အဆုံးစီရင်သွားသည့် ကမ္ဘာကျော်ဖက်ရှင်ဒီဇိုင်နာ အလက်ဇန္ဒား မက်ကွင်း၏ စံအိမ် ယူရို ၂ ဒသမ ၄၅ သန်းဖြင့် ရောင်းထွက်

အလက်ဇန္ဒားမက်ကွင်း၏ အမည်ရင်းမှာ လီ အလက်ဇန္ဒား မက်ကွင်းဖြစ်ပြီး ၁၉၆၉ ခုနှစ်၊ မတ်လ ၁၇ ရက်တွင် လန်ဒန်မြို့၌ ဖွားမြင်သည်။

ဖခင်မှာ အငှားယာဉ်မောင်းဖြစ်ပြီး မိခင်မှာ ကျောင်းဆရာမတစ်ဦး ဖြစ်သည်။

Givenchy တွင် ဒီဇိုင်နာချုပ်အဖြစ် ၁၉၉၆ ခုနှစ်မှ ၂၀၀၁ ခုနှစ်အထိ လုပ်ကိုင်ခဲ့ပြီး ၁၉၉၂ တွင် ကိုယ်ပိုင်အမှတ်တံဆိပ်ဖြစ်သော Alexander McQueen အမှတ်တံဆိပ်ကို စတင်တည်ထောင်သည်။

ယင်းနောက် မကြာမီတွင် အောင်မြင်မှုများ ဆက်တိုက်ရရှိခဲ့ရာ ၁၉၉၆၊ ၉၇၊ ၂၀၀၁ နှင့် ၂၀၀၃ ခုနှစ်တို့တွင် British Designer of the Year ဆုများ ရရှိခဲ့သည်။

၂၀၁၀ ပြည့်နှစ်၊ ဖေဖော်ဝါရီလ ၁၁ ရက်တွင်ကား လန်ဒန်မြို့၊ မေဖဲယားအရပ်ရှိ နေအိမ်တွင် ကြိုးဆွဲချ အဆုံးစီရင်သွားရာ ကွယ်လွန်ချိန်တွင် အသက် ၄၀ ရှိပြီ ဖြစ်သည်။

ယခုရောင်းချလိုက်သည့် နေအိမ်မှာ စပိန်နိုင်ငံရှိ မာလော်ကာကျွန်းပေါ်တွင် တည်ရှိပြီး အလက်ဇန္ဒား မက်ကွင်းက ၂၀၀၅ ခုနှစ်မှ ကွယ်လွန်ချိန် ၂၀၁၀ ပြည့်နှစ်အထိ ပိုင်ဆိုင်ခဲ့သည်။

ဝယ်ယူသွားသူမှာ ဂျာမန်ဝယ်လက်တစ်ဦးဖြစ်ပြီး ယူရို ၂ ဒသမ ၄၅ သန်း (ကန်ဒေါ်လာ ၂ ဒသမ ၇၈ သန်း) ဖြင့် ဝယ်ယူသွားခြင်း ဖြစ်ကြောင်း ဈေးကွက်တင်ပေးခဲ့သည့် Engel & Völkers ကုမ္ပဏီက ထုတ်ပြန်သည်။

မာလော်ကာကျွန်းအနောက်ဘက် ဆန်တာ ပွန်ဆာကမ်းရိုးတန်းမြို့တွင် တည်ရှိသည်။

စတုရန်းပေ ၄၈၄၄ ပေ အကျယ်အဝန်းရှိနေအိမ်ကို မက်ကွင်းသေဆုံးပြီးနောက် ရောင်းချခဲ့ခြင်းဖြစ်ကြောင်း မာလော်ကာ အနောက်တောင်ပိုင်းဒေသ၏ Engel & Völkers မှ မန်နေးဂျင်းဒါရိုက်တာ ဟန်းစ် လန့်ဇ်က ပြောကြားသည်။

“မက်ကွင်းနောက်ပိုင်း ပိုင်ရှင်တွေက ၂၀၁၅ ခုနှစ်အတွင်းမှာ နေအိမ်ကို ပြန်လည်ပြုပြင်မွမ်းမံမှုတွေ ပြုလုပ်ခဲ့ပြီး ဖြစ်ပါတယ်။ မာလော်ကာရဲ့ သာယာတဲ့ ရာသီဥတုကို ခံစားနိုင်ဖို့အတွက် ကြီးမားတဲ့ လသာဆောင်တွေ ပါဝင်နေပါတယ်။ ဆီယာရာ ထရာမွန်တာနာ တောင်တန်းနဲ့ ဆန်တာ ပွန်ဆာ ဂေါက်ကွင်းအလှတွေကိုလည်း တွေ့မြင်ခံစားနိုင်ပါတယ်။ ဒါ့အပြင် ဆန်တာ ပွန်ဆာ ပင်လယ်ကွေ့ရဲ့ အလှကိုလည်း ခံစားနိုင်မှာ ဖြစ်ပါတယ်”ဟု ဟန်းစ်လန့်ဇ်က ဆက်လက်ပြောကြားသည်။

နေအိမ်အတွင်း အိပ်ခန်း ၅ ခန်း၊ ရေချိုးခန်း ၃ ခန်းပါဝင်ပြီး အရောင်းဈေးကွက်တွင် ၄ လခန့်ရှိနေခဲ့ကာ ယူရို ၂ ဒသမ ၄၅ သန်းဈေးခေါ်ခဲ့ပြီး အဆိုပါဈေးနှုန်းဖြင့်ပင် ရောင်းထွက်ခဲ့ကြောင်းလည်း မစ္စတာ လန့်ဇ်က ဖြည့်စွက်ပြောကြားသည်။

ရေကူးကန်တစ်ကန်၊ ကြီးမားသော လသာဆောင် ၂ ခု၊ အပူပေးစနစ်ပါသော စကျင်ကျောက် ကြမ်းခင်း၊ ခေတ်မီ မီးဖိုဆောင်၊ ပန်းဥယျာဉ်၊ မီးလင်းဖို၊ air-conditioning စနစ်၊ ကား ၃ စင်းထားသိုနိုင်သည့် မြေအောက်ကားဂိုဒေါင်တစ်ခုတို့လည်း ပါဝင်သည်။

Credit: iMyanmarHouse.com (iMyanmarHouse.com Team မှ ရေးသား ဖော်ပြသည်။)