တရုတ်နိုင်ငံရှိ မြို့ ကြီးပေါင်း ၁၃ မြို့ တွင် လယ်သမားများပိုင်ဆိုင်သည့် မြေယာများကို အငှားလူနေအိမ်ရာများဆောက်လုပ်ရန် အခြားနည်းဖြင့် ပြောင်းလဲအသုံးပြုခွင့်ပေးအပ်လိုက်ပြီး တရုတ်နိုင်ငံသမိုင်းတွင် ပထမဆုံးအကြိမ်ဖြစ်ကြောင်း ဟောင်ကောင်အခြေစိုက် သတင်းဝက်ဘ်ဆိုက်တစ်ခုတွင် ဖော်ပြသည်။
ယခုခြေလှမ်းမှာ တရုတ်ပြည်အတွင်း အိမ်ခြံမြေဈေးနှုန်းများ တည်ငြိမ်မှုရှိစေရန်နှင့် အငှားဈေးကွက်ကို မြှင့်တင်ပေးနိုင်ရန် ရည်ရွယ်သည်ဟု ဆိုသည်။
မြေယာနှင့် အရင်းအမြစ်ဝန်ကြီးဌာန၊ အိုးအိမ်နှင့် မြို့ ပြ-ကျေးလက်ဖွံ့ဖြိုးရေးဝန်ကြီးဌာနတို့ ပူးပေါင်းအကောင်အထည်ဖော်ခဲ့ခြင်းဖြစ်ပြီး မြို့ပြအသွင်ပြောင်းလဲရေး စီမံကိန်းကြောင့် လူဦးရေစီးဝင်မှု များပြားသော ပေကျင်း၊ ရှန်ဟိုင်း၊ ကွမ်ကျိုးနှင့် ဟန်ကျိုးမြို့ကြီးများတွင် ယခုစီမံကိန်းကို စတင်ခဲ့သည်။
“ဒီအစီအစဉ်က အဓိကရည်ရွယ်တာကတော့ မြို့ကြီးတွေမှာနေထိုင်တဲ့ ရွှေ့ပြောင်းလုပ်သားတွေရဲ့ လူနေမှုပြဿနာကို ဖြေရှင်းပေးဖို့ပါ။
နိုင်ငံအလယ်ပိုင်းမြို့ကြီးတွေက ဆင်းရဲသားရပ်ကွက်၊ ဆင်ခြေဖုံးကျေးရွာတွေမှာနေထိုင်တဲ့ လူဦးရေ သန်း ၂၀၀၊ ဆောက်လုပ်ရေး လုပ်ငန်းခွင်တွေမှာ နေထိုင်ကြတဲ့ ၆ သန်းကနေ ၇ သန်းကြား လူဦးရေတွေကို ဦးတည်ပါတယ်” ဟု ရန်မင်တက္ကသိုလ်မှ ကျေးလက်မြေယာရေးရာလေ့လာသည့် ပါမောက္ခ တာအိုရန်က ပြောကြားသည်။
လာမည့် ၂၀၂၀ ပြည့်နှစ်တွင် မြို့ကြီးများသို့ အလုပ်အကိုင်ရရှိရန် ရွှေ့ပြောင်းလာကြမည့် ရွှေ့ပြောင်းလုပ်သားပေါင်း သန်း ၁၀၀ ခန့်ရှိလာမည်ဟု ခန့်မှန်းထားသည်။
တရုတ်နိုင်ငံ၏ မြေယာစနစ်ကို ကာလကြာရှည် လေ့လာခဲ့ကြသည့် ပညာရှင်များက ပြောကြားရာတွင် ယခုပြောင်းလဲမှုမှာ ပင်မမြေယာဈေးကွက်တွင် ကျေးလက်မြေယာများ ပါဝင်လာနိုင်ရေးအတွက် တံခါးဖွင့်ပေးလိုက်ခြင်းဖြစ်ပြီး ယခင်ကမူ မြေယာဈေးကွက်ကို နိုင်ငံတော်မှ တစ်ဦးတည်းချုပ်ကိုင်ထားသည့်ပုံစံ monopoly အသွင်ဖြင့် သွားခဲ့ခြင်းဖြစ်သည်ဟု သုံးသပ်ကြသည်။
ယခင်က ကျေးလက်မြေယာများကို အစိုးရက သိမ်းဆည်းခြင်းမဟုတ်လျှင် လယ်သမားတို့က developer တို့ထံ ရောင်းချခွင့်မရှိချေ။ယခုအခါတွင်မူ အဆိုပါအဟန့်အတား မရှိတော့ဟု ဆိုနိုင်သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
