စင်္ကာပူမြေစိုက်အိမ် ဈေးကျသဖြင့် ရောင်းအား တဟုန်ထိုးမြင့်တက်

စင်္ကာပူနိုင်ငံတွင် မြေစိုက်အိမ်ဈေးများသည် အမြင့်ဆုံးဖြစ်ခဲ့သည့် ၂၀၁၃ ခုနှစ်
တတိယသုံးလပတ်နောက်ပိုင်းကတည်းက ၀ယ်ယူချင်စဖွယ် ကျဆင်းလာခဲ့သည်။

ထို့ကြောင့် ယခုနှစ်အတွင်း ဇန်န၀ါရီမှ အောက်တိုဘာအထိ ပြီးခဲ့သည့် ဆယ်လတာအတွင်း မြေစိုက်အိမ်ရောင်းအား တဟုန်ထိုး မြင့်တက်ခဲ့ပြီး စင်္ကာပူအိမ်ခြံမြေဈေးကွက်အတွင်း ဆက်လက်နာလန်ထူခဲ့ကြောင်း Business Times က ဖော်ပြခဲ့သည်။

၎င်းဆယ်လတာအတွင်း ရောင်းချရသည့် မြေစိုက်အိမ်အရေအတွက်သည် ၁,၅၁၃ အိမ် ရှိခဲ့သည်။ ၁,၀၀၉ အိမ်ရောင်းချခဲ့ရသည့် ယမန်နှစ် ထိုကာလကထက် ရောင်းအား ရာခိုင်နှုန်း ၅၀ မြင့်တက်ခဲ့ခြင်း ဖြစ်ကြောင်း သိရသည်။

ရောင်းအားသည် အရောင်းအ၀ယ်တန်ဖိုးပမာဏအားဖြင့်လည်း ဒေါ်လာ ၄ ဒသမ ၃ ဘီလျံမှ ၆ ဒသမ ၁ ဘီလျံသို့ ၄၁ ဒသမ ၁ ရာခိုင်နှုန်း မြင့်တက်ခဲ့သည်ကို တွေ့ရသည်။

ကြိုတင်ခန့်မှန်းထားခဲ့သည့် ၂၀၁၇ ခုနှစ်တစ်နှစ်လုံးစာရောင်းအားဖြစ်သော ဒေါ်လာ ၅ ဒသမ ၁ ဘီလျံ (အိမ်အရေအတွက်အားဖြင့် ၁၁၈၇ အိမ်) ကိုပင် အထက်ဖော်ပြပါ ဆယ်လတာရောင်းအားက ကျော်လွန်ခဲ့ခြင်းဖြစ်သည်။

မြေစိုက်အိမ်များက မြေစိုက်အိမ်မဟုတ်သော ပုဂ္ဂလိကအိမ်များထက် ဈေးနှုန်း
ပို၍ကြီးမားစွာ ကျဆင်းမှုကြောင့် မြေစိုက်အိမ်အရောင်းအ၀ယ်များ
မြင့်တက်လာခြင်းဖြစ်ကြောင်း စင်္ကာပူအိမ်ခြံမြေအတိုင်ပင်ခံကုမ္ပဏီ Savills Singapore ၏ သုတေသနခေါင်းဆောင် အားလန်က ပြောကြားခဲ့သည်။

ဒီအမျိုးအစားနှစ်ခုကြား ဈေးနှုန်းအနည်းငယ်ကွာခြားမှုက မြေစိုက်အိမ်များအား
စိတ်ဝင်စားမှုကို တိုးတက်စေခဲ့ကြောင်းလည်း သူက ပြောကြားခဲ့သည်။

စင်္ကာပူနိုင်ငံသားများ၏ အိမ်လိုချင်မှုဂုဏ်သိမ်အဆင့်ဆင့်တွင် မြေစိုက်အိမ်
ပိုင်ဆိုင်ခြင်းက အဆင့်မြင့်နေဆဲ ဖြစ်သဖြင့် စင်္ကာပူတွင် မြေစိုက်အိမ်ဝယ်လိုအားသည် တစ်စိတ်တစ်ဒေသအားဖြင့် အားကောင်းနေဦးမည်ဟု သူက ယုံကြည်နေကြောင်းလည်း သိရသည်။

ခင်အေးချမ်း မှ iMyanmarHouse.com (အိုင်မြန်မာဟောက်စ်ဒေါ့ကွန်း) အတွက် အထူးဘာသာပြန် ရေးသားဖော်ပြသည်။
Credit: iMyanmarHouse.com