ယခင်ယခင်အစိုးရလက်ထွက်တွင် မြေယာသိမ်းဆည်းမှုပြဿနာများသည် မြန်မာနိုင်ငံအနှံ့အပြား၌ ပေါ်ပေါက်ခဲ့ပါသည်။ ထိုသို့ သိမ်းဆည်းခံရသော တောင်သူလယ်သမားများတွင် ကြီးမားသော နစ်နာမှုများရှိခဲ့ကြရပါသည်။ လယ်ယာလုပ်ငန်းဖြင့်အသက်မွေးဝမ်းကျောင်းနေကြရသော ဘ၀မှ လယ်မဲ့ ယာမဲ့ ဘ၀သို့ရောက်ခဲ့ကြရသည်။
‘မစားရစကမန်း’ နှစ်သိမ့်ခံခဲ့ကြရသည့်လယ်သမားများ
လယ်သမားများ၏မြေယာများကို သိမ်းဆည်းခဲ့စဉ်က သက်ဆိုင်ရာတို့မှပေးလျော်ခဲ့သည့်လျော်ကြေး ငွေဆိုသည်မှာလည်း “ဆင်းပါးစပ်နှမ်းပက်သလို” မဖြစ်စလောက်သားပေးအပ်ခဲ့သည်ဟု သိရသည်။ ခေတ်ကာလတန်ဖိုးနှင့်အညီရရှိမှုမရှိခြင်း တရားမျှတမှုမရှိခြင်းများရှိခဲ့သည်ဟုဆိုကြသည်။
လယ်ယာမြေများကို သိမ်းဆည်းခဲ့ရာတွင်လည်းတိကျသောစာရင်ကောက်ယူမှုမရှိခြင်း လျော်ကြေးပေးရာတွင် ဖြစ်စေ၊ အိမ်ခြံမြေ များချထားပေးရာတွင်ဖြစ်စေ အမှန်တကယ်ရပိုင်ခွင့် ရှိသည်တို့ကို မရရှိခဲ့ကြဟုသိရသည်။
တစ်ခေတ်တစ်ခါက အကြောင်းအမျိုးမျိုးပြ၊ ကြန့်ကြာအောင်လုပ်ခဲ့ကြ
ထို့ပြင်မြို့ပြများတိုးချဲ့တည်ဆောက်ရေးနှင့် စက်မှုဇုန်များတိုးချဲ့တည်ဆောက်ရေးစီမံကိန်းများ အကောင်အထည်ဆောင်ရွက်ရာတွင်လည်း မူလရည်မှန်းချက်အတိုင်းပြီးမြောက်အောင်မြင်အောင် ဆောင်ရွက်မှုမရှိခြင်းကြောင့် အချို့နေရာများ၌ သိမ်းဆည်းစဉ်ကအတိုင်း မြေလွတ်မြေရိုင်းများအဖြစ် ဖြစ်နေခြင်းတို့ကိုတွေ့ရသည်ဟုဆိုပါသည်။
အလိမ်အညာတွေများခဲ့လှသည့်အတိတ်ကာလ
ထိုထက်ပို၍ဆိုးသည်မှာ လယ်ယာမြေကို အခြားနည်းအသုံးပြုရန် လန-၃၉ လျှောက်ထားခဲ့သော်လည်း တင်ပြချက်များနှင့် အညီအသုံးပြုမှု မရှိခြင်း၊ ၀န်ကြီးဌာနအချင်းချင်းလွှဲပြောင်းကာလတွင်လည်း လန-၃၉ ခွင့်ပြုမိန့်အား ပြန်လည်ပယ်ဖျက်ခြင်းမပြုဘဲ လယ်ယာမြေအဖြစ်သာ ပြန်လည်စိုက်ပျိုးလုပ်ကိုင်စေခြင်းများပြုလုပ်ကြသည်ကို တွေ့ခဲ့ရသည်ဟုဆိုသည်။
အကြောင်းအမျိုးမျိုးကြောင့် မူလစီမံကိန်း များကို ဆက်လက်အကောင်အထည်ဖော်ဆောင်ရွက်ခြင်းမပြုတော့ဘဲ စီမံကိန်း ပျက်ပြယ်သွားပါက သိမ်းဆည်း ထားသော လယ်ယာမြေများကို ဥပဒေနှင့်အညီနိုင်ငံတော်သို့ ပြန်လည်အပ်နှံမှုမရှိကြသည်ကိုလည်း တွေ့ရသည်။
ကုမ္ပဏီအဖွဲ့အစည်းတွေကလည်းညာ၊ နိုင်ငံဝန်ထမ်းတွေလည်းပါ
ထို့အတူစီမံကိန်းများအကောင်အထည်ဖော်ရာတွင်လည်း အချိန်ကာလသတ်မှတ်၍ ညွှန်ကြားဆောင်ရွက်စေခဲ့သော်လည်း အချိန်ဆွဲ၍ဆောင်ရွက်ခြင်းများရှိခဲ့သည်ဟုဆိုသည်။ အချို့သော လုပ်ပိုင်ခွင့်ရသည့်ကုမ္ပဏီအဖွဲ့အစည်းများအနေဖြင့်လည်း တောင်သူလယ်သမားများပေါ်ပေါက်၍ လူမှုရေးအရ စာနာထောက်ထားမှု၊ ကူညီပံ့ပိုးမှု စိတ်နည်းပါးခြင်းတို့ကိုလည်း တွေ့ရသည်ဟု ၂၀၁၂ ခုနှစ်စုံစမ်းရေးကော်မရှင်ကထောက်ပြခဲ့သည်။
ယခင်ကနှင့်မူပါ၊ ခုအခါ စွန့်လွှတ်မြေများတောင်သူလက်ထဲပြန်အပ်နေပြီတစ်ခါ
ဤသည်ကား ယခင်အစိုးရလက်ထက်က စုံစမ်းရေးကော်မရှင်များနှင့်အခြားမြေများသိမ်းဆည်းခံရမှုများ ပြန်လည်စိစစ်ရေး ဗဟိုကော်မတီ ဥက္ကဌနှင့် တောင်သူလယ်သမားအခွင့်အရေး ကာကွယ်ရေးနှင့် အကျိုးစီးပွားမြှင့်တင်ရေး ဦးဆောင်အဖွဲ့ခေါင်းဆောင်ဖြစ်သူ ဒုတိယသမ္မတ ဦးဟင်နရီဗန်ထီးယူ မှ စစ်ကိုင်းတိုင်းရွှေဘိုခရိုင် တန်ဆည်မြို့နယ်၊ စိုက်ပျိုးရေး၊ မွေးမြူရေး ဆည်မြောင်း
ဝန်ကြီးဌာန၊ စိုက်ပျိုးရေး ဦးစီးဌာနမှ သိမ်းယူထားခဲ့သည့် “ပဇီကြီး” ကျေးရွာအုပ်စုအတွင်းရှိ မြေဧရိယာ “၃၇၉၂ ဒသမ ၄၆ ဧက အား ပြန်လည်စွန့်လွှတ်၍” တောင်သူ ၂၂၈ ဦးထံသို့ ပြန်လည်လွှဲပြောင်းပေးအပ်ခဲ့ပြီးဖြစ်သည် ဟုသိရသည်။
ထို့ပြင်စိုက်ပျိုးရေး ဦးစီးဌာနမှ “ မျိုးသန့်ခြံ” အဖြစ်အသုံးပြုခဲ့သည့် ဧရိယာ “၃၇၂၆” ဧကအနက် “၂၅၂၆” ဧကကို နိုင်ငံတော်သို့ ပြန်လည်အပ်နှံခဲ့ပြီး ယင်းအပ်နှံမြေဧရိယာထဲမှ “၇၃၈ ဒသမ ၉၉ ဧက” ကိုမူလတောင်သူ “၂၃၉” ဦးထံသို့ ယာယီလုပ်ပိုင်ခွင့်ပြုလက်မှတ် (ပုံစံ-၃) ထုတ်ပေးခဲ့ကြောင်း (၁၄.၇.၂၀၁၇) နေ့မြန်မာ့အလင်းသတင်းစာတွင် ဖတ်ရှုရသဖြင့် တောင်သူလယ်သမားများအတွက် အားတက်မိသည်။
တောင်သူတို့၏ အခွင့်အရေးများပြန်ရလာပြီတကား
တောင်သူလယ်သမားများကြာမြင့်စွာမျှော်လင့် စောင့်စားခဲ့ကြရသည့် အာသီသဆန္ဒများ ယခုတော့ဖြင့် ပြည့်ဝကြရပြီဟုဆိုချင်ပါသည်။ ယခုယာယီလုပ်ပိုင်ခွင့်ပြုလက်မှတ် (ပုံစံ-၃) ရရှိကြသည့်တောင်သူမိသားစုများအနေဖြင့် သားစဉ်မြေးဆက်လုပ်ကိုင်ခွင့်ရရှိစေရန် ၂၀၁၂ ခုနှစ်လယ်ယာမြေ ဥပဒေနှင့်အညီ လယ်ယာလုပ်ပိုင်ခွင့်ပြုလက်မှတ် (ပုံစံ-၇) ရရှိရေးအတွက် ဆက်လက်ဆောင်ရွက်နိုင်ပြီဖြစ်သစည်။
မြင်သာမြင်ရ၊ မစားရ ၍ ဆွမ်းမျှမတင်နိုင် သည့် ဘ၀ကလွတ်မြောက်ကြပါစေ။
ယခင်အစိုးရလက်ထက်က “မြင်သာမြင်ရ မကြင်ရ” ဖြစ်ခဲ့သည့် လယ်ယာမြေများကို ယခုကဲ့သို့ တောင်သူများပြန်လည်ရရှိခြင်းမှာ ဥစ္စာရှင်မှန်၍ ပြန်ရ သည်ဟုဆိုရမည်။ ဟိုစဉ်အခါက ဆိုလျှင် တောင်သူများ အနေဖြင့် မိမိတို့ပိုင်လယ်ယာမြေများကို ပြန်လည်ရယူလိုကြသဖြင့် ဆက်ဆိုင်ရာဌာနများသို့ လာရောက်တိုင်ကြားခဲ့ကြသော်လည်း ထိရာက်စွာဖြေရှင်းပေးနိုင်ခဲ့ခြင်းမရှိခဲ့ကြပေ။
ယင်းအတွက်ကြောင့် “ထွန်တုံး” တိုက်ပွဲများဆင်နွဲပြီး မိမိတို့လယ်ယာမြေထဲသို့ ၀င်ရောက်၍ ထွန်ယက်ခဲ့မိကြသဖြင့် “အကျိုးဖျက်ဆီးမှု” “ပိုင်နက်ကျူးလွန်မှု” ရာဇ၀တ်မှုပုဒ်မ ၄၂၇၊ ၄၄၇ တို့ဖြင့် တရားစွဲခံကြရပြီး ထောင်နန်းစံခဲ့ကြရသည်။ ဒုက္ခရောက်ခဲ့ကြရသည်။ ယခုလက်ရှိအရသားအစိုးရလက်ထက်တွင် ယခင်အစိုးရလက်ထက်က သိမ်းယူထားခဲ့သော မြေများကို မူလပိုင်ရှင်များဖြစ်သည့် တောင်သူများထံ သို့ပြန်လည်အပ်နှံပေးသည့်အပြင် သာစဉ်မြေးဆက်လုပ်ပိုင်ခွင့်ရှိသည့် ပုံစံအရ လယ်ယာမြေ လုပ်ပိုင်ခွင့်လက်မှတ်ပါရရှိတော့်မည်ဖြစ်၍ တောင်သူများကိုယ်စား ၀မ်းမြောက်ဂုဏ်ယူ မိပါသည်။
ပြည်နယ်တိုင်းအသီးသီး၌ သိမ်းယူခံထားရသည်လယ်ယာမြေများရှိပါကလည်း အမြန်ဆုံးပြန်လည်ရရှိကြပါစေဟု ဆန္ဒပြုလိုက်ရပါသည်။
ဗြဟ္မစိုရ်တရားလက်ပိုင်ထားနိုင်ကြပါစေ။
လွှတ်တော်ရှေ့နေမောင်ကောင်းဖေ မှ iMyanmarHouse.com (အိုင်မြန်မာဟောက်စ်ဒေါ့ကွန်း) အတွက် အထူးရေးသားဖော်ပြသည်။
Credit: iMyanmarHouse.com
