အာရှငွေပေးချေရေးအဖွဲ့ (APN) သို့ ဝင်ရောက်ရန် ပြည်တွင်း၌ ဆောင်ရွက်နေသည့် ငွေရေးကြေးရေး ဝန်ဆောင်မှုကဏ္ဍများကို ရှင်းပြခဲ့ပြီးဖြစ်သည့်အတွက် ဝင်ရောက်ခွင့်ရလဒ်ကို ၂၀၁၈ ခုနှစ်အတွင်း ထုတ်ပြန်မည်ဖြစ်ကြောင်း Myanmar Payment Union (MPU) အမှုဆောင်အရာရှိချုပ် ဦးဇော်လင်းထွဋ်က ပြောကြားသည်။
“ဝင်ခွင့်ရဖို့က တော်တော်လေး အလားအလာ ကောင်းပါတယ်။ လေးနှစ်အတွင်းမှာ နိုင်ငံအဆင့် အဖွဲ့အစည်း တည်ထောင်ခဲ့ပြီး ကတ်တွေ ထုတ်နိုင်တယ်။ တခြားဟာတွေနဲ့ ပတ်သက်ပြီး အားနည်းချက်တွေ ရှိပေမယ့် ဒါတွေက အချိန်ကြာ လာတာနဲ့အမျှ ပြုပြင်နိုင်မှာဖြစ်လို့ ဘာမှ စိုးရိမ်စရာမရှိပါဘူး”ဟု ၎င်းကဆိုသည်။
လက်ရှိတွင် MPU ကတ်များမှာ ပြည်ပ၌ အသုံးပြု၍ မရသည့်အတွက် နိုင်ငံတကာတွင် ကွန်ရက်ဖြန့်ကြက်ထားသည့် တရုတ်အခြေစိုက် ကတ်ကုမ္ပဏီ UPI နှင့် ဂျပန်နိုင်ငံ အခြေစိုက် ကတ်ကုမ္ပဏီ JCB တို့နှင့် MoU ရေးထိုးထား ပြီး ယင်းကတ်များဖြင့် ငွေထုတ်ခြင်းနှင့် ငွေပေးချေခြင်းများ ဆောင်ရွက်နိုင် ကြောင်း MPU ထံမှ သိရသည်။
“APN နဲ့ ချိတ်ထားရင် အာရှတိုက်တစ်ခွင်မှာ MPU ကတ်ကို သုံးလို့ရမယ်။ ဥရောပဘက်မှာ MPU ကတ်ကို အသုံးပြုနိုင်ဖို့ကိုတော့ Visa တို့၊ Master တို့နဲ့ ဆွေးနွေးနေတယ်”ဟု MPU အဖွဲ့၏ ဥက္ကဋ္ဌဟောင်းဖြစ်သူ ဦးမြသန်းက ပြောဆိုသည်။
လတ်တလောတွင် ATM စက်များနှင့် ATM ကတ်များကို အဆင့်မြှင့်ထားခြင်းများ ဆောင်ရွက်ထားသောကြောင့် လာမည့်နှစ်တွင် စက်အတွင်း ကတ်ညပ်ခြင်းများကို ဖြေရှင်းနိုင်မည်ဖြစ်ပြီး ဘဏ်မတူသည့် ကတ်များ အချင်းချင်းလည်း ငွေလွှဲနိုင်မည်ဖြစ်သည်။
Credit: The Voice
