ရန်ကုန်မြို့တော် စည်ပင်သာယာနယ်နိမိတ်အတွင်းရှိ ဘုရင့်နောင်တံတား၊ အောင်ဇေယျတံတား၊ ရွှေပြည်သာတံတားများအား တင်ဒါလုပ်ကိုင်ခွင့် ပေးထားသည့်အတွက် အဆိုပါ တံတားများ ဖြတ်သန်းခကောက်ခံမှု ရပ်ဆိုင်းရန် ဆောက်လုပ်ရေးဝန်ကြီးဌာနနှင့် ညှိနှိုင်းလျက်ရှိကြောင်း ရန်ကုန်တိုင်းဒေသကြီး လျှပ်စစ်စက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က ဒီဇင်ဘာ ၂ ရက်ကပြုလုပ်ခဲ့သည့် ရန်ကုန်တိုင်းဒေသကြီး လွှတ်တော်အစည်းအဝေးတွင် ပြောကြားသည်။
လှိုင်သာယာမြို့နယ် မဲဆန္ဒနယ် အမှတ် (၁) လွှတ်တော်ကိုယ်စားလှယ် ဦးဝင်းမောင်၏ ‘ရန်ကုန်မြို့တော် စည်ပင်သာယာရေးဧရိယာအတွင်းရှိ ဘုရင့်နောင်တံတား၊ အောင်ဇေယျတံတား၊ ရွှေပြည်သာတံတားများ ဖြတ်သန်းခ ကောက်ခံနေခြင်းအား ပြည်ထောင်စုအစိုးရအဖွဲ့နှင့် ညှိနှိုင်းကာ ရပ်ဆိုင်းပေးရန်အစီအစဉ် ရှိ မရှိ’ မေးမြန်းမှုအပေါ် ရန်ကုန်တိုင်းဒေသကြီး လျှပ်စစ်စက်မှုနှင့် လမ်းပန်း ဆက်သွယ်ရေးဝန်ကြီး ဒေါ်နီလာကျော်က ပြန်လည်ဖြေကြားခဲ့ခြင်း ဖြစ်သည်။
“အခုတင်ပြသွားတဲ့အချက်တွေကို စဉ်းစားဆင်ခြင်သုံးသပ်ပြီး ပြည်ထောင်စု ဆောက်လုပ်ရေးဝန်ကြီးဌာနနဲ့ ညှိနှိုင်းလျက်ရှိပါတယ်။ သို့သော်လည်း တံတားဖြတ်သန်းခ ကောက်ခံခြင်းဟာ တင်ဒါပေးထားတာဖြစ်တဲ့အတွက်၊ ဘဏ္ဍာနှစ်အလိုက် ဆောင်ရွက်သွားတာဖြစ်တဲ့အတွက် ကျွန်မတို့အနေနဲ့ ဆောင်ရွက်မယ်ဆိုရင်တောင် လာမယ့်ဘဏ္ဍာနှစ်မှ ဆောင်ရွက်နိုင်မှာဖြစ်ပါတယ်” ဟု ဒေါ်နီလာကျော်က ဆိုသည်။
သို့သော် ရန်ကုန်မြို့ရှိ တံတားကြီးကိုးစင်းတွင် ငွေကြေးကောက်ခံမှုများကို လာမည့် ၂၀၁၇ ခုနှစ် ဧပြီမှစ၍ ကောက်ခံတော့မည် မဟုတ်ကြောင်း ရန်ကုန်တိုင်းဒေသကြီးအစိုးရ အဖွဲ့ဝန်ကြီးချုပ် ဦးဖြိုးမင်းသိန်းက ဒီဇင်ဘာ ၁ ရက်က ကုန်သည်စက်မှု အသင်းချုပ်၌ကျင်းပသည့် ဒုတိယသမ္မတနှင့် ပုဂ္ဂလိကလုပ်ငန်းရှင်များ တွေ့ဆုံပွဲတွင် ပြောကြားခဲ့ခြင်းကြောင့် ဒေါ်နီလာကျော် ဖြေကြားခဲ့သည့်အဖြေများ ကွဲလွဲနေကြောင်း သုံးသပ်မှုများရှိနေသည်။
ထိုသုိ့ ပြောကြားချက်များ ကွဲလွဲနေမှုနှင့် ပတ်သက်၍ လှိုင်သာယာမြို့နယ် မဲဆန္ဒနယ် အမှတ် (၁) လွှတ်တော်ကိုယ်စားလှယ် ဦးဝင်းမောင်က “ကျွန်တော် ဒီတံတားကြေးတွေကို ရပ်ဆိုင်းပေးဖို့ ရန်ကုန်တိုင်းလွှတ်တော်မှာ မေးမြန်းခဲ့တာပါ။ အဲဒါကို ၀န်ကြီးက တင်ဒါသဘောအရ စောင့်နေရတယ်လို့ ဖြေကြားခဲ့ ပေမယ့် ပြည်ထောင်စုကရော၊ တိုင်းဒေသကြီး အစိုးရကရော ဆောင်ရွက်ဖို့ အားသာပါတယ်။ ၀န်ကြီးချုပ်ပြောခဲ့တာနဲ့ ၀န်ကြီးပြောခဲ့တာတွေကတော့ ပြောကြားခဲ့တဲ့ ပုဂ္ဂိုလ်တွေပေါ် မူတည်ပြီး ကွဲလွဲချက်တွေရှိပေမယ့် ၀န်ကြီးချုပ် ပြောခဲ့တဲ့အတိုင်း ဖြစ်လာမှာပါ။ ဒီတံတားဖြတ်သန်းခတွေကို ကားတစ်စီးချင်း စောင့်ဆိုင်း ကောက်ခံခြင်းကြောင့် ယာဉ်ကြောပိတ်ဆို့မှုတွေဖြစ်သလို အချိန်၊ လောင်စာဆီ ဆုံးရှုံးရမှုတွေဖြစ်ပါတယ်။ ပြီးတော့ ကွန်တိန်နာယာဉ်တွေကလည်း တံတားကြေးပေးရတဲ့အတွက် ကုန်ကျစရိတ်များပြီး ကုန်ဈေးနှုန်းကြီးမြင့်မှုကို အစိတ်အပိုင်းတစ်ခုအနေနဲ့ အထောက်အကူပြုနေပါတယ်။ ပြီးတော့ ဒီတံတားကြေး ကောက်ခံရရှိမှုဟာများပြီးတော့ နိုင်ငံတော်ကို တင်ဒါကြေးဝင်တာက နည်းနေတယ်။ ဘုရင့်နောင်တံတားဟာ အရင်နှစ်တွေက တစ်နှစ်ကို တင်ဒါကြေး သိန်း ၉၀၀၀ အစိုးရကို ပေးရပေမယ့် ကုမ္ပဏီကပြန်ရတာ တစ်ရက်ကို သိန်း ၅၀ နဲ့ ၁၀၀ ကြားရှိတဲ့အတွက် တစ်နှစ်ကို သိန်း ၁၈၀၀၀ နီးပါးရနေပါတယ်။ ဒါကြောင့် ကျွန်တော်ဒီမေးခွန်းကို တင်ပြရတာပါ” ဟု ပြောကြားသည်။
Credit:Eleven Media Group
