ယခင်အစိုးရလက်ထက်က ခွင့်ပြုပေးထားသည့် မြို့သာစက်မှု ဥယျာဉ်မြို့တော်စီမံကိန်းအား စာချုပ်ပြင်ဆင်ချုပ်ဆိုရန် စီစဉ်လျှက်ရှိသည်ဟု မန္တလေးတိုင်းဒေသကြီးအစိုးရအဖွဲ့၊ လျှပ်စစ်၊ စွမ်းအင်နှင့်ဆောက်လုပ်ရေးဝန်ကြီးဌာန၊ ဝန်ကြီး ဦးဇာနည်အောင်က မဇ္ဈိမကို ပြောသည်။
"စာချုပ်ပါအချက်တွေက သူတို့ဘက်က အသာကြီးပဲ။ဒါကြောင့် အချက်သုံးချက် ပြင်ဆင်ချုပ်ဆိုဖို့ လုပ်နေပါတယ်။ အစိုးရအတွက်လည်း နစ်နာတယ်။ ဒေသခံတွေအတွက်လည်း နစ်နာတယ်။ အဲဒီအချက်တွေကို ပြင်ဆင်မှာပါ"ဟု ဝန်ကြီးဦးဇာနည်အောင်က ပြောသည်။
ယခင်အစိုးရလက်ထက်က ချုပ်ဆိုထားသည့် စာချုပ်ပါအချက်များကို ထုတ်ဖော်ပြောကြားခြင်း မပြုသလို ပြန်လည်ပြင်ဆင်မည့်
အချက်များကိုလည်း ဝန်ကြီးမှ ထည့်သွင်းပြောကြားခြင်းမပြုပေ။
"မြို့သာစီမံကိန်းကို သဘောကျတယ်။ တကယ်လည်း မြို့ပြဖွံ့ဖြိုးရေး လုပ်နေတယ်။ ဒါပေမယ့် မြေကြီး မြေပုံလုပ်မထားဘူး။ ကျွန်တော်တို့လည်းလေ့လာပါတယ်"ဟု ဝန်ကြီးဦးဇာနည်အောင်က ပြောသည်။
ထိုစီမံကိန်းဧရိယာမှာ မြေဧက တစ်သောင်းကျော်ရှိပြီး မြေယာလျှော်ကြေးကိစ္စများကိုလည်း တောင်သူများနစ်နာမှုမရှိစေရန် လုပ်ဆောင်သွားမည်ဟု ဝန်ကြီး ဦးဇာနည်အောင်က ဆိုသည်။
Credit: Mizzima Burmese
