အိမ်ခြံမြေစည်းမျဉ်းတင်းကျပ်မှုများပြုလုပ်လာပြီးနောက် တရုတ်စီးပွားရေးအရှိန်နှေး

လေထုညစ်ညမ်းမှုလျှော့ချရေးစီမံချက်များနှင့် အိမ်ခြံမြေဈေးကစားမှုနှိမ်နင်းရန် ရည်ရွယ်သော စည်းမျဉ်းတင်းကျပ်မှုများ ပိုမိုပြုလုပ်လာသည့်နောက် တရုတ်ကုန်ထုတ်လုပ်မှု၊ ရင်းနှီးမြှုပ်နှံမှုနှင့် စားသုံးမှုတို့သည် သိသိသာသာ အရှိန်နှေးလာကြောင်း သိရသည်။

ပြီးခဲ့သည့် လ (ယခုနှစ် အောက်တိုဘာ) တွင် စက်မှုကုန်ထုတ်လုပ်မှု
တိုးတက်မှုနှုန်းသည် ၆ ဒသမ ၂ ရာခိုင်နှုန်း ရှိခဲ့ပြီး စက်တင်ဘာဖွံ့ဖြိုးမှုနှုန်း
အောက် ၀ ဒသမ ၄ ရာခိုင်နှုန်း ကျဆင်းခဲ့ကြောင်း တရုတ်အမျိုးသားစာရင်းအင်း
ဗျူရိုက ယခုသီတင်းပတ် အင်္ဂါနေ့ (နိုဝင်ဘာ ၁၄) ၌ ထုတ်ပြန်ခဲ့သည်။

စည်းမျဉ်းတင်းကျပ်မှုများကြောင့် ဘိလပ်မြေ၊ ကိုလာအချိုရည်၊ စတီးပစ္စည်းများနှင့် သံဓာတ်မပါသော သတ္တုများ ကဲ့သို့သော ပတ်ဝန်းကျင်အပေါ် ၀န်လေးစေသည့် အရာများထုတ်လုပ်မှုသည် ကျဆင်းခဲ့သည်။ ထုတ်လုပ်မှုအလုံးစုံ၏ အဓိက
လိုအပ်ချက်ဖြစ်သော လျှပ်စစ်ဓာတ်အားထုတ်လုပ်ဖြစ်ပေါ်မှုပမာဏသည်လည်း ၁၆ လအတွင်း အနှေးကွေးဆုံးဖွံ့ဖြိုးခဲ့ကြောင်း သိရသည်။

ပြီးခဲ့သည့်နှစ်ကတည်းက ပေကျင်းနှင့် ရှန်ဟိုင်းတို့ ကဲ့သို့သော မြို့ကြီးများ၌ အိမ်ခြံမြေ၀ယ်ယူမှုဆိုင်ရာ တင်းကျပ်မှုများက နိုင်ငံ့စီးပွားရေးဖွံ့ဖြိုးမှုအတွက် နောက်ထပ်အတားအဆီးတစ်ခု ဖြစ်သည်။

ဇန်န၀ါရီမှ အောက်တိုဘာအထိ ဆယ်လတာအတွင်း ရောင်းချရသည့် အဆောက်အအုံကြမ်းခင်းနေရာပမာဏသည် ယမန်နှစ် ထိုကာလက ရောင်းချခဲ့ရမှုထက် ၈ ဒသမ ၂ ရာခိုင်နှုန်းသာ မြင့်တက်ခဲ့ပြီး ဇန်န၀ါရီမှ စက်တင်ဘာအထိ ကိုးလတာအတွင်း မြင့်တက်မှုနှုန်းအောက် ၂ ဒသမ ၁ ရာခိုင်နှုန်း လျော့နည်းခဲ့သည်။ အောက်တိုဘာတစ်လတည်းကို ကြည့်ပါက ယမန်နှစ်အောက်တိုဘာအောက် ၆ ရာခိုင်နှုန်း ကျဆင်းခဲ့ပြီး မြင့်တက်ဖွံ့ဖြိုးနှုန်း ဆက်တိုက်ကျဆင်းသည့် ဒုတိယမြောက်လ ဖြစ်ခဲ့သည်။

ကာလရှည်အတိုးနှုန်းများသည် မြင့်တက်လာပြီး နောက်ထပ်စီးပွားရေးလေဆန်ကို ပံ့ပိုးပေးနေသည်။ စုစုပေါင်းအိမ်ခြံမြေရင်းနှီးမြှုပ်နှံမှုသည် ယခုနှစ် ဇန်န၀ါရီမှ အောက်တိုတာအထိ ဆယ်လတာအတွင်း ယမန်နှစ် ထိုကာလကထက် ၇ ဒသမ ၈ ရာခိုင်နှုန်း မြင့်တက်ခဲ့သည်။ ယင်းဖွံ့ဖြိုးနှုန်းသည် စက်တင်ဘာအထိ ကိုးလတာအတွင်း ဖွံ့ဖြိုးမြင့်တက်နှုန်းအောက် နှေးကွေးခဲ့ကြောင်း သိရသည်။

ခင်အေးချမ်း မှ iMyanmarHouse.com (အိုင်မြန်မာဟောက်စ်ဒေါ့ကွန်း) အတွက် အထူးဘာသာပြန် ရေးသားဖော်ပြသည်။
Credit: iMyanmarHouse.com