပြီလား။ အဲ့ဒီအထောက်အထား စာရွက်တရွက်၊ မိတ္တူတွေပြပါလို့မေးကြည့်တော့ ''ခင်ခင်ဦး'' မှာပါမလာဘူး။ မူလပိုင်ရှင်မှာလဲ မရှိဘူး။ ဒီလိုမပြနိုင်ရင်တော့ ရောင်းသူထံကယူလာတဲ့ အရပ်ကတိအရောင်းအဝယ်ကိုကြည့်ပြီး ရန်ကုန်မှာဘဲ မြေကွက်အရောင်းအဝယ်လုပ်မယ်ဆိုရင်တော့ မြေရာဇဝင် အသေအချာမသိနိုင်သေးလို့ မဝယ်သင့်သေးဘူး။ ဖြစ်နိုင်ရင် ကိုယ်တိုင်မြို့မြေစာရင်းမှာ သွားရောက်စုံစမ်းကြည့်ပြီးမှ ဝယ်သင့်ပါတယ်လို့ အကြံပေးလိုက်ပါတယ်။
လွှတ်တော်ရှေ့နေ မောင်ကောင်းဖေ မှ iMyanmarHouse.com (အိုင်မြန်မာဟောက်စ်ဒေါ့ကွန်း) အတွက် အထူးရေးသားဖော်ပြသည်။
Credit: iMyanmarHouse.com
