ရန်ကုန်စတော့အိတ်ချိန်း၌ ရှယ်ယာ အရောင်းအဝယ်များကို လာမည့်နိုဝင်ဘာလတွင် အွန်လိုင်းစနစ်ဖြင့် လုပ်ဆောင်နိုင်တော့မည်ဖြစ်ကြောင်း ငွေချေးသက်သေခံ လက်မှတ်လုပ်ငန်း ကြီးကြပ်ရေး ကော်မရှင် (SECM) အဖွဲ့ဝင် ဒေါ်တင်မေဦးက ပြောကြားသည်။
လက်ရှိအချိန်တွင် အွန်လိုင်းစနစ်ဖြင့် ရှယ်ယာ အရောင်းအဝယ် လုပ်ဆောင်နိုင်ရန်အတွက် ငွေချေး သက်သေခံ လက်မှတ်လုပ်ငန်း (Securities ကုမ္ပဏီ) များက စမ်းသပ်မှုများ လုပ်ဆောင်ထားပြီးဖြစ်ကာ ယင်းစနစ်အတွက် နည်းပညာပိုင်း အဆင်သင့် ဖြစ်နေပြီဖြစ်ကြောင်း ၎င်းကဆိုသည်။
“အွန်လိုင်းနဲ့လုပ်ပြီဆိုရင် ရောင်းတာ ဝယ်တာက Customer အပေါ်မှာ အများကြီး မူတည်သွားပြီ။ အွန်လိုင်းစနစ်လုပ်ရင် ဖြစ်လာနိုင်တဲ့အရာတွေ ကြိုတင်ကာကွယ်ဖို့လည်း စည်းမျဉ်းစည်းကမ်းတွေကို လုပ်ထားနေပါတယ်”ဟု ၎င်းကရှင်းပြသည်။
လက်ရှိအချိန်တွင် ရန်ကုန်စတော့ အိတ်ချိန်း၌ ရှယ်ယာ အရောင်းအဝယ် လုပ်ဆောင်ရာတွင် အရောင်းအဝယ် အမှာစာများကို ငွေချေး သက်သေခံ လက်မှတ်လုပ်ငန်း (Securities ကုမ္ပဏီ) များထံတွင် ဖုန်းဖြင့် ဆက်သွယ်ခြင်း (သို့မဟုတ်) လူကိုယ်တိုင်ဖြင့် အမှာစာပေးပို့ကာ ရှယ်ယာ အရောင်းအဝယ်များ လုပ်ဆောင်လျက် ရှိသည်။
လတ်တလော၌ Securities ကုမ္ပဏီ ခြောက်ခုဖြစ်သော AYA Trust Securities, CB Securities, MSEC, KBZ SC, KTZ Ruby Hill Securities နှင့် Amara Securities ကုမ္ပဏီတို့က စတော့အိတ်ချိန်းတွင် ရှယ်ယာ အရောင်းအဝယ်များအတွက် ဝန်ဆောင်မှုပေးလျက် ရှိသည်။
Credit: The Voice
