ကမ္ဘာ့နံပါတ်တစ် ထိုင်ဝမ်ဂေါက်သီးမယ်ဟောင်းက ကံကြမ္မာကောင်းများ ရောက်လာရန်အတွက်ရည်ရွယ်ကာ အမေရိကန်ရှိ စံအိမ်ကြီးကို အရောင်းဈေးကွက်တင်

ထိုင်ဝမ် ဂေါက်ဖ်ဂန္ထဝင်ကြယ်ပွင့်၊ ကမ္ဘာ့နံပါတ်တစ် ဂေါက်သီးမယ်ဟောင်း စန်းယန်နီ (曾雅妮) သည် ဖလားတစ်ခုမျှ မရရှိသည်မှာ ၆ နှစ်နီးပါးရှိပြီဖြစ်ပြီး အမေရိကန်ရှိ ဇိမ်ခံနေအိမ်ကြီးကို ရောင်းချရန် စီစဉ်လျက်ရှိသည်။

အမေရိကန်ပြည်ထောင်စု၊ ဖလော်ရီဒါပြည်နယ်၊ အော်လန်ဒိုမြို့ရှိ စံအိမ်ကြီးကို ရောင်းချလိုက်ခြင်းမှာ ၎င်းအတွက် ကံကြမ္မာကောင်းများ ဆောင်ကြဉ်းပေးကာ ဂေါက်ဖ်လောကတွင် အောင်မြင်မှုများ ပြန်လည်ရရှိလာစေနိုင်ဖွယ်ရှိကြောင်း စန်းယန်နီက ယုံကြည်လျက်ရှိ ကြောင်း ထိုင်ဝမ်အစိုးရပိုင် Central News Agency (CNA) ၏ သတင်းတစ်ရပ်တွင် ဖော်ပြသည်။

စန်းယန်နီသည် အော်လန်ဒိုရှိ စံအိမ်ကို ဆွီဒင်လူမျိုး ကမ္ဘာ့နံပါတ် ၁ ဂေါက်ဖ်ကစားသမားဟောင်း အင်နီကာဆိုရန်စတမ်ထံမှ ၂၀၀၉ ခုနှစ်အတွင်း ကန်ဒေါ်လာ ၂ ဒသမ ၁ သန်းဖြင့် ဝယ်ယူခဲ့ခြင်း ဖြစ်သည်။

နေအိမ်အတွင်း အခန်း ၄ ခန်းပါဝင်ပြီး မြေအကျယ်အဝန်းမှာ စတုရန်းမီတာ ၅၄၀၀ ခန့် အကျယ်အဝန်းရှိသည်။

အခန်းတစ်ခုထဲတွင် စန်းယန်နီ၏ ဂေါက်ဖ်ကစားခဲ့မှု သမိုင်းမှတ်တမ်းများကို ပြသထားသည်ဟု ဆိုသည်။

အဆိုပါအခန်းရှိ စင်များပေါ်တွင် ချန်ပီယံဆုများ တန်းစီထားရှိမည်ဟု စန်းယန်နီက စိတ်ကူးခဲ့သည်။

“ကျွန်မသူငယ်ချင်းအိမ်က လူကြီးတွေပြောတာကတော့ ဒီအိမ်ကပေးမယ့် ကံကြမ္မာကောင်းတွေကို ဆိုရန်စတမ်က အားလုံးအသုံးပြုပြီး သွားပြီဖြစ်တယ်လို့ ပြောပြပါတယ်”ဟု စန်းယန်နီက ပြောကြားသည်။

ယခုနေအိမ်ကို ရောင်းချပြီးပါက ကယ်လီဖိုးနီးယားပြည်နယ်တွင် မိသားစုနှင့် နီးသောနေရာ၌ နေအိမ်သစ်တစ်လုံး ပြန်လည်ဝယ်ယူ သွားမည်ဖြစ်ပြီး မိသားစုများ တစ်ဦးနှင့်တစ်ဦးအပြန်အလှန် စောင့်ရှောက်သွားနိုင်မည်ဖြစ်ကြောင်း စန်းယန်နီက ဆက်လက်ပြောကြား သည်။

စန်းယန်နီသည် အယ်လ်ပီဂျီအေပြိုင်ပွဲများသို့ ဝင်ရောက်ခဲ့သည်မှာ ၁၀ နှစ်ခန့်ရှိပြီဖြစ်ပြီး ၂၀၁၁ ခုနှစ်မှာ အထွတ်အထိပ်သို့ ရောက်ရှိခဲ့သည့် ကာလဖြစ်သည်။ ထိုနှစ်အတွင်း ပြိုင်ပွဲ ၇ ခုတွင် အောင်ပွဲခံနိုင်ခဲ့ခြင်း ဖြစ်သည်။

Credit: iMyanmarHouse.com (iMyanmarHouse.com Team မှ ရေးသား ဖော်ပြသည်။)