ကမ္ဘာကျော် Rolling Stones တေးဂီတဝိုင်းကြီး၏ lead guitarist ကိတ်ရစ်ချတ်သည် အမေရိကန်ပြည်ထောင်စု၊ နယူးယောက်မြို့၊ မန်ဟက်တန်အရပ်ရှိ ဂရင်းဝစ်ရွာမှ duplex ခန်းကို အရောင်းဈေးကွက်တင်လာသည်။
ကိတ်ရစ်ချတ်သည် အဆိုပါအခန်းကို ၂၀၁၄ ခုနှစ် အတွင်း ဝယ်ယူခဲ့ခြင်းဖြစ်သည်။
Douglas Elliman အိမ်ခြံမြေအကျိုးဆောင်ကုမ္ပဏီမှတစ်ဆင့် ဈေးကွက်တင်လာခြင်းဖြစ်ပြီး ကန်ဒေါ်လာ ၁၁ ဒသမ ၉၉၅ သန်း ဈေးခေါ်ထားသည်။
ယခင်က အဆိုပါနေအိမ်ကို Sotheby’s International Realty မှတစ်ဆင့် ရောင်းချခဲ့ဖူးသော်လည်း ရောင်းမထွက်ခဲ့ချေ။
ယခုအခါ အသက် ၇၃ နှစ်အရွယ်ရှိပြီဖြစ်သော ကိတ်ရစ်ချတ်နှင့် ဇနီးဖြစ်သူ ပက်တီဟန်ဆန်တို့သည် အဆိုပါအခန်းကို ၂၀၁၄ ခုနှစ်အတွင်း ကန်ဒေါ်လာ ၁၀ ဒသမ ၅ သန်းဖြင့် ဝယ်ယူခဲ့ခြင်းဖြစ်ကြောင်း အိမ်ခြံမြေမှတ်တမ်းများတွင် ဖော်ပြသည်။
ပြီးခဲ့သော ၂၀၁၆ ခုနှစ်အတွင်း အရောင်းဈေးကွက်သို့ စတင်ရောက်ရှိခဲ့စဉ်က ခေါ်ဈေးမှာ ယခုထက်ပိုမိုများပြားပြီး ကန်ဒေါ်လာ ၁၂ ဒသမ ၂၃ သန်း ဖြစ်သည်။
ပဉ္စမရိပ်သာလမ်းနှင့် ၈ လမ်းထောင့်တွင် တည်ရှိပြီး အိပ်ခန်း ၃ ခန်းပါဝင်သည့် ယင်းအခန်းကို ၂၀၁၁ ခုနှစ်အတွင်း ပြုပြင်မွမ်းမံမှုများ ပြုလုပ်ခဲ့သည်။
ကိတ်ရစ်ချတ်ပြောင်းရွှေ့နေထိုင်ရန်အတွက် ဗိသုကာပညာရှင် ဂျိုး ဆာရင်းစ်ကို ငှားရမ်းကာ မွမ်းမံမှုများ ပြုလုပ်ခဲ့ခြင်း ဖြစ်သည်။
နေအိမ်ခန်းအတွင်း အလျား ၄၇ ပေရှိ ဧည့်ခန်း၊ ညစာစားခန်းနှင့် ဖျော်ဖြေရေးနေရာတို့ ပါဝင်သည်။
အဝတ်အစားထားသိုခန်း ၂ ခန်းပါဝင်ပြီး သီးသန့် လသာဆောင် ၃ ခုမှတစ်ဆင့် နယူးယောက်မြို့ကြီးနှင့် ဝါရှင်တန်စကွဲရ်ပါ့ခ်တို့၏ အလှကို ခံစားနိုင်သည်။
အခန်းတည်ရှိရာ အဆောက်အအုံကို ၁၉၂၉ ခုနှစ်တွင် ဆောက်လုပ်ခဲ့ပြီး ၂၇ ထပ်အဆောက်အအုံဖြစ်ကာ မူလက ဇိမ်ခံဟိုတယ်အဖြစ် ဆောက်လုပ်ခဲ့ခြင်းဖြစ်သည်။
Rolling Stones သည် အင်္ဂလိပ် ရော့ခ်တီးဝိုင်းကြီးဖြစ်ပြီး ၁၉၆၂ ခုနှစ်တွင် လန်ဒန်၌ စတင်ဖွဲ့စည်းခဲ့ခြင်း ဖြစ်သည်။စတင်ဖွဲ့စည်းခဲ့စဉ်က ပါဝင်ခဲ့သူများမှာ ဘရိုင်ယန်ဂျုံးစ် (ဂစ်တာ၊ ဟာမိုနီကာ) ၊ မစ်ခ်ဂျက်ဂါ (ရှေ့ထွက်အဆိုတော်) ၊ ကိတ်ရစ်ချတ် (ဂစ်တာ၊ နောက်ခံအဆို) ၊ ဘီလ် ဝိုင်မန်း (ဘေ့စ်ဂစ်တာ) ၊ ချာလီ ဝပ်စ် (ဒရမ်) နှင့် အီယန် စတီးဝပ် (ပီယာနို) တို့ ဖြစ်ကြသည်။
ရိုးလင်းစတုန်းမဂ္ဂဇင်းကြီးက သမိုင်းတစ်လျှောက်အကြီးမြတ်ဆုံး အနုပညာရှင် ၁၀၀ စာရင်းတွင် Rolling Stones အဖွဲ့ကို စတုတ္ထနေရာတွင် ဖော်ပြထားပြီး ကမ္ဘာတစ်ဝန်းတွင် တေးအယ်လ်ဘမ်ပေါင်းချပ်ရေ သန်း ၂၅၀ ကျော် ရောင်းချထားရပြီးဖြစ်သည်။
Rolling Stones သည် စတူဒီယိုတေးအယ်လ်ဘမ် ချပ်ရေ ၃၀၊ live show ၁၈ ခွေ နှင့် လူစုံခွေပေါင်းများစွာ ထုတ်လုပ်ခဲ့ပြီး ဖြစ်သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
