ယခု ၂ဝ၁၇-၂ဝ၁၈ ဘဏ္ဍာရေးနှစ် ဇူလိုင်လလယ်အထိ ဘဏ္ဍာနှစ် သုံးလကျော် ကာလအတွင်း မြန်မာနိုင်ငံတွင် စုစုပေါင်း နိုင်ငံခြားရင်းနှီးမြှုပ်နှံမှုပမာဏ အမေရိကန်ဒေါ်လာ သုံးဘီလီယံကျော်ရှိလာကြောင်း မြန်မာနိုင်ငံ ရင်းနှီး မြှုပ်နှံမှုကော်မရှင်က သိရသည်။
၂ဝ၁၇-၂ဝ၁၈ ဘဏ္ဍာနှစ်အတွက် နိုင်ငံခြားရင်းနှီးမြှုပ်နှံမှု ခွင့်ပြုပေးခဲ့မှုမှာ ဇူလိုင်လလယ်အထိ နိုင်ငံခြားရင်းနှီးမြှုပ်နှံမှုလုပ်ငန်း ၉၃ ခု၊ ရင်းနှီးမြှုပ်နှံမှု ပမာဏ အမေရိကန်ဒေါ်လာ ၂၇၆၈ ဒသမ ၅၂၅ သန်းဖြစ်ပြီး ရင်းနှီးမြှုပ်နှံမှု တိုးမြှင့်ခြင်းအပါအဝင် စုစုပေါင်းရင်းနှီးမြှုပ်နှံမှုပမာဏ အမေရိဒေါ်လာ ၂၉၈၉ ဒသမ ၈၁၃ စီးဝင်ခြင်းဖြစ်သည်။
ယင်းအပြင် အထူးစီးပွားရေးဇုန် ဥပဒေအရ သီလဝါအထူးစီးပွားရေးဇုန်တွင် ရင်းနှီးမြှုပ်နှံမှုပမာဏ အမေရိကန် ဒေါ်လာ ၁၂၇ ဒသမ ၄၈ဝ သန်း ခွင့်ပြုခဲ့ခြင်းဖြစ်သဖြင့် စုစုပေါင်း ရင်းနှီး မြှုပ်နှံမှုပမာဏမှာ အမေရိကန်ဒေါ်လာ ၃၁၁၇ ဒသမ ၂၉၃ သန်း (သုံးဘီလီယံ ကျော်) စီးဝင်ခဲ့ခြင်းဖြစ်ကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင်က ယမန်နေ့ပြုလုပ်ခဲ့သော သတင်းစာရှင်းလင်းပွဲတွင် တရားဝင်ထုတ်ပြန်ခဲ့သည်။
မြန်မာနိုင်ငံ၏ နိုင်ငံခြားရင်းနှီးမြှုပ်နှံမှုကဏ္ဍတွင် အများဆုံး ရင်းနှီးမြှုပ်နှံ ထားမှုမှာ စင်ကာပူနိုင်ငံမှဖြစ်ပြီး အမေရိကန်ဒေါ်လာ ၁ဝ၉၁ ဒသမ ၇၁ သန်း၊ ဒုတိယအများဆုံး ရင်းနှီးမြှုပ်နှံထားမှုမှာ တရုတ်နိုင်ငံဖြစ်ပြီး အမေရိကန် ဒေါ်လာ ၅၃ဝ သန်းကျော်၊ တတိယအများဆုံး ရင်းနှီးမြှုပ်နှံထားမှုမှာ နယ်သာလန်နိုင်ငံဖြစ်ပြီး အမေရိကန်ဒေါ်လာ ၅၁၈ ဒသမ ၁ဝ၇ သန်းဖြစ် ကြောင်း သိရသည်။ အများဆုံး ရင်းနှီးမြှုပ်နှံထားသည့်ကဏ္ဍမှာ စက်မှုလုပ်ငန်း ဖြစ်ပြီး ဒုတိယအများဆုံး ရင်းနှီးမြှုပ်နှံထားသည့်လုပ်ငန်းမှာ အိမ်ရာ အဆောက်အအုံလုပ်ငန်းဖြစ်ကာ တတိယအများဆုံးမှာ ဝန်ဆောင်မှုလုပ်ငန်းများ ဖြစ်ကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင်က သိရသည်။
''ဒီဘဏ္ဍာနှစ်ရဲ့ သုံးလကျော် ကာလမှာကိုပဲ ရင်းနှီးမြှုပ်နှံမှုပမာဏက အမေရိကန်ဒေါ်လာ သုံးဘီလီယံကျော်သွားပါပြီ။ လျာထားချက်က ခြောက်ဘီလီယံ ဖြစ်ပေမယ့် အခုမှ သုံးလတာကာလရှိသေးတယ်ဆိုတော့ လျာထားချက်ကို ကျော်လွန်ပြီး အလားအလာကောင်းနိုင်မယ်လို့ ယူဆပါတယ်။ ဒီနှစ်က ပုံမှန် အတိုင်း ရင်းနှီးမြှုပ်နှံမှုက စီးဝင်နေပြီးတော့ မနှစ်က အနေအထားထက် ကျော်လွန်တယ်လို့ ပြောလို့ရပါတယ်။
ရင်းနှီးမြှုပ်နှံမှုဝင်ရောက်တာ နည်းတယ် လို့ ပြောလို့မရပါဘူး။ အများကြီးလာမယ် မျှော်လင့်ထားလို့သာ နည်းတယ်လို့ ထင်နေရတာပါ''ဟု မြန်မာနိုင်ငံ ရင်းနှီးမြှုပ်နှံမှုကော်မရှင်မှ တာဝန်ရှိသူ တစ်ဦးက ပြောသည်။
ယင်းအပြင် ယခုဘဏ္ဍာနှစ်အတွင်း မြန်မာနိုင်ငံသား ရင်းနှီးမြှုပ်နှံမှု ခွင့်ပြုပေးခဲ့မှုမှာ ယခုနှစ်ဇူလိုင်လလယ်အထိ လုပ်ငန်း ၃၃ ခု၊ အမေရိကန်ဒေါ်လာ ၃၉၆ ဒသမ ၈၇၃ သန်း အပါအဝင် ငွေကျပ် ၈၃၉၁၈ဝ ဒသမ ဝ၂၃ သန်းဖြစ်ကြောင်း သိရသည်။ ရင်းနှီးမြှုပ်နှံမှု တိုးမြှင့်ခြင်းအပါအဝင် စုစုပေါင်း ရင်းနှီးမြှုပ်နှံမှုပမာဏ ကျပ် ၈၃၉၂၉၃ ဒသမ ၄၂၃ သန်း စီးဝင်ခြင်းဖြစ်ကြောင်း သိရသည်။
ဇူလိုင် ၁၁ ရက်က မြန်မာနိုင်ငံ ရင်းနှီးမြှုပ်နှံမှုကော်မရှင် အစည်းအဝေး ၁ဝ/၂ဝ၁၇ ကို ပြုလုပ်ခဲ့ပြီး ယင်းအစည်းအဝေးပွဲတွင် နိုင်ငံခြားရင်းနှီးမြှုပ်နှံမှုလုပ်ငန်း ၂၇ ခု ခွင့်ပြုပေးခဲ့ပြီး ရင်းနှီးမြှုပ်နှံမှုပမာဏ အမေရိကန် ဒေါ်လာ ၉၁၆ ဒသမ ၅၉၃ သန်းနှင့် ပြည်တွင်းလုပ်သားများအတွက် အလုပ်အကိုင်အခွင့်အလမ်းပေါင်း ၇၁၅၅ ခုကို ဖန်တီးပေးနိုင်ခဲ့ကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင်မှ သိရသည်။
အဆိုပါ ခွင့်ပြုလုပ်ငန်း ၂၇ ခုမှာ စက်မှုကဏ္ဍလုပ်ငန်း ၁၄ ခု၊ ပို့ဆောင်ရေးနှင့် ဆက်သွယ်ရေးကဏ္ဍ နှစ်ခု၊ မွေးမြူရေးနှင့် ရေလုပ်ငန်းတစ်ခု၊ အခြားဝန်ဆောင်မှုလုပ်ငန်း ခုနစ်ခု၊ အိမ်ရာအဆောက်အအုံ တည်ဆောက်မှုဖွံ့ဖြိုးမှုကဏ္ဍနှစ်ခုနှင့် စိုက်ပျိုးရေး ကဏ္ဍလုပ်ငန်းတစ်ခုတို့ကို ခွင့်ပြုပေးခဲ့ခြင်းဖြစ်ကြောင်း သိရသည်။
Credit: The Mirror
