လယ်ယာကဏ္ဍဖွံ့ဖြိုးတိုးတက်ရေး အတွက်ချေးငွေများကို နှစ်တိုနှစ်ရှည်ထုတ်ချေးသွားမည်ဖြစ်ပြီး အနည်းဆုံးသုံး နှစ်မှဆယ်နှစ်သက်တမ်းအထိ ချေးသွားမည်ဖြစ်ကြောင်း စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာနက စက်တင်ဘာလ ၄ ရက်တွင် ထုတ်ပြန်လိုက်သည်။ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနသည်လယ်ယာကဏ္ဍဖွံ့ဖြိုးတိုးတက်ရေးအတွက်လိုအပ်သော အရင်းအနှီးများ ရရှိနိုင်ရန်အတွက် တစ်ပိုင်တစ်နိုင် စိုက်ပျိုးမွေးမြူရေးလုပ်ကိုင်ဆောင်ရွက်လိုသူများအတွက် အသေးစားစက်ကိရိယာဝယ်ယူခြင်းဆိုင်ရာ ချေးငွေများ၊ စိုက်ပျိုးမွေးမြူရေးဆိုင်ရာ အခြေခံစီးပွားရေးလုပ်ငန်း ချေးငွေများ စသဖြင့်ထုတ်ချေးသွားမည်ဖြစ်ကြောင်း သိရသည်။
တစ်ပိုင်တစ်နိုင်စိုက်ပျိုးမွေးမြူရေး လုပ်ကိုင်ဆောင်ရွက်လိုသူများအတွက် အသေးစားစက်ကိရိယာဝယ်ယူခြင်းဆိုင်ရာ ချေးငွေများအား နှစ်တိုးချေးငွေအဖြစ်သတ်မှတ်၍ ချေးငွေသက်တမ်းကို သုံးနှစ်အဖြစ်လည်းကောင်း၊ စိုက်ပျိုးမွေးမြူရေးဆိုင်ရာ အခြေခံစီးပွားရေး လုပ်ငန်းချေးငွေများအား နှစ်ရှည်ချေးငွေအဖြစ်သတ် မှတ်၍ချေးငွေ သက်တမ်းကို ၁ဝ နှစ်အဖြစ်လည်းကောင်း သတ်မှတ်ထုတ်ချေးသွားမည်ဖြစ်ပါသည်။
ယင်းကဲ့သို့ ချေးယူရာတွင် ထွန်စက်ကြီး၊ ရိတ်သိမ်းခြွေလှေ့စက်၊ ကောက်စိုက်စက်၊ အခြောက်ခံစက်၊ သန့်စင်စက်၊ ထုပ်ပိုးစက်၊ သို လှောင်ရုံ၊ သီးနှံကြိတ်ခွဲစက်များ၊ တန်ဖိုးမြင့်ထုတ်ကုန်ထုတ်လုပ်သည့် စက်ရုံများ၊ မွေးမြူရေးခြံ၊ မွေးမြူရေးကန်များ၊ စိုက်ပျိုးမွေးမြူရေးလုပ် ငန်းများနှင့် ထုတ်ကုန်သယ်ယူပို့ဆောင်ရေး လုပ်ငန်းများအတွက် ထုတ်ချေးသွားမည်ဖြစ်ကြောင်း သိရသည်။
စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယ အမြဲတမ်းအတွင်းဝန်ဦးမျိုးတင့်ထွန်းက''အဓိကကတော့ လယ်ယာကဏ္ဍဖွံ့ဖြိုးတိုးတက်ဖို့ဖြစ်တယ်။ ချေးငွေလည်းမဆုံးရှုံးအောင် အောင် မြင်မှုလည်းရရှိအောင် သေသေချာချာလုပ်ဆောင်သွားမှာပါ။ စတင် ချေးနိုင်ဖို့အတွက် စီမံကိန်းနဲ့ဘဏ္ဍာရေးဝန်ကြီးဌာနနဲ့ ညှိနှိုင်းနေပါတယ်။ ဒီနှစ်ထဲမှာစတင်ပြီး ထုတ်ချေးသွားမှာဖြစ်ပါတယ်။ အခု လောလောဆယ်တော့ ဘယ်လိုလူမျိုးတွေချေးမယ်။ ဘယ်လိုသတ်မှတ်ချက်တွေနဲ့ ကိုက်ညီရမယ်ဆိုတာမျိုးကတော့ အခုစတင်လုပ်ဆောင်နေပါတယ်။ အတိုးနှုန်းကလည်း လက်ရှိမြန်မာ့လယ်ယာ ဖွံ့ဖြိုးရေးဘဏ်ကထုတ်ချေးနေတဲ့ အတိုးနှုန်းလောက်ပဲဖြစ်မှာပါ''ဟု ပြောသည်။ အဆိုပါ ထုတ်ချေးငွေများနှင့်ပတ်သက်ပြီး အသေးစိတ်ကို မကြာ ခင်နိုင်ငံပိုင်သတင်းစာများမှ ကြေညာပေးသွားမည်ဖြစ်ပြီး ချေးငွေယူလိုသူများအနေဖြင့် အသေးစိတ်အချက်အလက်များကို သိရှိလိုပါက သက်ဆိုင်ရာပြည်နယ်/တိုင်းဒေသကြီးခရိုင်၊ မြို့နယ်စိုက်ပျိုးရေးဦးစီးဌာနရုံးများ၊ စက်မှုလယ်ယာစခန်းများတွင် စုံစမ်းနိုင်ကြောင်းသိရသည်။
Credit: Democracytoday
