ပြည်သူ့လွှတ်တော်၊ အမျိုးသား လွှတ်တော် ကော်မတီဝင်များ၊ တိုင်းဒေသကြီး/ ပြည်နယ် လွှတ်တော် ဥက္ကဋ္ဌများ၏ လွှတ်တော် လုပ်ငန်းဆိုင်ရာ ဆွေးနွေးပွဲတွင် စီးပွားရေး ဆိုင်ရာ ဥပဒေ၊ နည်းဥပဒေများ၊ လုပ်ထုံး လုပ်နည်းများ ပြင်ဆင်ရန် အပါအဝင် ကဏ္ဍ ၁၁ ရပ်ကို ပြုပြင်ရန် အသေးစိတ် ဆွေးနွေးနေကြောင်း အဆိုပါ ဆွေးနွေးပွဲကို တက်ရောက်နေသည့် အမျိုးသား လွှတ်တော်ရေးရာ ကော်မတီဝင်များက ပြောကြားသည်။
“ဥပဒေတွေ ပြင်ဆင်ဖို့ဆိုရင် ပြည်သူ့လွှတ်တော်နဲ့ အမျိုးသား လွှတ်တော်က ဥပဒေကြမ်း ကော်မတီတွေနဲ့ပဲ သက်ဆိုင်တယ်” ဟု နိုင်ငံရေး အကဲခတ် တစ်ဦးက သုံးသပ်ပြသည်။ လတ်တလော လွှတ်တော် လုပ်ငန်းဆိုင်ရာ ဆွေးနွေးပွဲမှာ Capacity Building ကို လုပ်ဆောင်နေသည်ဟု ဆိုနိုင်ကြောင်း၊ လာမည့်လ (ဇွန်လ) တွင် တည်ဆဲဥပဒေများမှ ပြင်ဆင် ပယ်ဖျက်၊ ပြုပြင်သင့်သည့် ဥပဒေများ စိစစ်မှုများကို လုပ်ဆောင်သွားရန် ရှိကြောင်း အမျိုးသား လွှတ်တော် ဥပဒေကြမ်း ကော်မတီဝင် ဒေါက်တာ မြတ်ဉာဏစိုးက ဆိုသည်။
လွှတ်တော် လုပ်ငန်းဆိုင်ရာ ဆွေးနွေးပွဲတွင် ဆွေးနွေးနေသော ကဏ္ဍ ၁၁ ရပ်မှာ ၁ - မြန်မာနိုင်ငံတွင် ကျင့်သုံးလျက် ရှိသော ဥပဒေများ ဖြစ်ပေါ်လာပုံနှင့် ဥပဒေ ရေးဆွဲ ပြဋ္ဌာန်းခြင်းတို့နှင့် စပ်လျဉ်း၍ ရှင်းလင်း ဆွေးနွေးခြင်း၊ ၂ -ဥပဒေ ရေးဆွဲခြင်းဆိုင်ရာ အခြေခံ သဘောတရား၊ ၃ - ဥပဒေ၏ အခြေခံ သဘောတရား၊ ၄ - ပြင်ဆင်ရန်၊ ပယ်ဖျက်ရန်၊ အသစ်ရေးဆွဲရန် လိုအပ်သော တည်ဆဲဥပဒေများ လေ့လာတင်ပြခြင်း၊ ၅ - စီးပွားရေးဆိုင်ရာ ဥပဒေ၊ နည်းဥပဒေများ၊ လုပ်ထုံးလုပ်နည်းများ အပေါ် ပြင်ဆင်သင့်သည်များ၊ လိုအပ်ချက်များကို သုံးသပ်ခြင်း၊ ၆ - စီးပွားရေး စီမံကိန်းများ အကောင်အထည်ဖော်မှုနှင့် အကျိုးသက်ရောက်မှု စစ်ဆေးခြင်း၊ ၇ - လက်ရှိ ချမှတ်ပေးထားသော လုပ်ငန်းတာဝန်အပေါ် အကောင်အထည်ဖော် ဆောင်ရွက်ရန် အတွက် သုံးသပ်ချက်၊ ရသုံးမှန်းခြေ ရေးဆွဲပုံ သမိုင်းကြောင်း အဆင့်ဆင့်နှင့် လက်ရှိ ရသုံးမှန်းခြေ ရေးဆွဲပုံ၊ ၈ - ကောင်းမွန်သော အုပ်ချုပ်မှု စနစ်နှင့် သန့်ရှင်းသော အစိုးရ ဖြစ်ပေါ်လာရေး၊ အစိုးရ အဖွဲ့အသီးသီး၏ ဆောင်ရွက် ကြပ်မတ် ကွပ်ကဲရန် အခန်းကဏ္ဍ၊
၉ - တောင်သူလယ်သမား အခွင့်အရေး ကာကွယ် စောင့်ရှောက်သော ဥပဒေများ လေ့လာတင်ပြခြင်း၊ ၁ဝ - အလုပ်သမား အခွင့်အရေး ကာကွယ် စောင့်ရှောက်သော ဥပဒေများ လေ့လာတင်ပြခြင်း၊ ၁၁ - တိုင်းဒေသကြီး၊ ပြည်နယ် အသီးသီးမှ လွှတ်တော်များနှင့် ပြည်ထောင်စုအဆင့် လွှတ်တော်များ၊ တိုင်းဒေသကြီး/ ပြည်နယ်အဆင့် အစိုးရများနှင့် ဆက်သွယ်ရေး လမ်းကြောင်းတို့ ဖြစ်ကြောင်း အဆိုပါ ဆွေးနွေးပွဲ တက်ရောက်သူများ ထံမှ သိရသည်။
Credit: The Voice Weekly
