လှိုင်သာယာမြို့နယ်တွင် တည်ဆောက်လျက်ရှိသည့် ကျန်စစ်မင်းအိမ်ရာ စီမံကိန်းမှ တိုက်ခန်းများကို ဝယ်ယူနိုင်ပြီ ဆိုသည့်သတင်းများ ထွက်ပေါ်နေပြီး ယခုအချိန်အထိ တစ်စုံတစ်ယောက်ကိုမျှ ရောင်းချပေးခြင်း မရှိသေးကြောင်း မြို့ပြနှင့် အိမ်ရာဖွံ့ဖြိုးရေး ဦးစီးဌာနထံမှ သိရသည်။
ကျန်စစ်မင်းအိမ်ရာမှ တိုက်ခန်းများကို ၂၀၁၄ ခုနှစ်မှစတင်ပြီး သုံးနှစ် စီမံကိန်းဖြင့် ဆောက်လုပ်လျက်ရှိပြီး တည်ဆောက်မှုကာလ မပြီးသေးသော်လည်း အချို့ ပွဲစားဆိုသူများက ဝယ်ယူလိုသူများကို ဝယ်ယူခွင့်ရရှိစေရန် ဆောင်ရွက်ပေးမည်ဟုဆိုကာ လိမ်လည်မှုများ ဖြစ်ပေါ်လျက်ရှိကြောင်း လှိုင်သာယာမြို့နယ်နေ ဒေသခံပြည်သူများထံမှ စုံစမ်း သိရသည်။
ယခုလက်ရှိတွင် မြို့ပြနှင့်အိမ်ရာ ဖွံ့ဖြိုးရေး ဦးစီးဌာနမှ ကျန်စစ်မင်းအိမ်ရာ တည်ဆောက်နေသည့် နေရာတွင် အဖွဲ့အစည်းများနှင့် မည်သူ့ကိုမျှ ရောင်းချထားခြင်း မရှိသေးကြောင်းဆိုသည့် ဆိုင်းဘုတ်များကို အများပြည်သူ သိရှိစေရန် စိုက်ထူထားကြောင်း မြို့ပြနှင့် အိမ်ရာဖွံ့ဖြိုးရေး ဦးစီးဌာနထံမှ အကြီးတန်း အရာရှိတစ်ဦးက ပြောကြားသည်။
“ကျန်စစ်မင်းအိမ်ရာက လက်ရှိ အချိန်ထိ အရောင်း မဖွင့်သေးပါဘူး။ မြို့နယ် အုပ်ချုပ်ရေးမှူးရုံးမှာ စာတင်လို့ရတယ်ဆိုတာက ဝယ်ယူချင်တဲ့သူတွေ အနေနဲ့ စာရင်းပေးထားလို့ ရတာကို ပြောတာပါ။ မရောင်းသေးပါဘူး။ ရောင်းချမယ် ဆိုရင်လည်း အများပြည်သူ သိအောင် ကြေညာပြီးမှ ရောင်းချမှာပါ”ဟု ၎င်းက ဆိုသည်။
ကျန်စစ်မင်း အိမ်ရာစီမံကိန်းကို အပိုင်း ၃ ပိုင်းခွဲကာ တန်ဖိုးနည်း၊ တန်ဖိုးလတ် တိုက်ခန်းပေါင်း ၃၀ဝ၀ ကျော်ကို ရောင်းချမည်ဖြစ်ကြောင်းနှင့် လက်ရှိတွင် အပိုင်း ၁ တစ်ခုသာ ပြီးစီးပြီဖြစ်သော်လည်း အပိုင်း ၂ နှင့် ၃ ကို ဆောက်လုပ်လျက်ရှိရာ ၂၀၁၇ ခုနှစ် နိုဝင်ဘာလတွင် ပြီးစီးရန် မျှော်မှန်းထားကြောင်းနှင့် တိုက်ခန်းဈေးနှုန်းများကို မသတ်မှတ်ရသေးကြောင်း မြို့ပြနှင့်အိမ်ရာ ဖွံ့ဖြိုးရေးဦးစီး ဌာနထံမှ သိရသည်။
“ဆိုက်ကားသမားက အစပြောတယ်။ ဒီမှာ တိုက်ခန်း ဝယ်ချင်ရင်ပြော သူတို့ ဆက်ပေးလို့ရတယ်။ ဘယ်အခန်း လိုချင်လဲ ဆိုပြီးပြောနေတာတွေ ရှိတယ်။ မြို့နယ် အုပ်ချုပ်ရေးရုံးမှာ စာတင်ပြီး ဝယ်လို့ ရတယ်ပြောတယ်။ တချို့ နယ်ကသူတွေ ဘာမှမသိတော့ တကယ် ထင်ကြပြီး ပွဲစားတွေဆီမှာ အလိမ်ခံရတာတွေ ရှိတယ်”ဟု လှိုင်သာယာမြို့နယ် ၈ ရပ်ကွက်နေ ဒေါ်ဇာခြည်လင်းက ဆိုသည်။
Credit: The Voice
