ယခုတစ်ပတ် နေပြည်တော် အိမ်ခြံမြေဈေးကွက်မှာအရောင်းအဝယ် ပုံမှန်ဖြစ်နေပေမဲ့ အငှားဈေးကွက်အနေနဲ့ တန်ဖိုးမြင့်အဆောက်အအုံ ငှားရမ်းသူတွေနည်းလာတယ်လို့ နေပြည်တော် အိမ်ခြံမြေဈေးကွက်က သိရပါတယ်။
ပြီးခဲ့တဲ့ နှစ်လလောက်က နေပြည်တော် အိမ်ခြံမြေဈေးကွက်မှာ အရောင်းအဝယ်ရောအငှားပါသွက်နေခဲ့ပြီး အငှားဈေးကွက်မှာဆိုရင် ကျပ် ၁၀သိန်းဝန်ကျင်ရှိ တန်ဖိုးမြင့်အဆောက်အအုံတွေပါ အငှားသွက်နေခဲ့တာ ဖြစ်ပါတယ်။ ယခုရက်ပိုင်းမှာတော့ အငှားဈေးကွက်မှာ တန်ဖိုးသင့်တင့်တဲ့ သုံးသိန်းဝန်းကျင်အဆောက်အအုံတွေလောက်သာ ပုံမှန်အငှားဖြစ်နေတယ်လို့ သိရပါတယ်။
အရောင်းအဝယ်ကတော့ ဈေးကွက်က အေးတဲ့ဘက်ပါတယ်လို့တော့ပြောလို့မရဘူးပေါ့၊ ဒါပေမဲ့ ပုံမှန်ပဲသွားနေတယ်၊ အငှားမှာတော့ ခုနပြောသလိုသင့်တင့်တဲ့ ဈေးနှုန်းတွေပဲ အခုလောလောဆယ်အငှားဖြစ်တယ်၊ တန်ဖိုးမြင့်တွေတော့ သိပ်မပါလာတော့ဘူးလို့ ရွှေလက်ပံအိမ်ခြံမြေ ရောင်းဝယ်ရေးမှ ဦးကျော်စွာမြင့်ကပြောပါတယ်။
ပြီးခဲ့တဲ့လတွေတုန်းကတော့ ဇမ္ဗူသီရိမြို့နယ်ဘက်မှာ ရုံးခန်းအဖြစ် အသုံးပြုမယ့်သူတွေတန်ဖိုးမြင့်အိမ်တွေကိုငှားရမ်းကြတာဖြစ်ပါတယ်။အခုရက်ပိုင်းမှာတော့ ကုမ္မဏီဝန်ထမ်းတွေကိုထားဖို့ ငှားရမ်းလာကြတာဖြစ်ပါတယ်။
နေပြည်တော်ဈေးကွက်ကတော့ ဒီနှစ်ဈေးနှုန်းပိုင်းမှာတော့ နည်းနည်းအေးတဲ့ဘက်ပါတယ်၊ လက်ရှိတော့ ပုံမှန်ပဲသွားနေတယ်၊ အရောင်းရော အငှားရောကတော့ ဇမ္ဗူသီရိဘက်ကိုအကြိုက်များတယ်လို့ လေပြေအေး အိမ်ခြံမြေရောင်းဝယ်ရေးမှ မနှင်းဝေဝေအောင်က ပြောပါတယ်။
လက်ရှိမှာတော့ အငှားဈေးကွက်မှာ တန်ဖိုးသင့်အဆောက်အအုံတွေလောက်သာအငှားဖြစ်နေပြီး ပျဉ်းမနားဘက်နဲ့ ဥတ္တရသီရိမြို့နယ်ဘက်က ကျပ်သုံးသိန်းဝန်းကျင်တန်တွေသာ အငှားဖြစ်နေပါတယ်။ ဇမ္ဗူသီရိမြို့နယ်လို တန်ဖိုးမြင့်အဆောက်အအုံတွေများတဲ့ဘက်မှာအငှားဈေးကွက် အေးနေတယ်။
ဇမ္ဗူသီရိမြို့နယ်နဲ့ ဥတ္တရသီရိမြို့နယ်တွေက မြေကွက်တွေကိုလူကြိုက်များနေပြီး ဒက္ခိဏသီရိမြို့နယ်နဲ့ ပုဗ္ဗသီရိမြို့နယ်ကတော့အသင့်အတင့်လောက်သာစိတ်ဝင်စားမှုရှိကြတယ်လို့ သိရပါတယ်။
Credit: The Kumudra
