မြန်မာလူမျိုးတွေရဲ့ သဘောသဘာဝ အရ ၀ါတွင်းကာလတွေမှာ အိမ်အပြောင်းအရွေ့လုပ်တာ မရှိသလောက် ရှားပါးပါတယ် ၊ အခုနောက်ပိုင်းမှာသာ မဖြစ်မနေ အရေးပေါ် အခြေအနေ တွေလောက်မှဘဲ အနည်းအပါး ပြောင်းရွေ့တာ ရှိပါတယ် ၊ ၀ါတွင်းကာလမှာ အိမ်အပြောင်းအရွှေ့လုပ်တာ ၊ မင်္ဂလာဆောင်တာတွေ မလုပ်ကြတာ ထုံးတမ်းအစဉ်အလာ တစ်ခုလို ဖြစ်နေပါတယ် ။ ဒီတော့ အိမ်ဌားမယ် ၊ အိမ်ရောင်းအိမ်ဝယ်မယ် ၊ အိမ်တက်မယ် ဆိုရင်လည်း ၀ါတွင်းကာလမရောက်ခင် အလုပ်လုပ်ကြတာဖြစ်ပါတယ်။ ဒါကြောင့် ဒီအချိန်မှာ အိမ်ဌားတဲ့ အလုပ်က အရမ်းအလုပ်ဖြစ်နေတာဖြစ်ပါတယ် ။
အိမ်တစ်လုံးနဲ့ တစ်လုံး ပြောင်းရွေ့ရတာ လွှယ်တဲ့ ကိစ္စမဟုတ်သလို အိမ်ရှာရတဲ့ ဒုက္ခမသေးတာ အိမ်ဌားဖူးသူတိုင်း အသိဘဲ ဖြစ်ပါတယ် ၊ ဘယ်သူမှ ဒီဒုက္ခကို မခံချင်ပေမယ့်လည်း ဖြစ်ချင်တာထက်
ဖြစ်သင့်တာကိုဘဲ ရွေးချယ်ရတဲ့ အခြေခံလူတန်းစား တွေ ၊
လူလတ်တန်းစာ အတွက် ရွေးချယ်စရာ မရှိပါဘူး ၊ ရန်ကုန်မှာရှိတဲ့
မိသားစုဝင် တွေရဲ့ စုစုပေါင်း ၈၀ ရာခိုင်နှုန်းဟာ အိမ်ဌားသံသရာထဲမှာ လည်ပတ်နေရဆဲဖြစ်ပါတယ် ၊ ၂၀ ရာခိုင်နှုန်းလောက်ဘဲ
အိမ်ပိုင်တယ် လို့ အိမ်ခြံမြေ ကျွမ်းကျင်သူတွေက ဟောပြောပွဲတွေမှာ ထည့်သွင်းဟောပြောခဲ့ကြပါတယ် ။ အိမ်ဌားတွေ အိမ်ပိုင်နိုင်ဖို့ အတွက် ကတော့ တာဝန်ရှိသူတွေ အစီအမံကောင်းရင်ကောင်းသလို
ဖြစ်နိုင်ပါတယ် ။
သူတို့ဘယ်စစ်တမ်းကို ကောက်ပြီး ပြောတာ မသိပေမယ့် သေချာတဲ့ အမှန်တရာကတော့ အိမ်ပိုင်တဲ့ မိသားစု တွေ ရဲ့ ဦးရေထက် အိမ်ဌားနေရတဲ့ မိသားစု ဦးရေက တော်တော်လေးများပြားတာ ကတော့ မျက်မြင်ဘဲဖြစ်ပါတယ် ၊ အိမ်ဌားမိသားစုတွေ တိုင်း လိုချင်တဲံတောင်းတမှု တစ်ခုကတော့ အိမ်မပိုင်ခင်စပ်ကြားမှာ မကြာခဏ အပြောင်းအရွေ့ မလုပ်လိုတဲ့ အပြင် ခြေက်လတစ်ခါလောက် အိမ်လခ တိုးပေးရတဲ့ ဒုက္ခ ၊
ပွဲစား အကျိုးဆောင်က ခလောက်ဆန်လို့ မကြာခဏ ပြောင်းပြေးရတဲ့ ဒုက္ခတွေက လည်း အိမ်ဌားဖူးတွေ တိုင်းခံစားရတဲ့ အတွေ့အကြုံဆိုးတွေ ဖြစ်ပါတယ် ။
မိသားစု အခြေကျလို့ ခြောက်လတစ်နှစ်လောက် နေပြီဆိုရင်ဘဲ အကြောင်းအမျိုးမျိုးကြောင့် အိမ်ပြောင်းရွေ့ရတဲ့ အတွက် အခြေကျနေတဲ့မိသားစု တွေ ဘ၀ကို မကြာခဏ
စရသလိုဖြစ်ပြီး လူပင်ပန်းဆင်းရဲဒုက္ခကို ခံစားနေကြရတာဖြစ်ပါတယ် ။
မကြာခဏဆိုသလို ပတ်ဝန်းကျင် အသစ်သစ်တွေနဲ့ ပေါင်းသင်းဆက်ဆံရသလို ကျောင်းတက်နေတဲ့ ကလေး
ရှိတဲ့ မိသားစု ၀င်တွေဆို ကသီကလင် ဖြစ်ကြရပါတယ် ။
ဇူလိုင်လ ၈ ရက်နေ့ ဆိုရင် ၀ါတွင်းကာလကို ရောက်လာပြီဖြစ်ပါတယ် ၊ ၀ါတွင်းကာလ မတိုင်ခင် အိမ်ပြောင်းရွေ့လုပ်တာတွေ ၊
အိမ်ဌားကြရတာတွေ ၊ နှစ်ပြည့်လို့ အိမ်စာချုပ် အသစ်တစ်ဖန် ပြန်ချုပ်ရတာတွေကြောင့် ဒီအချိန်က အိမ်ခြံမြေ အကျိုးဆောင်
ပွဲစားတွေ အလုပ်ဖြစ်တဲ့ အချိန် ဖြစ်ပြီး ရပ်ကွက်ထဲမှာ မျက်နှာပန်းလှတဲ့ အချိန်အခါလည် ဖြစ်ပါတယ် ။
အိမ်ဌားဘ၀မှာ ပွဲစား အကျိုးဆောင် ကောင်းရင်ကောင်းသလို
အိမ်ဌားရတာ စိတ်ချမ်းသာရသလို ပွဲစားညစ်လို့ ပွဲပျက်ပြီး
အိမ်ဌားစိတ်ပျက် ရတဲ့ ၀ိသမားသား ပွဲစားတွေကလည်း အများကြီး
ရှိပါတယ် ၊ ပွဲစား အကျိုးဆောင်ဆိုတာ ရုံးခန်းကြီးကြီးကျယ်ကျယ် နဲ့
ဖွင့်ထားတဲံ ကုမ္မဏီ တွေကနေ လမ်းဘေးဈေးသည် ၊
ကွမ်းယာသည်က အစ ဒီအချိန်မှာ ပွဲစားဖြစ်နေတက်ပါတယ် ။
မကောင်းတဲ့ အကျိုးဆောင် ပွဲစားတွေ ရှိသလို ကောင်းတဲ့ အကျုိုးဆောင် ပွဲစားတွေလည်း ဒုနဲ့ထေး ရှိပါတယ် ။
စာရေးသူ နေတဲ့ ရပ်ကွက်ထဲမှာဆိုမိတ်ဆွေ အိမ်ဌားတော်တော်များများက ဟိုဘက်လမ်းကနေ ဒီဘက်လမ်းကို ပြောင်းလာလိုက် ၊ ဒီဘက်လမ်းက နေ ဟိုဘက်လမ်းကို ပြောင်းသွားလိုက် ၊ အခုနှစ်ထပ်အိမ်ကနေ နောက်ခြောက်လ တစ်နှစ်နေရင် တစ်ထပ်အိမ်ကို ရောက်သွားလိုက်နဲ့ မိတ်ဆွေတွေရဲ့ အိမ်ကို မကြာခဏ မှတ်သားထားရပါတယ် ၊ အခုလို ၀ါဝင်ကာနီး အချိန်ဆီ ရပ်ကွက်ထဲမှာ ထီးတစ်ချောင်းနဲ့ ပွဲစားနောက်လိုက်ပြီး အိမ်လိုက်ရှာနေတဲ့ လူတွေ ၊ ပွဲခမရလို့ အချင်းချင်း နပန်းသတ် နေရတဲ့လူတွေ ၊ ပွဲခ အဝေမတည့်လို့ အပြန်အလှန် အော်ဟစ်နေတဲ့ မြင်ကွင်းတွေကို ၀ါဝင်ကာနီးကာလ ရောက်လေ နေ့စဉ်ရက်ဆက်သလို မြင်တွေ့ရလေ ဖြစ်ပါတယ် ။
တစ်ခါတစ်လေ အိမ်ဋ္ဌားအချင်းချင်း လက်တို့ပြီး သတင်းပေးတာကြောင့် အဌားဖြစ်သွားခဲ့ရင် တောင် ရပ်ကွက်ပွဲစား အချို့ရဲ့စောင်းမြောင်း ပြောဆိုခြင်းကို ခံခဲ့ရတဲမိသားစုတွေ လည်း ရှိပါတယ် ။ အိမ်ဋ္ဌားမယ့်လူတွေကလည်း သက်သာလို သက်သာ ဌား အိမ်ရှာနေရသလို ၊ ရှိပြီးသား အိမ်ဌားတွေကလည်း နောက်ထပ် စာချုပ်ချုပ်ရင် အိမ်ရှင်က လစာတိုးမတောင်ဖို့ ၊ ပွဲစားက လာပြီး မုန့်ဖိုးပဲဖိုး လာမတောင်းဖို့ ကျိတ်ပြီးဆုတောင်းနေရတဲ့လူတွေလည်း အများကြီးရှိပါတယ် ။ ခါတော်မှီ ပွဲစားအချို့ရဲ့ လုပ်ဇတ်ကြောင့် တစ်လ ငါးသောင်းလောက် နဲ့ မူလဋ္ဌားထားတဲံ လူကို ဖယ်ခိုင်း ရှစ်သောင်းလောက် ပေးမယ့်လူကို တင် ၊ ငါးသောင်းနဲ့ ဆင်းသွားတဲ့ လူကို တစ်ခြားနေရာမှာ ပြန်ပြီး အိမ်ပြန်ရှာပေးနဲ့ နှစ်ခွင် ဖန်တက်ကြပါတယ် ၊ တစ်ခါတစ်လေ မှာ ပွဲစားအချင်းချင်း အဝေမတည့်လို့ ကွိုင်တက်ပြီး အိမ်ရှင်နဲ့ အိမ်ဌား အရှေ့မှာ ရန်ထဖြစ်တဲ့ အတွက် ပွဲပျက်သွားတဲ့ ဖြစ်စဉ်တွေကလည်း အများကြီးရှိပါတယ် ။
ဝါမ၀င်ကာလ နဲ့ ၀ါထွတ်ကာလတွေမှာ ဒီဇတ်လမ်းတွေက ဖြစ်နေအုံးမှာဖြစ်ပါတယ် ။ အိမ်ဌားသံသရာ လည်နေတဲ့ အဖြစ်ကို အဆုံးသတ်ဖို့ ဆိုတာ ယနေ့ခေတ် အိမ်ခြံမြေ ဈေးနှုန်း ၊ အိမ်ဌားခဈေးနှုန်းတွေကြောင့် ယနေ့ခေတ်မှာ အိမ်ဌားကနေ အိမ်ပိုင်ဖြစ်သွားတဲ့ အခြေခံလူတန်းစား နဲ့ လူလတ်တန်းစားတွေ ကြားမှာ အတော်လေး ရှားပါးပါတယ် ၊ ဆောက်လုပ်ရေး ဘဏ်နဲ ချိတ်ပြီး တိုက်ခန်းဝယ်မယ်လို့ စိတ်ကူးယဉ်လိုက်ပြန်ရင်လည်း ကနဦးသွင်းရမယ် သွင်းကြေး ပမာဏ က သိန်း ၃၀ အထက်ဖြစ်နေတဲ့ အပြင် ဘယ်နေ့ရမလဲ ဆိုတာလည်း မသေချမရေရာပြန်ပါဘူး ၊ စားဖို့တောင် အနိုင်နိုင် ရပ်တည်နေရတဲ့ အပြင် ၀င်ငွေနဲ့ ထွတ်ငွေ မမျှလို့ စိတ်ညစ်နေရတဲ့ အိမ်ဌားမိသားစု တွေ အနေနဲ့လည်း ဘဏ်ကိုပေးသွင်းရမယ့် ကနဦး သိန်း ၃၀ ဆိုတဲ့ ငွေကြေးဟာ ထီပေါက်မှ ဘဲဖြစ်နိုင်မယ့် အခြေအနေ ဖြစ်ပါတယ် ။
ဒီတော့ လက်ရှိနေနေတဲံ အိမ်ရှင် မငြိုငြင်အောင် ၊ အိမ်လခ တိုးမတောင်းတောင် ဆုတောင်းနေကြရုံတင်မကဘဲ မတော်တဆ အိမ်ရှင်က မထားတော့ဘူးဆိုရင် ဈေးသက်သက်သာသာ နဲ့ အိမ်ကောင်းကောင်းလေး ရနိုင်အောင် ပွဲစား အကျိုးဆောင်ကို မျက်နှာချိုသွေးရအုံးမှာဖြစ်ပါတယ် ။
ရန်ကုန်ကို နှစ်စဉ်လူဦးရေ သုံးသိန်းလောက် ၀င်နေတဲ့ အတွက် အိမ်ခန်းလိုအပ်ချက်က ငါးသောင်းနဲ့ ခြောက်သောင်းအကြားမှာ ပုံမှန်လိုပါတယ် ၊ ဒါပေမယ့် ဈေးကွက်ထဲမှာ ဆောက်နိုင်တာ က အခန်းပေါင်း နှစ်သောင်းကျော်ကျော်လောက်ဘဲ ရှိတဲ့အပြင် အခုနောက်ပိုင်းဆောက်လုပ်ရေးတွေ အခြေအနေ မကောင်းလို့ ဘယ်သူမှလည်း အရဲစွန့်ပြီး မဆောက်ရဲ ကြတဲ့ အတွက် ဈေးကွက်လိုအပ်ချက်က တစ်ဖြည်းဖြည်းနဲ့ ကြီးမားလာနေတာဖြစ်ပါတယ် ။ supply နဲ့ demand မမျှတတဲ့ အပြင် စီးပွားရေးမကောင်းဘူးလို့ လုပ်ငန်းရှင်တွေ ထိုင်အော်နေတဲ့ အချိန်အခါမှာ အိမ်ဌားတွေရဲ့ဘ၀ဟာ အိမ်ရှင်တွေနဲ့ အကျိုးဆောင်ပွဲစားတွေရဲ့ လက်ခုပ်ထဲက စံပယ်ပန်းလေး တစ်ပွင့်သာ ဖြစ်ပါကြောင်း တင်ပြလိုက်ပါသည်။
ကိုချစ်ခင် မှ iMyanmarHouse.com အတွက် အထူးရေးသားဖော်ပြသည်။
Credit: iMyanmarHouse.com
