အမေရိကန်ပြည်ထောင်စု၊ ကယ်လီဖိုးနီးယားပြည်နယ်၊ လော့စ်အိန်ဂျလိမြို့ အရှေ့မြောက်ပိုင်းရှိ အမှတ် ၁၃၄ လမ်းမကြီး၏ လမ်းပိုင်းတစ်နေရာကို သမ္မတဟောင်း အိုဘားမားအမည်ပေးရန် ကယ်လီဖိုးနီးယားပြည်နယ် အထက်လွှတ်တော်မှ အတည်ပြုလိုက်ကြောင်း လော့စ်အိန်ဂျလိအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
လမ်းပိုင်းအမည်ပြောင်းရန် ဥပဒေကြမ်းကို ကယ်လီဖိုးနီးယားပြည်နယ် အထက်လွှတ်တော်အမတ် အန်သိုနီ ပေါ်တန်တီနိုက တင်သွင်းခဲ့ခြင်းဖြစ်ပြီး “သမ္မတ ဘားရက်-အိတ်ခ်ျ-အိုဘားမား ဖရီးဝေး” ဟု အမည်ပေးမည် ဖြစ်သည်။
လော့စ်အိန်ဂျလိအရှေ့မြောက်ပိုင်းရှိ ပါဆာဒီနာမြို့နှင့် အလုပ်သမားလူတန်းစားအများစု အခြေစိုက်ရာ Eagle Rock မြို့များအကြား သွားလာကြမည့် ယာဉ်မောင်းတို့သည် အမေရိကန်ပြည်ထောင်စုတွင် သမ္မတဘားရက်အိုဘားမားအမည်ရှိ လမ်းပေါ်ဖြတ်သန်းခွင့် ရကြတော့မည် ဖြစ်သည်။
ပေါ်တန်တီနို၏ ထုတ်ပြန်ကြေညာချက်တစ်ရပ်အရ အဆိုပါလမ်းပိုင်းကို အိုဘားမားအမည်ပြောင်းရန် စိတ်ကူးစတင်ခဲ့သည်မှာ ဒေသတွင်း တက်ကြွလှုပ်ရှားသူတစ်ဦးဖြစ်သည့် ဂျွန် ဂါလိုဂလီထံမှ စတင်ခြင်းဖြစ်ကြောင်း၊ Occidental ကောလိပ်တွင် အိုဘားမား ကျောင်းတက်ခဲ့စဉ်ကာလအတွင်း နေထိုင်ခဲ့ဖူးသည့် နေအိမ်ရှေ့တွင် အထိမ်းအမှတ်တံဆိပ်ပြားတစ်ခု တပ်ဆင်ခဲ့ပြီးနောက်ပိုင်း ယခုစိတ်ကူး ပေါ်ပေါက်ခဲ့ခြင်းဖြစ်သည်ဟု ဆိုသည်။
ယခုအမည်ပြောင်းလိုက်သည့် လမ်းပေါ်မှတစ်ဆင့် နောင်တစ်ချိန်တွင် သမ္မတဖြစ်လာမည့် အိုဘားမားသည် နေ့စဉ်ကျောင်းသွား၊ ကျောင်းပြန်ပြုလုပ်ခဲ့ရသည်ဟု ဆိုသည်။
လမ်းပေါ်မှ ဖြတ်သန်းမည့် ယာဉ်မောင်းများအနေဖြင့် အိုဘားမားအုပ်ချုပ်ခဲ့စဉ်ကာလများကို ထာဝရပြန်လည်အောက်မေ့ သတိရကြတော့မည်ဖြစ်ကြောင်းလည်း ပေါ်တန်တီနိုက ပြောကြားသည်။
ယခုအခါတွင် လမ်းညွှန်ဆိုင်းဘုတ်များ ပြောင်းလဲရန်သာ လုပ်ဆောင်ရန် ကျန်ရှိတော့သည်။
အိုဘားမား၏ အမည်ပြောင်းလဲရန်၊ အမည်ပေးရန် ကြိုးပမ်းမှုမှာ ယခုအကြိမ်သည် ပထမဆုံးမဟုတ်သေးချေ။
ပြီးခဲ့သော ဇွန်လအတွင်းကလည်း လော့စ်အိန်ဂျလိမြို့ကောင်စီက လော့စ်အိန်ဂျလိ အနောက်တောင်ပိုင်းရှိ ရိုဒီယိုလမ်းကို အိုဘားမားအမည်ပေးရန် ကန့်ကွက်သူမရှိ အတည်ပြုခဲ့ဖူးသည်။
ဂျက်ဖာဆင် ဘိုလီဗာ့ဒ်မှ အာလင်တန် အဲဗင်းညုအထိ ဆက်သွယ်ထားသည့် အဆိုပါလမ်းမသည်ယခုအခါတွင် အိုဘားမားဘိုလီဗာ့ဒ်ဟု အမည်တွင်နေပြီ ဖြစ်လေသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
