အမေရိကန်ပြည်ထောင်စု၊ နယူးယောက်ပြည်နယ်၊ နယူးယောက်မြို့တွင် စွန့်ပစ်ထားသည်မှာ ၃၅ နှစ်ရှိခဲ့ပြီဖြစ်သော Greenpoint ဆေးရုံကို စတုရန်းပေ ၁၄၆၁၀၀ အကျယ်အဝန်းရှိ တန်ဖိုးနည်းလူနေအိမ်ရာအဖြစ် ပြောင်းလဲဆောက်လုပ်သွားရန် စီစဉ်လျက်ရှိကြောင်း သတင်းတစ်ရပ်တွင် ဖော်ပြသည်။
နယူးယောက်မြို့တော်ဝန် ဒီဘလာစီယိုက ပြောကြားရာတွင် နယူးယောက်မြို့ ဂရင်းပွိုင့်နှင့် ဝီလျံစ်ဘာ့ဂ်ျအရပ်တို့တွင် တန်ဖိုးနည်း လူနေအိမ်ရာ လိုအပ်ချက်မှာ အလွန်မြင့်မားလှကြောင်း၊ ၎င်းအနေဖြင့် အဆိုပါဆေးရုံကို ဈေးကွက်ပေါက်ဈေးအောက် နည်းပါးသည့် တန်ဖိုးနည်းလူနေခန်း ၃၀၀ မှ ၆၀၀ အကြား ပြောင်းလဲဆောက်လုပ်နိုင်ရန် developer တို့၏ အဆိုပြုချက်များကို မျှော်လင့်လျက် ရှိကြောင်း ပြောကြားသည်။
မြို့တော်မှပိုင်ဆိုင်သည့် နေရာဖြစ်ပြီး အကျယ်အဝန်းမှာ ၃ ဒသမ ၄ ဧက ကျယ်ဝန်းပြီး ၁၉၁၅ ခုနှစ်မှ ၁၉၃၀ အကြားဆောက်လုပ်ခဲ့ ကြသည့် အဆောက်အအုံ ၃ လုံး ပါဝင်သည်။
အဆောက်အအုံတည်နေရာမှာ ဘရွတ်ကလင်းအရပ်၊ ဂျက်ဆင်လမ်း၊ အမှတ် ၂၈၈ တွင် ဖြစ်သည်။အဆောက်အအုံတစ်လုံးကို လက်ရှိအားဖြင့် ကုတင် ၂၀၀ ပါ ယာယီခိုလှုံစခန်းအဖြစ် အသုံးပြုထားပြီး ယခင်က သူနာပြုအဆောင်အဖြစ် အသုံးပြုခဲ့သော အဆောက်အအုံမှာမူ ယိုယွင်းပျက်စီးနေပြီဖြစ်ကာ ကျူးကျော်ဝင်ရောက်နေထိုင်သူကိုလည်း တွေ့ရသည်။
အဆောက်အအုံ ၃ ခုလုံးမှာ အမျိုးသားသမိုင်းဝင်နေရာများမှတ်ပုံတင်မှု အချက်များနှင့် ကိုက်ညီလျက်ရှိခြင်းကြောင့် developer တို့အနေဖြင့် သမိုင်းဝင်အသွင်အပြင်များကို ထိန်းသိမ်းကာ ပြန်လည်မွမ်းမံဆောက်လုပ်ရမည် ဖြစ်သည်။
စိတ်ဝင်စားသည့် developer တို့အနေဖြင့် goo.gl/HMXy7W အင်တာနက်လင့်ခ်တွင် Greenpoint Hospital Request for Expressions of Interest (RFEI) ခေါင်းစဉ်ပေးထားသော လျှောက်လွှာပုံစံကို ဖြည့်သွင်းကာ လျှောက်ထားနိုင်ကြောင်း နယူးယောက်မြို့အုပ်ချုပ်ရေးအဖွဲ့၏ ဝက်ဘ်ဆိုက်တွင် ကြေညာထားသည်။
အသေးစိတ်စုံစမ်းလိုသူများအနေဖြင့်မူ GreenpointHospital@hpd.nyc.gov သို့ ဆက်သွယ်နိုင်ကြောင်း ဖော်ပြထားသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
