မြိတ်အဝေးပြေးကားဝင်းနှင့် ဘက်စုံဖွံ့ဖြိုးမှုစီမံကိန်း၊ ကုန်းမြင့်သာ ဘက်စုံဖွံ့ဖြိုးမှုစီမံကိန်းမှ အိမ်ယာတိုက်ခန်းများ အရစ်ကျစနစ်ဖြင့် ရောင်းချ

တနင်္သာရီတိုင်းဒေသကြီး၊ မြိတ်မြို့ မြိတ်အများပိုင်ကော်ပိုရေးရှင်းမှ ဆောင်ရွက်လျှက်ရှိသည့် မြိတ်အဝေးပြေးကားဝင်းနှင့် ဘက်စုံဖွံ့ဖြိုးရေးစီမံကိန်း၊ ကုန်းမြင့်သာ ဘက်စုံဖွံ့ဖြိုးရေးစီမံကိန်းတို့တွင် ဆောက်လုပ်ပြီးစီးသည့် အရောင်းဆိုင်ခန်းများ၊ လူနေအိမ် တိုက်ခန်းများ အရောင်းဖွင့်လှစ် မိတ်ဆက်ခြင်းကို ဇွန်လ(၁၀)ရက်နေ့ နံနက်(၉)နာရီက မြိတ်ခရိုင်ငါးလုပ်ငန်းအဖွဲ့ချုပ်ရုံး ပထမထပ်တွင် ပြုလုပ်ခဲ့သည်။

ရှေးဦးစွာ မြိတ်အများပိုင်ကော်ပိုရေးရှင်းမှ မန်းနေးဂျင်းဒါရိုက်တာနှင့် အဖွဲ့က အခမ်းအနားကို ဖဲကြိုးဖြတ် ဖွင့်လှစ်ကာ တွဲဘက်မန်နေးဂျင်းဒါရိုက်တာ ဦးအောင်ချိန်က စီမံကိန်း အရောင်းခန်းမများနှင့် ပတ်သက်၍ လည်းကောင်း၊ ဧရာဝတီဘဏ်(မြိတ်ဘဏ်ခွဲ - ၁)မှ မန်နေဂျာက ဘဏ်နှင့်ချိတ်ဆက်၍ အရစ်ကျ စနစ်ဖြင့် ရောင်းချပေးမည့် အစီအစဉ်နှင့် အတိုးနှုန်းများကိုလည်းကောင်း ရှင်းလင်းသည်။

အရစ်ကျဝယ်ယူလိုသူတွေအနေဖြင့် မိမိဝယ်ယူမည့် တိုက်ခန်းတန်ဖိုး၏ (၃၀)ရာခိုင်နှုန်းကို ကနဦး ပေးသွင်းရမည် ဖြစ်ကြောင်း၊ အတိုးကို ဘဏ်စိုက်ငွေ(၇၀)ရာခိုင်နှုန်းထဲမှ တစ်နှစ်ကို (၁၃)ရာခိုင်နှုန်းကို ကောက်ယူပြီး ၀န်ဆောင်မှုအနေဖြင့် (၃)ရာခိုင်နှုန်း ယူမည်ဖြစ်ကြောင်း၊ သိန်း(၁၀၀)တန် တိုက်ခန်းဝယ်ယူသူ အနေဖြင့် ကနဦး(၃၀)ရာခိုင်နှုန်းသွင်းပြီး လစဉ် (၁၃၅၈၀၀)ကျပ်ကို (၃)နှစ်ပေးသွင်းရမည်ဖြစ်ကြောင်း မြိတ်ဧရာဝတီဘဏ်ခွဲ(၁)မှ တာဝန်ခံမန်နေဂျာက ပြောသည်။

မြိတ်လေယာဉ်ကွင်း လမ်းမကြီး အနီးရှိ မြိတ်အဝေးပြေးကားဝင်းနှင့် ဘက်စုံဖွံ့ဖြိုးမှု စီမံကိန်းတွင် တိုက်ခန်းများမှာ ငွေကျပ်သိန်း(၆၀၀)မှ သိန်း(၈၀၀)အထိရှိပြီး၊ တစ်လငှားရမ်းခမှ ငွေကျပ်(၅)သိန်းမှ (၇)သိန်း အထိရှိကာ ရေပုန်းရပ်ကွက် ကုန်းမြင့်သာ ဘက်စုံဖွံ့ဖြိုးရေးစီမံကိန်းရှိ တိုက်ခန်းများမှာ မြေညီထပ်မှ စတုတ္ထထပ်အထိ ငွေကျပ်သိန်း(၁၀၀)မှ သိန်း(၄၃၀)အထိရှိကာ အရစ်ကျ ၀ယ်ယူလိုသူများ အနေဖြင့် ဧရာဝတီဘဏ်(မြိတ်ဘဏ်ခွဲ)ဖြင့် ချိတ်ဆက်ကာ ကနဦး (၃၀)ရာခိုင်နှုန်းကို ပေးသွင်းရမည်ဖြစ်ကာ ကျန်ငွေများကို အရစ်ကျစနစ်ဖြင့် (၃)နှစ်အကျေ လစဉ်ပေးသွင်းရမည်ဖြစ်ကြောင်း သိရသည်။

Credit: MOI Webportal Myanmar