အမေရိကန်ပြည်ထောင်စု၊ လော့စ်အိန်ဂျလိမြို့တွင် မွေးဖွားသည့် မီဂန်မာကယ်လ်သည် ဗြိတိန်၏ တော်ဝင်မင်းသား ဟယ်ရီနှင့် တရားဝင်စေ့စပ်ခဲ့ပြီးဖြစ်ကာ လာမည့်နှစ်တွင် လက်ထပ်ကြတော့မည် ဖြစ်သည်။
၂၀၁၈ ခုနှစ် နွေရာသီတွင် လက်ထပ်ပွဲကျင်းပပြီးပါက ၎င်းတို့ဇနီးမောင်နှံသည် ကန်ဆင်တန်နန်းတော်ဝန်းအတွင်းရှိ မင်းသားဟယ်ရီ၏ အိပ်ခန်း ၂ ခန်းပါ နော်တင်ဟမ်စံအိမ်တွင် နေထိုင်ကြမည် ဖြစ်သည်။
မင်းသားဟယ်ရီသည် ကန်ဆင်တန်နန်းတော်ဝန်းကျင်တွင် ငယ်စဉ်ကတည်းက နေထိုင်ခဲ့သူဖြစ်ရာ ၎င်းအတွက် မည်သို့မျှ ထူးခြားပြောင်းလဲသွားမည်မဟုတ်သော်လည်း မာကယ်လ်အတွက်မူ ကြီးမားသည့်အပြောင်းအလဲတစ်ရပ် ဖြစ်လာတော့မည် ဖြစ်၏။
လွန်ခဲ့သည့် ၇ နှစ်တာကာလအတွင်း မီဂန်မာကယ်လ်သည် တိုရွန်တိုတွင် နေထိုင်ကာ Suits အမည်ရှိ ဒရာမာဇာတ်ကားတွင် ပါဝင်သရုပ်ဆောင်ခဲ့သည်။
မကြာမီကာလအတွင်းတွင် မာကယ်လ်သည် တိုရွန်တိုကို ကျောခိုင်းကာ ပိုမိုသာယာလှပသည့်ဝန်းကျင်တွင် အခြေချတော့မည်လည်း ဖြစ်၏။
သို့စေကာမူ သူနေထိုင်ခဲ့ရာ တိုရွန်တိုနေအိမ်သည် ဘိုတဲဟန်ဆောက်လုပ်ထားပြီး သူ့ဟန်နှင့်သူ လှပသည့်နေအိမ်ကလေးဖြစ်သည်ဟု ဆိုနိုင်သည်။
မီဂန်မာကယ်လ်သည် သူ၏အင်စတာဂရမ်အကောင့်တွင် နေအိမ်တွင်း အပြင်အဆင်ပုံများ မကြာခဏလွှင့်တင်လေ့ရှိ၏။
သူ၏ဒီဇိုင်းပြင်ဆင်မှုများတွင် ကယ်လီဖိုးနီးယားတောင်ပိုင်းဒေသဟန်များ သြဇာလွှမ်းသည်ကို တွေ့ရသည်။
နေအိမ်အခန်းတိုင်းတွင် နွေးထွေးမှုနှင့် စတိုင်ကျမှုတို့ လွှမ်းမိုးထားသည်။
သိုးမွှေးအဖြူရောင်များ၊ သစ်သားပရိဘောဂများနှင့် ပီယိုနီပန်းပင်များကို နေအိမ်တစ်ခုလုံးတွင် အနှံ့အပြားတွေ့ရသည်။
မီဂန်မာကယ်လ်သည် အဆိုပါဒီဇိုင်းအပြင်အဆင်များကို သူ၏အနာဂတ်နေအိမ်ဖြစ်သော ကန်ဆင်တန်နန်းတော်သို့ ဆောင်ကြဉ်းမလာဟု မည်သူပြောနိုင်ပါမည်နည်း။
ဧည့်ခန်းမှာ အလင်းနှင့် လေဝင်လေထွက်ကောင်းမွန်ပြီး အချစ်တော်ခွေးနှစ်ကောင်ဖြစ်သော ဘိုဂါ့ထ်နှင့် ဂိုင်းတို့မှာ အဖြူရောင်ဆိုဖာပေါ်တွင် ငိုက်မြည်းနေသည်ကို တွေ့ရလေ့ရှိသည်။
စကျင်ကျောက်ဖြင့် ပြုလုပ်ထားသော ကာရာရာအမျိုးအစား ညစာစား စားပွဲဘေးတွင် Eames အမျိုးအစား အဖြူရောင်ကုလားထိုင်တစ်လုံးဖြင့် အလှဆင်ထားသည်ကို တွေ့ရသည်။
ယင်းအခန်းတွင်လည်း သူ၏ အကြိုက်ဆုံး ပီယိုနီပန်းအိုးကို တွေ့ရသည်။
အပန်းဖြေခန်းတွင် ပြတင်းပေါက်နှင့် မျက်နှာချင်းဆိုင်နံရံတွင် မှန်တစ်ချပ်ထားရှိရာ အခန်းကို နေရာပိုမိုကျယ်ဝန်းသွားဟန် ပေါ်လာအောင် ဖန်တီးထားသည်ကို တွေ့ရသည်။ ယင်းအခန်းတွင်မူ ပီယိုနီပန်းများ မတွေ့ရချေ။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
