စူပါမော်ဒယ် စင်ဒီကရောဖို့ဒ်နှင့် ရန်ဒီ ဂါဘာတို့ စုံတွဲသည် အမေရိကန်ပြည်ထောင်စု၊ ကယ်လီဖိုးနီးယားပြည်နယ်၊ လော့စ်အိန်ဂျလိမြို့၊ ကမ္ဘာကျော်ကြယ်ပွင့်များ စုဝေးရာ ဘီဗာလီဟေးလ်အရပ်တွင် ကန်ဒေါ်လာ ၁၁ သန်းကျော်ဖြင့် နေအိမ်တစ်လုံး ဝယ်ယူလိုက်ကြောင်း လော့စ်အိန်ဂျလိအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
အဆိုပါနေအိမ်ကို မူလက ပိုင်ဆိုင်ခဲ့သူမှာ OneRepublic မှ ရှေ့ထွက်အဆိုတော် ရိုင်ယန် တက်ဒါဖြစ်ပြီး ၁၉၅၉ ခုနှစ်က ဆောက်လုပ်ခဲ့သည့် နေအိမ်ဖြစ်သည်။
ဘီဗာလီဟေးလ်၏ တန်ဖိုးအကြီးဆုံးနေရာ Trousdale Estates အရပ်တွင် တည်ရှိပြီး အိပ်ခန်း ၅ ခန်းပါ နေအိမ်အတွက် စင်ဒီကရောဖို့ဒ် ပေးခဲ့ရသည်မှာ ကန်ဒေါ်လာ ၁၁ ဒသမ ၆၃ သန်း ဖြစ်သည်။
ကြမ်းခင်းဧရိယာ ၅၃၈၆ စတုရန်းပေ ကျယ်ဝန်းသည့် နေအိမ်ကို OneRepublic ရှေ့ထွက်အဆိုတော် ရိုင်ယန်တက်ဒါနှင့် ဇနီးဖြစ်သူ ဂျဲနဗီတို့က ၂၀၁၄ ခုနှစ်တွင် ကန်ဒေါ်လာ ၇ ဒသမ ၄၉ သန်းဖြင့် ဝယ်ယူခဲ့ကြခြင်းဖြစ်သည်။
ခြံဝန်းအကျယ်မှာ တစ်ဧကခန့်ရှိပြီး ပန်းဥယျာဉ်များ ၊ မြက်ခင်းပြင်များဖြင့် နေအိမ်ကို ဝန်းပတ်ထားသည်။
ခြံဝန်းအတွင်းတွင် သစ်ရိပ်ဝါးရိပ်ကောင်းမွန်သော ရေကူးကန်တစ်ခု ပါဝင်သည်ကို တွေ့ရသည်။
နေအိမ်အတွင်းတွင် သစ်မာသားကြမ်းခင်းများ၊ မှန်နံရံများ၊ အပြည့်အစုံ ခေတ်မီအဆင့်မြှင့်တင်ထားသော မီးဖိုဆောင်နှင့် မီးလင်းဖိုများစွာ တွေ့ရသည်။
Master bedroom မှတစ်ဆင့် နေအိမ်အပြင်ဘက်ဆီသို့ တိုက်ရိုက်ရောက်ရှိနိုင်သည်ကို တွေ့ရ၏။
ဤနေအိမ်သည် ပြီးခဲ့သည့် ဇွန်လကတည်းက အရောင်းဈေးကွက်သို့ ရောက်ရှိခဲ့ခြင်းဖြစ်ပြီး ထိုစဉ်က ခေါ်ဈေးမှာ ကန်ဒေါ်လာ ၁၂ ဒသမ ၇၅ သန်း ဖြစ်သည်။
OneRepublic ဘက်မှ ကိုယ်စားပြုသည်မှာ Partners Trust အိမ်ခြံမြေကုမ္ပဏီဖြစ်ပြီး စင်ဒီကရောဖို့ဒ်ဘက်မှ Westside Estate Agency အိမ်ခြံမြေကုမ္ပဏီက ယခုအရောင်းအဝယ်တွင် ကိုယ်စားပြုခဲ့ကြသည်။
စင်ဒီကရောဖို့ဒ်သည် လော့စ်အိန်ဂျလိမြို့ မာလီဘူးတွင် အိပ်ခန်း ၄ ခန်းပါ ပင်လယ်ကမ်းခြေနေအိမ်ကြီးတစ်လုံးလည်း ပိုင်ဆိုင်ထားပြီး ယင်းနေအိမ်အတွက် ဝယ်လက်ရှာနေဆဲ ဖြစ်သည်။
အဆိုပါနေအိမ်ကို စင်ဒီကရောဖို့ဒ်က ကန်ဒေါ်လာ သန်း ၆၀ ဈေးခေါ်ထားသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
