သာသနာရေးနှင့် ယဉ်ကျေးမှုဝန်ကြီးဌာန ရှေးဟောင်း သုတေသနနှင့် အမျိုးသားပြတိုက် ဦးစီးဌာန၊ ရန်ကုန်ဌာနခွဲ၌ ပုဂံယဉ်ကျေးမှု အမွေအနှစ်ဒေသအား ကမ္ဘာ့အမွေအနှစ်တင်သွင်းရေး လုပ်ငန်းများဖြစ်သည့် ပုဂံဒေသနှင့် ပတ်သက်သည့် စံနှုန်းသတ်မှတ်ချက်များ၊ အဆိုပြုစာတွဲ (မူကြမ်း) ရေးသားပြီးစီးမှု၊ ပုဂံဒေသ ရေရှည်စီမံခန့်ခွဲမှု အစီအစဉ်(Management Plan) ရေးသားပြီးစီးမှု၊ ကမ္ဘာ့အမွေအနှစ် စာရင်းတင်သွင်းခြင်း ဆက်လက်ဆောင်ရွက်ရန် Time Frame များနှင့် ပတ်သက်၍ ညှိနှိုင်း ဆွေးနွေးပွဲကို ယနေ့ နံနက် ၉နာရီခွဲတွင် ကျင်းပသည်။
အဆိုပါ ညှိနှိုင်း အစည်းအဝေးသို့ သာသနာရေးနှင့် ယဉ်ကျေးမှုဝန်ကြီးဌာန၊ ပြည်ထောင်စု ဝန်ကြီး သူရဦးအောင်ကိုနှင့် ရှေးဟောင်းသုတေသနနှင့် အမျိုးသားပြတိုက်ဦးစီးဌာန တာဝန်ရှိသူများ၊ ဟိုတယ်နှင့် ခရီးသွားလုပ်ငန်းဝန်ကြီးဌာန၊ မြန်မာနိုင်ငံခရီးသွားလုပ်ငန်းအဖွဲ့ချုပ်၊ JICA မှ တာဝန်ရှိသူများ၊ မြန်မာနိုင်ငံဗိသုကာအသင်း၊ UNESCO မှ တာဝန်ရှိပုဂ္ဂိုလ်များနှင့် ဖိတ်ကြားထားသည့် ပြည်တွင်း/ ပြည်ပပညာရှင်များ တက်ရောက်ကြသည်။
အစည်းအဝေးတွင် သာသနာရေးနှင့် ယဉ်ကျေးမှုဝန်ကြီးဌာန၊ ပြည်ထောင်စုဝန်ကြီး၊ သူရဦးအောင်ကိုက ပုဂံယဉ်ကျေးမှု အမွေအနှစ်ဒေသကို ကမ္ဘာ့အမွေအနှစ် စာရင်းတင်သွင်းရေး ဆောင်ရွက် လျက်ရှိသည့် လုပ်ငန်းစဉ်တင်ပြချက်များအပေါ် လိုအပ်သည်များ ဖြည့်စွက်ဆောင်ရွက်ပေးခြင်း၊ အောင်မြင်စွာ အကောင်အထည် ဆောင်ရွက်ရေး အတွက် ဖွဲ့စည်းထားသည့်ကော်မတီ၊ ဆပ်ကော်မတီများ ဆက်စပ် ပူးပေါင်းပေးခြင်း၊ လိုအပ်သည့် အဆုံးအဖြတ်များ ချမှတ်ပေးခြင်းများ ဆောင်ရွက်ခဲ့သည်။
အစည်းအဝေးတွင် Management Plan ဆိုင်ရာ (First Draft) အား ရှင်းလင်း တင်ပြခြင်း၊ ပုဂံဒေသ Master Plan ရေးဆွဲရေးနှင့် ပတ်သက်၍ ဆွေးနွေးခြင်း၊Bagan Tourism Master Plan နှင့်ပတ်သက်၍ ရေးဆွဲ ဆောင်ရွက်နေမှုများ ဆွေးနွေးခြင်း၊ UNESCO သို့ တင်ပြမည့် အဆိုပြု စာတွဲ(မူကြမ်း) ရေးဆွဲခြင်း ဆောင်ရွက်နေမှု စသည့်ကိစ္စရပ်များကို ဆွေးနွေးကြသည်။
ပုဂံဒေသအား ကမ္ဘာ့အမွေအနှစ်စာရင်း တင်သွင်းရေးအတွက် ၂၀၁၄−ခုနှစ်က စတင် ဆောင်ရွက်ခဲ့ရာ ယခုနှစ် စက်တင်ဘာလကုန်တွင် ကမ္ဘာ့အမွေအနှစ်စာရင်း ဝင်ရောက်ရေး အဆိုပြု စာတွဲ(မူကြမ်း) ရေးသားတင်ပြ ရမည်ဖြစ်ပြီး၊ ရေရှည်စီမံခန့်ခွဲမှုအစီအစဉ်များ၊ သဘာဝ ဘေးအန္တရာယ် ကာကွယ် ထိန်းသိမ်းရေး အစီအစဉ်များ၊ ခရီးသွားဖွံ့ဖြိုးတိုးတက်မှုကြောင့် ယဉ်ကျေးမှုအမွေအနှစ်များ ထိခိုက်ပျက်စီးမှု မဖြစ်စေရန် အလေးထား ကာကွယ်ထိန်းသိမ်းမည့် အစီအစဉ်များကိုပါ ရေးဆွဲတင်ပြရ မည်ဖြစ်သည်။
အဆိုပါစာတွဲ အပြည့်အစုံကို ၂၀၁၈ခုနှစ်၊ ဇန်နဝါရီလကုန်တွင် နောက်ဆုံးထား တင်သွင်းရေး အတွက် သာသနာရေးနှင့် ယဉ်ကျေးမှုဝန်ကြီးဌာန၊ ဟိုတယ်နှင့် ခရီးသွား လာရေးဝန်ကြီးဌာန၊ မန္တလေး တိုင်းဒေသကြီး အစိုးရအဖွဲ့၊ မြန်မာနိုင်ငံဗိသုကာ အသင်း၊ မြန်မာနိုင်ငံ အင်ဂျင်နီယာအသင်းတို့ ပူးပေါင်း၍ ကြိုးပမ်းဆောင်ရွက်လျက် ရှိသည်။ အဆိုပါအစည်းအဝေးကို ဇူလိုင် (၇)ရက်အထိ ဆက်လက် ကျင်းပမည် ဖြစ်ကြောင်း သိရသည်။
Credit: MOI Webportal Myanmar
