စီးပွားရေးလုပ်ငန်းရှင်များအနေဖြင့် စီမံကိန်းများ လုပ်ကိုင်ဆောင်ရွက်ရာတွင် ပတ်ဝန်းကျင်ထိခိုက်စေမှုစစ်ဆေးခြင်းလုပ်ငန်းစဉ်ကို အဆင့်ဆင့်လိုက်နာဆောင်ရွက်ပြီး တွေ့ရှိချက်များကို အများပြည်သူထံ အသိပေးရမည်ဖြစ်ကြောင်း သယံဇာတနှင့် ပတ်ဝန်းကျင်ထိန်းသိမ်းရေးဝန်ကြီးဌာန အမြဲတမ်းအတွင်းဝန် ဦးခင်မောင်ရီက ပြောသည်။
နေပြည်တော်သင်္ဂတဟိုတယ်တွင် ဇူလိုင် ၂၀ ရက်က ပတ်ဝန်းကျင် ထိခိုက်မှုစစ်ဆေးခြင်းဆိုင်ရာ အကြံပြုဆွေးနွေးပွဲ ကျင်းပပြုလုပ်ရာတွင် ဦးခင်မောင်ရီက ''စီမံကိန်းဆောင်ရွက်တဲ့ လုပ်ငန်းရှင်တွေအနေနဲ့ မိမိစီမံကိန်းလုပ်ငန်းနဲ့ သက်ဆိုင်တဲ့ သတင်းအချက်အလက်တွေကို အများပြည်သူသိရှိအောင် အချိန်နဲ့တပြေးညီ ဖော်ထုတ်တင်ပြဖို့ လိုအပ်သလို စီမံကိန်းတွေ အကောင်အထည်ဖော်ဆောင်ရွက်ရာမှာ လည်း သက်ဆိုင်ရာပြည်သူရဲ့သဘောတူညီမှု၊ ပြည်သူတွေပါဝင်မှု ရရှိစေဖို့အတွက် ဆန်းစစ်ခြင်း လုပ်ငန်းအဆင့်တိုင်းမှာ အများပြည်သူနဲ့ သင့်လျော်တဲ့ တိုင်ပင်ဆွေးနွေးမှုတွေ ဆောင်ရွက်ဖို့ လိုပါတယ်'' ဟု ပြောသည်။
ထို့ပြင် စီးပွားရေးလုပ်ငန်းရှင်များကိုယ်တိုင် မိမိတို့၏ စီမံကိန်းများကို စောင့်ကြပ်စစ်ဆေးပြီး စောင့်ကြပ်စစ်ဆေးမှုအစီရင်ခံစာကိုလည်း ခြောက်လတကြိမ် တင်ပြပေးရန် လိုအပ်ကြောင်း၊ ပတ်ဝန်းကျင် ထိခိုက်မှုစစ်ဆေးခြင်းကို ဆောင်ရွက်ရာတွင် အခြေခံမူ ၈ ရပ်ဖြစ်သည့် ပွင့်လင်းမြင် သာရှိရန်၊ သက်ဆိုင်ရာ ပုဂ္ဂိုလ်အားလုံး၏ ကျေနပ်မှု၊ ယုံကြည်မှုရရှိရန် ပါဝင်ပတ်သက်သူအားလုံးမှ သင့်လျော်သည့် ပူးပေါင်း ဆောင်ရွက်ခွင့်ရရှိရန်၊ လက်တွေ့အသုံးဝင်မှု အသုံးကျမှုရရှိရန်၊ လိုက်လျောညီထွေရှိရန်၊ ကုန်ကျစရိတ်သက်သာစွာဖြင့် ပတ်ဝန်းကျင်ထိန်းသိမ်းကာကွယ်ရေးကို သေချာခိုင်မာစေရန်၊ ဆန်းစစ်ခြင်းကို ကျွမ်းကျင် စွာနှင့် ဘက်လိုက်မှုကင်းစွာဆောင်ရွက်ရန်၊ ဆုံးဖြတ်ချက်များအတွက် သက်ဆိုင်သူများ၏ တာဝန်ခံမှုရှိရန် ဆိုသည့်အချက်များကို အလေးထားဆောင်ရွက်ရန် လိုအပ်ကြောင်း ၎င်းက ပြောသည်။
ရေနံနှင့်သဘာဝဓာတ်ငွေ့ကဏ္ဍ၊ ဟိုတယ်နှင့် ခရီးသွားလာရေးကဏ္ဍ၊ ရေအား လျှပ်စစ်ကဏ္ဍအစရှိသည့် ကဏ္ဍများအတွက် သဘာဝပတ်ဝန်းကျင်ထိခိုက်မှု စစ် ဆေးခြင်းဆိုင်ရာ လမ်းညွှန်ချက်များကို အပြည်ပြည်ဆိုင်ရာ အဖွဲ့အစည်းများ၏ အကူအညီဖြင့် ရေးဆွဲလျက်ရှိကြောင်း ၎င်းက ပြောကြားခဲ့သည်။
Credit: News Watch
